قصة ام دحيم ومقالبها

السلام عليكم ورحمة الله وبركاته
الليله بقول لكم قصه هذي القصه حلوه تقصونها لعيالكم بينبسطون عليها ومن زمان وانا ابي اقصها لكم بس كل ماجيت اكتبها يا يكون اشتراكي مخلص او المنتدى مسكر واخر شي الليله كتبتها وتوني بخلص تسكر جهازي قبل ماارسلها انقهرت والله وقلت بكتبها مره ثانيه
المهم ندخل في القصه اول شي اقطعو الاتصال وصلو على الرسول _ اللهم صلي وسلم على محمد_


كان ياماكان في سالف الزمان كان فيه وحده اسمها ام دحيم هوايتها جمع المال باي شكل من الاشكال(امحق هوايه) المهم هذي الحرمه راحت وجمعت ذهب من قريتها بالحيله وهربت لقريه ثانيه جنبهم وبعد ما وصلت للقريه الثانيه راحت تبي توزن الذهب الي جمعته فطلبت من حرمه في القريه الثانيه انها تعطيها ميزانها عشان توزن به المهم الحرمه شكت فيها وقالت في نفسه هذا الحرمه غريبه وش بتوزن بالميزان ؟؟ فراحت وحطت عسل في الميزان واعطتها اياه المهم ام دحيم وزنت الذهب ورجعت الميزان للحرمه وماانتبهت لقطعه الذهب الي لزقت فيه الحرمه شافت الذهب وراحت وقالت لزوجها هذا الذهب اكيد فيه ان وش قصة هالحرمه ومن وين لها هالذهب فراح زوجها واجتمع مع رجال القريه وعرفوا ان الذهب هذا مسروق فقرروا انهم يجلدونها بعد صلاة الجمعه فجابوا ام دحيم وربطوها داخل خيشه (الخيشه عباره عن كيس حق الرز امحق وصف خخخخخ) عشان يجلدونها وهي متستره المهم ربطوها داخل الخيشه وراحو يصلون وفي هذا الوقت مر رجال غريب عن القريه وشاف الخيشه تتحرك واستغرب فرجفها برجله وتكلمت ام دحيم وقال من انتي قالت انا ام دحيم ومتراهنه انا ورجال القريه اني اذا جلست في الكيس الى ان يطلعون من الصلاة يعطوني وزني ذهب ؟ (فهمتو تراها لعبت عليه )
قال الرجال بيعطونك وزنك ذهب والله حلوه
قالت وش رايك لو تجلس مكاني واعطيك نص الذهب قال الرجال يالله مهيب شينه ويطلعها من الخيشه ويدخل مكانها
ويطلعون الرجال من الصلاه وهم متحمسين ويالله جلد في هالخيشه والمسكين يصيح داخلها (احسن يستاهل من قاله مايصلي مع الرجاجيل) المهم يوم سمعو صوت الرجال ويطلعونه ويقول لهم قصته وتركوه
وام دحيم راحت لقريه ثانيه طبعا راحت وهي مطفره مامعها شي وقامت تمارس هوايتها في جمع المال وهالمره استعملت اسلوب جديد قامت تطيب بيتها وتدخنه وتقعد ليل ونهار تتكلم في هذا البيت مع بنتها وتقول يالله قومي يابنت وروحي يابنت (هي ماعندها بنت بس توهم الناس انها عندها بنت) المهم الرجال يمرون من البيت ويسمعونها قاموا الخطاطيب على بابها الواحد ورى الثاني وام دحيم تتشرط الى ان جا واحد معه كنوز الدنيا كلها وطبعا هي ماتبي تفوته وماعندها بنت قالت وش اسوي وماتضيق على ام دحيم مشاء الله وافقت عليه وخذت منه الي تبي ويوم جا يوم العرس قامت وجابت لها خشبه ولبستها عباة وفستان وراحت تمشي وهي ماسكتها وتقول وخرو عن بنتي وتمشي بها الى ان وصلت لقليب (القليب عباره عن حفره عميقه يااااااي على التوصيف خخخخخخخخ) المهم يوم وصلت للقليب راحت وطيحت الخشبه فيها وتقعد تصيح بنتي طاحت في القليب بنتي طاحت في القليب ويجتمعون الرجال بطلعونها وقالت لا بنتي مااحد يطلعها الا انا وراحوا وتفرقو وبعد ما راحوا طلع عليها من القليب جني _ بسم الله الرحمن الرحيم_ وقال لها والله اني كان راسي يوجعني ويم طيحتي الخشبه علي طاب واي شي تبينه انا في الخدمه قالت ام دحيم ابي تعطيني بنت تصير بنت لي قال ابد اكثر ماكثره الله البنات وعطاها وحده وخذتها وقالت ابشركم طلعت بنتي وتزوجها للرجال
وبعد ما تزوجت بكم شهر قام الرجال يسأل زوجته ماعندكم رجال ولا اخوان ولا عيال عم قامت البنت تسال امها وقالت لها ان دايم يعيرني اني ما وراي رجال فقالت لها امها من قال انه ماوراس رجال الا قولي له اخواني سبع قالت البنت وينهم قالت بعدين بجون
المهم قامت ام دحيم وترصدت لواحد من القريه الثانيه تاجر راعي حلال وعنده سبع عيال مشاء الله كان هذا الرجال دايم يتمشى عند شجرة قريبه من قريه ام دحيم ويستريح تحت ظلها قامت ام دحيم وترصدت له ويوم وصل للشجره راحت وخنقته الى ان مات وتلبس ملابسه وتتلطم وتقعد تحت الشجره المهم عيال الرجال فقدو ابوهم ويدورن عليه عند الشجره لانهم عارفين ابوهم انه يحب هالشجره ويوم جو لقوا ام دحيم ويحسبونها ابوهم وقالت لهم اسمعوا يا عيايل انا كبرت وماادري وش بيصير في هالدنيا بعدي بس بقول لكم عن سر قالوا العيال وشو يايبه قل لنا كلنا اذان صاغيه (حلوه اذان صاغيه مدري وشلون طلعت) اقلت لهم ام دحيم شوفو يا عيالي انا تراني متزوج من وحده ساكنه في هذي القريه وعندها بنت وتراني ماعلمت امكم بس انتم اقنعوها واذا مت انتبهو على بنتي وامها وهذي وصيتي لكم قالوا العيال ابد يايبه لا تشيل هم زوجتك وبنتك مت وانت مرتاح (امحق عيال بدال لايقولون بعد عمر طويل) قالوا يالله نروح للبيت قالت لهم روحوا وانا بلحقكم راحوا العيال وقامت ام دحيم وترجع ملابس ابوهم عليه وتشيله الى ان ودته الى بيتهم وتسدحه في البيت بدون لايحسون ويوم قاموا الصبح ويلقون ابوهم ميت وقالوا لازم ننفذ وصيت ابونا بنروح ندور على زوجته وبنته ونعطيهم نصيبهم من الورث ويروحون لام دحيم ويعطونها نصيبها وقالت لبنتها شوفي اخوانس خلي رجلس يشوفهم ويدري ان وراس رجاجيل
وهذي قصة ام دحيم ام المقالب وتوته توته خلصت الحتوته
هاه وش رايكم ان شاء الله تعجبكم ولا تملون وانتم تقرونها لانها طويله بس تراني مختصرتها لاخر حد وتراني كتبتها ماراجعتها يمكن تلقون حروف طايره ولا شي انتبهو خخخخخخخخخ
وسلاااااااااامتكم