السلام عليكم ورحمة الله
شفتوا اللي حصل (حصل بطحينة)
لا بجد اول ما عملت البوست (الرد) رن التليفون الست صاحبة البيت عندها مشكلة في اللاب توب و اخوها هيطلع علشان زوجي يصلحه صحي زوجي من النوم و قعد مع الراجل يصلحوا الكمبيوتر اما ايه ؟؟؟؟ انا دخلت انيم العيال.....مفاجأة انا نمت لحد الصبح وهو فضل صاحي............هههههههههههههههه لا تعليق
الصبح صاحية على تريقة و تأليس للركب طبعا انا كل مرة ما برحموش
قعد فالريسبشن شوية على ما احضر الفطار رجعت لقيته مكتئب فتح قناة الجزيرة شكلي هدغدغ التلفزيون و اخلص دا الراجل كل يوم يجيله اكتئاب (لا تعليق على موضوع غزة انا طرف مش محايد ومحدش يسألني على حاجة)
الاستاذ بيبو صاحي معانا طبعا صعب عليه اخواته الغلابة ازاي يبقوا نايمين لحد دلوقت الساعة كانت سابعة دي قلة ادب لازم كله يصحى ينكد على ماما دخل شد بودي من رموشه و جر غادة من شعرها صوتها سمع مصر الجديدة
خرج من الاوضة ولا كأنه عمل حاجة غادة جري على التلاجة ماماااااااااااااا انا ماشربتش سفن اب قلتلنا هنشرب وماشربناش بعد ما عمو مشي
بودي ماما مش لاقي النضارة الاساذ بيبو عامل فيها الدكتور بطيخة وماشي بنضارة اخوه هو مش شايف حاجة طبعا دي نضارة كعب كوباية و زوجي بيزعق والله لو اتكسرت ما انا مصلحها انا كل مالاقي نضارة عميل قدامي على المكتب لا إرادي اصلحها والاقي الراجل بيبصلي كأني عندي استبحس
كتفت بيبو اخدت النضارة بالقوة و اديتها لبودي يلمعها ويلبسها
غادة بتصوت هو مافيش غير الاكل دا كل يوم انا زهقت بابا قال لها يوم السبت بعد امتحان بودي هنروح نتفسح و نشتري حاجات من السوبر ماركت
بودي انا عاوز اكل بره كل يوم تقولولي بعد الامتحانات ياريت لو ماكنش فيه امتحانات ولا مدرسة ولا انجليزي
ابوه :ماكنش هيبقى فيه اكل بره
بابانا دخل يلبس ونزل كل الكرافتات على السرير بختار كرافة ولقيته بيحطهم فوق بعض علىشماعة من بتوع البدل قلتله سيبهم انا هعلقهم مظبوط بدل ما يتبهدلوا
مامااااااااا عاوز اشرب لبن رحت اسخن اللبن لقيت جوزي بيزعق انا غلطان اني سيبت الكرفتات قال علشان مايتبهدلوش رحت اجري اشوف فيه ايه لقيت بيبو لابس خمس ست كرفتات فوق بعض و مدلدين على الارض اخدتهم وهو بيقطع فوشي بيحافظ على حقه الدستوري فلبس كرفتات ابوه
خرج زوجي وهو بينفخ
غادة وبودي حرب على السفن اب و بيبو معبرهمش جاب الازازة و كوبايتة وفعنيه نظرة بتقول سبيهم يتحرقوا انا اللي خهاخد الاول
صبيتله و قلتلهم كل واحد يجيب كوبايته ويجي بيبو اخد الاول صبيتلهم وفجة لقيت حاجة ساقعة تلج بتجري على رجليا بيبو صب عليا السفن اب
رحت غيرت هدومي ومسحت الارض
بودي استأذن وهو بياكل يتفرج على برنامج بيحبه وغادة بتدور على حاجة علشان تخليه ما يتفرجش
وبيب لقى شنبر نضارة قديم مكسور لبسه وقعد جنب بودي وغادة رايحة جاية قدام التلفزيون بتنكد عليهم
زعقتلها اقعدي جنب اخواتك 3 ثواني ولقيتها بتصزوت نضارتي بيبو اخد نضارتها و طاير لحد ما ستخبى تحت ترابيزة السفرة وراميلها الشنبر القديم شوية وطلع كنت مستخبياه له اول ما طلع مسكته و اخدت النضارة ونبهت عليهللمرة العشر تلاف محدش يقعد جنب بيبو علشان ما يخطفش نضارته
عندي خمسين حاجة عاوزة تتعمل اوضب السراير و و المع حوض المطبخ و اشوف هنتغدى ايه و كمان التمارين و الاولاد عاوزيين يستحموا و سجادة اوضتي عاوزة تتغسل والغسيل يتلم وانشر اللي فالغسالة و بفكر اعمل الحلو دونات و اراجع عربي مع بوديكمان انا بشتغل شال فلسطيني (يعني تطريز بالكنفاه ) ادعولي اخلصه قبل الصيف

pelican

ههههههههههههههههههههههههههههههههههه
همووووووووووووووووت من الضحك

اية المسرحية اللى انتى فيها دى

والله انتى عسل
يااااااااااربي
نسيت داخلة اقول اية ولا اعمل اية

يلا بقة لما افتكر ارجع تاانى

مرمر 1 اهلا بيكي منورة المنتدى مغتربة فين يا مرمر ان شاء الله يتم حملك على خير الله يعينك

عطر الشموع انا هنا من زمااااااااااااان بس مشاركاتي قليلة علشان الحرب العالمية التالتة اللي عندي فالبيت

um susu طريقتك حلوة اوي ماشاء الله ربنا يقدرني واجربها

مدام وائل صعب اوي اللي بتقوليه دا خاصة ان زوجي نومه خفيف وما ينفعش اعمل حاجة وهو نايم و كمان بينام بدري و كل اولادي بيناموا بدري ويصحوا بدري و هما بيبذلوا مجهود كبيييييييير فلخبطة البيت صعب اوي لو ما رتبتش وراهم اني ارتب البيت

السلام عليكم ورحمة الله وبركاته
أزيكم يا أحلى بنات عاملين ايه أن شاء الله تكونوا فى أحسن حال .بسم الله ماشاء الله الملف فيه معلومات جميلة ومتنوعة جزاها الله كل الخير كل من كتبت وأعطت معلومة تفيد بها اخواتها فى الله.
أقولكم عملت أيه فى الايام اللى فاتت (أل يعنى حد سأل عليا)
الحمد لله لؤلؤ وعمور أنتهوا من أمتحانتهم يوم الاثنين (فى أولى أبتدائى):39:
وطبعا كنت مشغولة بمذاكرتهم لحد ماانتهوا قلت فى نفسى خلاص يابنتى أنتهيت من مذكرتهم أنتبهى بقى للبنتين الكبار والبيت
رحت داخلة طوالى على المطبخ علشان أحضر الغداء عملت سمك مقلى ورز صيادية وبعد الغداء أخذت راحة بسيطة من وقفة المطبخ.
طبعا معروف شكل المطبخ بعد تجهيز وجبة سمك (من الالف للياء) قلت لنفسى يابنت الحلال مافيش فايدة وراكى وراكى تنظيفه
استعنت بالله وغسلت كوم المواعين اللى فى الحوض وغسلت الحوض وخليته يبرق وفى نفس الوقت نظفت البوتجاز .
تصدقوا يابنات نفسيتى أرتفعت بعد مانظفت مع أنى كنت جاية من شغلى تعبانة ومرهقة .
_قبل ما أنسى أنابنظف البوتجاز والحيطان والابواب بمحلول النوشادر ده أنا بأعتبره قاهر الدهون والاوساخ (ندوب ملعقة أكل نشادر فى كوب ماء ونقلبه كويس ونضعه فى زجاجة ) وأستخدميه .
_enn بما أنك عايشة فى بورسعيد وانا أعرف البورسعيدية زى الاسكندرانية فى عمايل السمك وحبهم للسمك ممكن تقولى لينا شوية أكلات بورسعيدية ولى طلب ممكن طريقة كشك الجمبرى والملوخية بالجمبرى .
_عرفنا البيض المدحرج طريقته ازاى ممكن ياام مريوم العسل تقولى لينا طريقة البذنجان المدحرج.
سبنش فلور ممكن تقولى طريقة سلطة الكابوريا والسمك الفيليه فى الفرن
_بنات عايزة أعرف ازاى أستعمل ملح الليمون ( طريقة تحضيره) شكرا لكن مقدما .
النهارده أخدت أجازة من الشغل ( حأكمل المطبخ وحاعمل أكل ليومين ناوية باذن الله أعمل قلقاس وملوخية ولحمة محمرة _حخلى اللحمة بتاعة بكره فى شوربتها علشان بكره أعملها بالثومة وطريقتها سهلة دق الثوم مع الفلفل الاسود بدون ملح علشان اللحمة هنا مسلوقة ونشوح التوم فى شوية زيت لحد مايبتدى يلون وبعدين أضيف علية قطع اللحم المسلوق)وساعات لما يفضل عندى قطع لحم من
من وجبة غدا باعمله بالثوم أو نشوح بصل وبعدين أضيف عليه شوية ثوم وبعدين نضيف اللحمة عليهاونقلب كويس ونضيف شوية ماء ونتركهاتستوى شوية أنا بحب أحط لها شوية زعتر زى التقلية الصعيدى
_سلام كبير لأختنا الفاضلة بيلكون أنا متبعاكى ومواضيعك الجميلة أهلا وسهلا ومرحبا بيكى
_عطر أنا ساكنة فى الحضرة الجديدة .
-أختنا أيمان فينك .
أنا كلمت كتير معلش أستحملونى وعندى كلام أكتر بس أترككم فى رعاية الله وامنه وأروح على مطبخى سلام:27:

السلام عليكم ورحمة الله وبركاته

دى اول مشاركة ليا فى التجمع دة

طبعا هتقولو اتخارتى قووووووووووووووى
لا بس والله كنت بحاول اعمل شويه بنصايحكم الحلوة
واللى مخلتنيش ابقى فاضيه خاااااااالص
عالطول شغل
ولما افضى اقعد اقرا مشاركتكم ومش بلحق ارد خالص
بس عموما وحشششتونى جدا