قريبتي وموقفها من ولادتي وجنس جنيني

السلام عليكم ورحمة الله وبركاته
مشكلة عضوة ارسلتها لي تقول نزليها ماتبي تنزلها بمعرفها 🚫🚫🚫🚫🚫🚫🚫🚫🚫🚫🚫🆑🆑


انا عندي اربع اطفال من جنس معين ( امتنع عن كتابة الجنس لانه مايهم وحتى ماينفهم الموضوع غلط ) المهم قريبتي عندها طفلين من جنس معين معاكس للي عندي ومن نوعية الحريم اللي تتكلم كثير كثير كثير بنوع الجنس وتفصل فيه وحافظه كل المعلومات اللي تخص جنس الجنين وساخطه ع جنس اطفالها ودايم تتذمر
المهم اني كنت في زياره لها وشفت اطفالها وبحسن نية وربي شاهد اني قلت يازين الزين والحلا وسلمت عليهم وطلعت من شنطني حلوى وعطيتهم المهم التفتت علي امهم قالت الله يرزقك عشرين زي هالجنس اذا كنتي تضحكين عليهم انصدمت وقلت امين وضحكت قلت عاجبيني بس ماارتحت لكلمتها ابد ظلمتني بسوء نيتها وتفكيرها
وللعلم دايم تسالني عن اوقات الجماع اذا حملت وكيف كررت الجنس وانا اقول واحلف واكرر ان مالي علاقه والله شاهد اني مااسوي شي كله من ربي وتسالني عن اكلي وقت الدوره وانا والله مااسوي شي ولا اكل شي معين
المهم شاءالله والحمدلله حملت وجبت الطفل الخامس ونفس جنس اطفالي السابقين
كل اقاربي وجيراني وصديقاتي زاروني وكلموني وباركو لي الا هي لازياره ولا حتى مباركه مع العلم ان علاقتي فيها قوية تجيني كل اسبوعين مره ونطلع انا وياعا باستمرار واشوفها بالمناسبات
لكن بعد ولادتي انصدمت وانجنت وحذفتني من الواتس اب بدون سبب انا فسرت حركتها انها غارت واخذها الحسد والحقد والارزاق بيد الله كلها ولا ليش سوت فيني كذا وعلاقتي زينه معها


سؤالي اتمنى الاجابه عليه وعدم الخروج عن صلب الموضوع وش تفسيركم للحرب والقطيعه اللي اعلنتها علي
مع العلم اني بعلاقه معها جيده وطيبه قبل ولادتي واكيد اني ابشيل بخاطري عليها حتى مباركه ماباركت
وش اتصرف معها اذا شفتها ؟ اتشره عليها ؟ وانا واثقه تمام انه ماوصلها كلام ولا اخطيت بحقها شي ..
اتمنى الرد ع سؤالي لاني مااقدر ارد ع ردودكم لان المعرف مب لي ،. لكن ابقرا الردود
جزاكم الله الف خير