قصة اختي كامله في مستشفى الولاده بالاحساء

السلام عليكم والرحمه....كروشات اخباركم ؟؟؟؟يارب تكونو بخيروصحه وعافيه..
بدخل بالموضوع مباشره.......
اختي حامل بالشهر الثاني وامورها كانت تمام ...فجأه!!!حست بوجع مو طبيعي وصارت تنزف...هالكلام كان الساعه 3 الفجر يوم الاربعاء...لما جات الساعه 9 الصباح راحت لمستشفى خاص لانها ماتحملت الوجع ..وسوت لها الدكتوره تحليل وقالت
لها معاك فطريات ولازم احولك على مستشفى الولاده والاطفال علشان يتابعون وضعك وطمنتها انه الجنين بخير...
اطلعت اختي من المستشفى مع زوجها وطيران على الولاده والاطفال....سوو اوراقها ودخلوها وكانت الغرفه تجيب المرض مشتركه صغيره وفيه معاها 2 ووالله لما رحنا زرناها مافيه مجال نجلس جلسنا جنبها على السرير...الله المستعان الله لايضيق علينا في الدنيا ولا الاخره...المهم تقول اختي كنت اموت من الوجع ولااحد عندي ولما انادي الممرضات مايهتمون ولاحتى يطلون علي...كانت اختي كل اشوي تدق علي وهي تبكي وربي يتقطع قلبي بس مافي يدي شي.....تقول جاني ثاني يوم الصباح دكتور مصري وقالت له انا تعبانه واتوجع ...تقول رد علي بعصبيه ويهاوش فيني كأني طالبه منه اريال ويقول لها انتي بملفك مكتوب انه لازم نسوي لك عملية تنظيف وانتي رافضه...تقول اختي انا صرت كذا:icon33:...وقالت له كيف تسوون لي تنظيف وانتو ماتدرون شنو عندي ...تقول طلع وخلاني...طبعا اختي اليوم
الثاني يوم الخميس زاد عليها النزيف والوجع في هالوقت انا رجعت للخبر لاني انا بعد حامل بالشهر السابع وكان معاي نزيف وكنت اراجع على طول عند سعد التخصصي وكان وضعي الله العالم فيه كنت احاتي نفسي وكنت احاتي اختي يعني النفسيه زي الزفت....المهم تقول اختي جا وقت الزياره العصر وكان عندها زوجها تقول وربي انه بكى لما شاف وضعي ....تقول في هالوقت جات دكتوره للحرمه اللي جنبي وقالت لها انتي خلاص البيبي نزل لازم نسوي لك تنظيف ..وطبعا الحرمه ارفضت خاصه انهم الصباح كانو مسويين لها سونار وقالو لها وضع البيبي تمام ...وارجعو لها بعد ساعه وسوو لها مره ثانيه وقالو لها مافيه جنين!!!!!وجلست الحرمه تتهاوش معاهم وتصارخ تقول اختي وانا اتنافض من الخوف ...تقول بعد الهواش قالت لها الدكتوره لحظه يمكن الجهاز متعطل!!!!!!راح نعيد الفحص مره ثانيه بس الحرمه ارفضت...طبعا لما جاو لها العصر وقالو لها تنظيف برضو ارفضت الحرمه وقالت لها الدكتوره راح اكشف عليك كشف من تحت بس اتأكد اذا الرحم مفتوح والا لا؟؟؟تقول اختي الحرمه مع الضغط وافقت تقول واكشفت عليها تقول اختي والله حتى زوجي طلع من الغرفه من اصراخ الحرمه.....واخر شي اسحبت الدكتوره المشيمه وورتها الحرمه وقالت لها قلت لك مافيه جنين وهذا المشيمه طلعناها ......تقول اختي انا اسمع الحوار وخلاص احس اني مو بمستشفى كأني بمذبح........طبعا هالكلام كان يوم الخميس وبالليل على الساعه 11 كلمت اختي وتقول تخيلي الحمام عزكم الله مافيه ماي والله بلشه:09: وهي تنزف واللي جنبها الثنتين ينزفون .....يعني ورب البيت مافيه اي رعايه ولا اهتمام...
جا يوم الجمعه ودقت علي اختي الصباح وهي ميته بكى تقول خلاص بموت مو قادره اتحمل طبعا انا ماتحملت قلت لها خلاص بكلم اهلي....كلمت اخوي وقلت لها خلاص اختي بتموت كلم قريبنا شوف اجازته خلصت والا لا؟؟؟لانه عندنا قريب يشتغل في المستشفى بالاداره بس كان في اجازه...كلموه اهلي واختي تصارع الوجع ....وفي هالوقت نزل البيبي على اختي بالحمام وهي ماتدري وطبعا نزل بالمرحاض عزكم الله تقول لما شفته مت في مكاني لدرجة اني ماقدرت امشي ناديت الحرمتين اللي معاي وساعدوني الله يجزاهم خير....طبعا كلم قريبنا المستشفى وصار استنفار تقول اختي 3 دكتورات على راسي بس بعد ايش.....وطبعا لما كلمها قريبنا وقالت له عن الاوضاع بالمستشفى دق عليهم وشرشحهم
وقالو له اصلا حنا لقينا الجنين بالحمام وحللناه وقلنا لها بنسوي لك تنظيف بس هي مو راضيه ....حسبي الله ونعم الوكيل ...تقول اختي اصلا هم مايدرون حتى انه الجنين نزل بالمرحاض لاني سحبت السيفون قبل مااطلع من الحمام
وحتى لما طلعت مااحد جا ولا احد دخل الحمام....بس الواحد شيقول والا ايش ايسوي...طبعا اختي سوت تنظيف وارتاحت بس بعد رحلت عذاب الله يأجرها وربي يعوضها خير وحسبي الله على كل شخص مايأدي وظيفته على اكمل وجه.......
ملاحظه قالت لي اختي حاجه انا برضو ملاحظتها على بعض الاخوات السعوديات الممرضات الله يهديهم طبعا مو كلهم البعض منهم ...
تقول كان فيه سعوديه تجيب لنا الاكل كانت تصارخ وتقول كلو لكم ربع ساعه وبعدها بجي اشيله!!!!!!كأنها الله يهديها جايبته من بيتهم ...تقول لما قالت هالكلام قامت عليها الحرمه اللي جنبي وجلست تهاوش فيها ورمت الاكل بوجها وقالت لها خذيه معاك الله يسلم زوجي جايب لي اكل ....ومره صادفني موقف برضو مع ممرضه سعوديه
كنت موديه بنتي بطعمها وكان المركز الصحي مليان طبعا كان قسم للحريم بس ....بس ماشاء الله كان مليان من الحريم لدرجة اني لما دخلت ماحصلت كرسي فاضي اجلس عليه واضطريت اوقف مع الحريم الواقفه ومن قوة الزحمه الحريم
واصلين لين غرفة الممرضه اللي تطعم الاطفال...فجأة الاخت الممرضه اجلست تصارخ فينا حنا اللي واقفين وتقول بعدو عن الغرفه اقرفتونا انتو ماتفهمون والا من وين تسمعون!!!!طبعا انا ورب البيت صرت كذا:44:....كنت اقول بيني وبين نفسي على الاقل لاتحترمينا حنا اللي متزوجات صغار حنا مثل بناتك ..بس احترمي كبيرات السن اللي كبرك واللي اكبر منك مساكين....وربي انقهرت من اسلوبها وماطعمت بنتي طلعت وطعمت بنتي في مستشفى خاص.......
طبعا الله يشهد فيه ممرضات سعوديات قمه في الاسلوب والاخلاق والستر والعفاف وفيه نماذج ثانيه شايفه حالها على الناس وهي ممرضه كيف لو كانت استشاريه والا اخصائيه!!!!!!!!!!
هذي تجربت اختي المريره مع مستشفى الولاده والاطفال في الاحساء ..صارت لها وانا في نهاية السابع وانا حاليا بالشهر التاسع يعني السالفه ماصارت من سنوات صايره من شهر وكم اسبوع.....
اتمنى منكم دعوات حلوه لي بالولاده السهله ولااختي بالحمل العاجل الغير اجل ......
اعذروني طولت عليكم....