قصة حملي السابق

السلام عليكم اختصاراً لقصتي
انا تزوجت وكنت اكل مانع بعد 6 شهور تركت المانع وانتظرت الحمل وفعلًا حملت الحمدلله
اول الشهور كان الوضع جدًا سهل لدرجة ما احس بوحم وكنت اراقب بطني متى يكبر
واتحرى ميعاد حركته متشوقة جدًا لحركاته وركلاته
بعد مانتصفت بالشهر السابع كالعادة رحت لموعدي قالت دكتورتي لازم احولك على المستشفى الحكومي المويات مقلقتني ! زيادة قوه موية الطفل تقصد
والله ماخفت كنت موكله امري لربي كنت اقول لامي يحبون يخوفون الواحد
وفعلًا رحت واخذوا اشاعه رباعيه قالوا بنتأكد من شيء المويات كثيرة جدًا
تعالي لمنا الساعه 8 ونص الصباح نعيد الاشاعه باليوم الفلاني ..
وفعلاً رحت وانا تعبانه لان المويات كانت محسستني اني بالتاسع بطني كبير واحس بثقل وكتمه
انرصيت لين الساعه 1 الظهر ونادوني وسوت الاشاعه وقالت انتظري نص ساعه زياده تعلمك الدكتورة الفلانة ايش الموضوع ..
اقول للدكتورة اللي سوت الاشاعه
دكتورة طمنيني
الطفل وضعه حرج؟
تقول ما ادري 🥺
بدأ الخوف والقلق ياكل فيني
بس استودعه الله يارب بشرني يارب
وتمت نص ساعه ونادتني الدكتوره
للحين ماراح انسى اسلوبها معي 😭
قالت يافلانة المويات كثيرة!!
الطفل عنده تشوهات
ليه توك تجين
ليه تراجعين عند حكومي !
انتي تاخذين حمض الفوليك
انتي وزوجك اقارب؟
انا وقتها بحالة صدمة وذهول فجيعة علي وقع كلامها علي صادم
قلت دكتورة كيف انا اراجع عند دكتورة كل اموري تمام واخذ فوليك وانا وزوجي موب اقارب
قالت هذا اللي واضح لنا الطفل جدًا مشوه
قالت تخيوا
الطفل ما عنده خشم !
وراسه كبير
وايدينه فيها مشكلة
ورحلينه
واشياء كثيرة من الصدمة عجزت اتذكرها !
قلت دكتورة يمكن يخطي السونار صح
قالت لا الاشاعه هذي من افضل الاشاعات استحالة تخطي..
وقتها كأن الله سبحانه انطقني
اللهم اجرني في مصيبتي واخلفني خيرًا منها 💔
رحت للبيت وانا تعبانه نفسيًا وجسدياً درى زوجي وصبرني وكان ماشاء الله عليه صابر ومحتسب
هذا من الله وراضين باللي يعطينا اياه ربي وانا مثله كنت الحمدلله
مرت شهور الحمل الاخيرة متعبة لي بقوه ثقل والمويات تزيد كل اسبوعين
لين حانت وقت الولادة
قرروا لي عملية بحكم ان المويات كثيرة وصعب علي الطبيعي
اثناء الولادة اجتمعوا علي 4 دكاتره بالغرفة غير الممرضين
دكتور للحضانه
دكتور التشوهات
دكتورين للعملية
كانت لحظة صعبة جدًا كنت اقول يارب خيب ظنهم واخرجه سالم معافى يارب
تمت الولادة والمفاجأة الولد سليم تام الخلق والخلقة ويهبل
اذكر هاللحظة مستحيل انساها كانت نظراته لي 💔 تقطع القلب
يشبهني يشبه خشمي صغير ومرتب
شعره نفس شعري اسود وناعم
عيونه وحواجبه
كله كله يهبل كان 💔
قبل ما اولد قلت لهم لاتورني اياه اذا كان تعبان مره
اول ماطلع من بطني قالت لي الممرضة تراه طبيعي مافيه تشوهات
وعلى طول جابه دكتور الحضانه لعندي يوريني اياه
صح تام الخلق والخلقة واحمد ربي الحمدلله لكن كان تعبان من المويات 🥺
بسبب زيادة المويات نقص عنده الاكسجين
كان بنفجسي على ازرق وانفاسه مظطربة
الحمدلله الحمدلله الحمدلله
من رضي فله الرضا ومن سخط فله السخط
بعد 3 ايام من ولادته استفاه الله ورده اليه
الحمدلله على كل حال
يشهد الله اني صبرت واحتسبت ولم اجزع
صح ايام النفاس كانت صعبه جدًا لكن من عرف الله هانت عليه مصيبتهً
مازلت اتذكره واتذكر نظراته لي الحمدلله على كل حال
اتممت سنه الان بعد ولادتي والآن انتظر العوض من الله سبحانه بإن يكرمني بالحمل السليم
لاتنسوني من دعواتكم انا ومن يتمنى الحمل
بإذن الله ابشركم قريبًا بحملي
ام احمد ♥️