قالت لي جدتي .. بين الماضي والحاضر .. وقصتي مع التغيير

قالت لي جدتي ..

أول كنا على حياة الشقا والتعب إلا إنا مبسوطين ومرتاحين وبيوتنا مفتوحة للرايح والجاي ..

ما نتضايق لو طق الباب ضيف بأي وقت إلا نقول يا هلا والله ومرحبا به,,

تمر علي أيام قدر طبخ الذبيحه ما تجف مويته بعد ما اغسله الا جدك داخل علي بذبيحه ثانيه ..

ما كشرت ولا قلت هذا وش جابه هالحين توني مخلصه شغلي .. بالعكس اهلي وارحب ,,,

ما عرفنا خرابيطكم وتقاديمكم للمعازيم ما غير تمر وقهوه ويالله من فضلك صدر منشرح وفلة حجاج ..

سكنا بيوت الشعر وبعدها الطين وثم بيوتكم هذي ولا مر يوم وفيه حوسة تدبل الكبد ببيتي .. ما احب اشوف الشي طايح بغير مكانه .. نهاري كله شغل وتنظيف وغسيل والقى وقت ارتاح فيه واسير على جاراتي ومرتاحه الحمدلله ..

وانتن الحين كل شيء متوفر لكن ما قصروا الغرب فيكن .. ملابسكن لها غسالات تغسلها وتنشفها ومواعينكن بعد ومكانس كهرب وافران غاز وكهرب .. ومع هذا تتشكن وتقولن ما عندنا وقت وبيوتنا حوسه .. عجزانه الوحده منكن تدنق وتشيل حوسة عيالها وعجزانه تقط ملابسهم بالغساله .. ذبحكن الكسل والنوم وهالتلفونات ما غير الوحده عيونها فيه ما تحترم لا صغير ولا كبير وجيتها مثل عدمها ما دام ما قطت هالبليه من يدها ..

***انتهى

للأمانة كلام جدتي "الله يرحمها ويغفر لها "هذا ما كان في نفس المجلس ..

فعلاً كلامها هو الحقيقة ..

أحيانًا أقيس كلامها على نفسي بعدة أمور ..

بدون أي سبب أكون متضايقة مالي خلق شي .. اشوف شغل يبي له احد يقوم عليه اقول خليه شوي ..

احيانًا احس اني مشغوله من غير شغل .. كيف تجي بالله هذي .. مدري ..

الاحظ الجمعات ما عاد لها طعم مثل أول .. الحين كل وحده مشغوله بجوالها وعالمها الخاص ..

وحتى لو سولفت معك مجامله بس وتسليك ..

بعد ما كانت العزايم على ذبايح ولما تخلص اكل ويزيد شي من اللحم يتقسم على المعاازيم يزينونه غدا لبكره .. الحين كل وحده تتفنن بطلب بوفيه وحركات وتكاليف بس كشخه ومنظر ..

الحين الجيران قليل قليل قليل اللي يتزاورون ويعرفون بعض .. احيانًا تحصل امراض ووفيت ما يدري عنها الجار الا بعد فترة وبالصدفه ..

الحين صارت الزيارات بين الأقارب شبه معدومه وكل واحد يتحجج بالظروف .. البيوت كبرت لكن الصدور ضاقت ..

مدري وين العيب !! في الناس والا في الزمان والا في القلوب اللي تغيرت ..

على قولتهم .. صحيح إن عفشنا زاد وخيرنا كثر .. لكن وناستنا قلّت وطبايعنا شانت ..

لازم العملاق اللي بداخل كل واحد منا ينتفض ويصحى .. لازم نتحرك نغيّر ..

أصعب خطوة بالتغيير هي أول خطوة بعدها كل شيء سهل بإذن الله ..

لماذا لا نعيش بقلوب الجدات وانشراح صدورهن مع وجود التكنولوجيا في حياتنا!!