قروب للعصلات لوزن 39 الى 49 لمن تحتاج زيادة الوزن

يمنع التجمعات بقسم السمنه والنحافه
الرجاء الأطلاع على قوانين المنتدى
http://forum.hawaaworld.com/showthread.php?t=2078166


تنبيه للبنات الي محتاجات يمكن 10 كيلو وفوق هم الي راح اقبلهم في جروبنا
مو لشي بس علشان نعرف وين ندربي برؤسنا اللهم يا كافي

السلام عليكم يا عصلات ولا يهونون الدبدوبات الحلوات
بالله الدبدوبه الي تسير علينا وتبي تشوف وش عندنا الله لا يهينك لو عندك زياده وتبين تتخلصين منها ترى برحابت صدر نقبل منكم من كيلوا وفوق

معاااااااناه والله معااااااناه
مافي شي ما جربناه لكن وش نسوي بالكسل
مسيقور حلو بس الواحد ينسى ياخذه ساعات
سيبروفيتا حلو بس ما ينفع للي تاخذ حبوب منع الحمل ما يفيدها

الخلطات العنبر والمفتقه وكل شي ما تبين مدري وين تروح

المهم الي تبي تشارك تتأكد انا ما عندها فقر الدم او سكر او حتى غده درقيه الله يشفي الجميع

في الجروب هذا كل وحده عندها نظام تبي تمشي عليه براحتها الله يوفقها بس تسدحه هنا وانا ان شاء الله اتابعها وياويلها لو ما طبقته هات الخيزرانه يا ولد

اذا عني بجرب خلطه حلم للحلاوه والحلبه والمكسرات اخاف اني اول وحده بنجلد
وبجرب السعرات الحراريه جدا عجبتني
وكمان باخذ الاملج المطحون قبل الاكل بنص ساعه حسب وصفة جابر القحطاني
خلطه حلم دون تفسير
للسمنه بشكل عام وزياده الصدر والارداف
وان شاء الله نبان النتيجه بعد اسبوعين من المتابعه
حلاوه طحينيه بالمكسرات علبه كبيره
كأس ونص من المكسرات المشكله كاجو لوز فستق جوز وتكون مطحونه
تقريبين كاسين من الحلبه الحصى المطحونه
ملعقه ونص من خميره الاكل العاديه
اخلطهم مع بعض بايدي
وقبل النوم اخذ ملعقه او ملعقتين مع كأس لبن او عصير

وياريت كل وحده تكتب كم وزنها قبل البدء خصوصا النحاف وكل اسبوع نقارن النتائج والتطورات والتقدم
وزني 42 وطولي 160 محتاجه 17 كيلو الله يعين والحمد لله يارب على كل حال
وكل شي ترى موجود بالنت بس اكتبي الاسم وولد عمي قوقل بيتكفل بكل شي اشهد انه شهم وفزاع وولد ناس
المهم كل وحده قلبل لا تشارك بالقروب تحدد لها برنامج وتمشي عليه

يا بنات ادعولي بشهر خمسه زواج اخو زوجي وزواج بنت اختي الاثنين زواجهم خلال 10 ايام :time: تكفون ادعولي يارب سمنا بصحه وعافيه