قصة حملي وولادتي :

قصة حملي وولادتي :
السلام عليكم
تزوجت وعشت اجمل 5 شهور الحمدلله
بعدها قررت اني اترك المانع واجيب نونو يملى علينا حياتنا زوجي كان يقولي نصبر سنه بس انا ماش قلبي متعلق بالاطفال واحبهم واموت عليهم ..
المهم قدر ربي اني احمل الحمدلله والشكر
وكان حمل سهههههل ببدايته لاووحام وعثيان ولا دوخة اللهم كان ينزل مني دم وكان مقلقني اخذت مثبتات واستمريت لين الخامس عليه ..
بعد الخامس قالت لي الدكتوره ووقفي المثبت خلاص ارتفع النونو ان شاء الله ماعاد تحتاجينه
وقفته
قالت تعالي بعد اسبوعين اعلمك بالجنس
وانا وزوجي متحمسيييين مرررره للمفاجأة وراضين باللي يكتبه لنا ربي ..
فعلًا رحت وسويت سونار قالت معاك بنوته وانا قلبي طاااااير ودي اطلع الحين ابشر كل اللي اعرفهم بتجيني بنت
لحد الآن واموري تمام والبيبي كانت الدكتورة تقول نموه كويس الحمدلله
بداية دخولي للشهر السادس جيت لموعدي سويت سونار قالت لي الدكتوره انا قلت لك بنت ؟
قلت ايه قالت لا مبين معي صبي ..
وبرضو فرحت الحمدلله كلهم نعمه وزوجي فرح بس خوفتني بشغلة قالت لي معك زيادة بالمويات !
ولازم اعطيك تحويل للحكومي لاني اراجع بخاص
حسيت في شيء خطير بس تعوذت من الشيطان قلت يمكن ماتعرف
وفعلًا رحت لموعدي مع الحكومي
كان 8 الصبح رايحة وانا ماخفت وكنت واثقه بالله سبحانه ثم كلامها تقولي مافيه شيء خطير بس زياده المويات ممكن تسبب لك ولاذة مبكره
المهم بعد صلاة الظهر مباشرة جاء دوري!
تخيلوا من 8 الصبح جايه وتوه يجي دوري
قالت بنسوي لك اشاعة تفصيلية
سويت والدكتوره هنديه حقت الاشاعه ماتعرف عربي وجهها يخوف كأنها مصدومة
اقولها دكتوره فيه مشكلة ؟
تقول مافي معلوم
انا بدا يدب الخوف فيني بس قلت اوكل امري لربي مهنا الا العافية ان شاء الله
واستودع اللي ببطني ونفسي
خلصت قالت انتظري تناديك الدكتورة وتشرح لك
جلست انتظر ساعة ونص ونادتني الدكتوره
وكان كرسيها بكوانتر قدام الرايح والجاي
قالت انتي فلانة؟
اجلسي ..
قلت دكتوره طمنيني ان شاء الله مافيه الا كل خير
قالت ممم
الطفل تعبببببباااان جدًا
ماعنده خشم
وراسه فيه مشكلة
وايدينه معكوفة
مششششوه مررره 💔
وقتها يابنات سبحان الله من انطقني بكلمة وحدة بس
اللهم اجرني في مصيبتي واخلفني خيرًا منها قلت دكتوره يمكن تخطي الاشاعة صح
قالت لاااااااا الاشاعة هذي مضبوطة
قالت اكيد ماكنتي تاكلي فوليك اسد صح
قلت والله ماكلته من قبل ما احمل
قلت زوجك قريبك قلت لا والله موب قريبي
قالت ليش تراجعين بخاص الخاص مايكتشفون هالاشياء بدري
قلت بيني وبين نفسي عاد لو مكتشفتها بدري بطيحه مثلًا ؟
هذا قدر ربي لي وراضيه اتم الرضا الحمدلله
قالت لازم حالًا تسوين ايكو للقلب للجنين تقولي يمكن بعد عنده مشاكل داخليه
عجزت ارد
اتخيل شكل زوجي وهو ينتظرني ابشره
نزلت لمه ومعي ورقة الاشاعة الثانيه وشفته قاعد لما شافني جاء يركض
فلانة بشري لاشعوريًا جلست بالارض قلت تقول الدكتوره الطفل مشوه
قال لاتصدقينهم حنا واثقين بالله وامل ربي مايخيب انتي اهم شيء لاتنغثين ولايضيق صدرك قولي الحمدلله واللي من ربي رضا
حمدت ربي واسترجعت وقلت ياربي انا راضية بكل شيء تكتبه لي يارب تصبرني وتعينني
سويت الاشاعة الثانيه وكان رجل اللي يسويها ومعي زوجي كل الاجزاء الداخلية سليمة للجنين
والدكتور الله يجزاه خير قال لزوجي لما شافني منهارة قال ترى موب على كل حال تصدق الاشاعة خلوا املكم بالله اكبر
طلعت من المستشفى والله يجعلها بالجنة خالتي ام زوجي حبيبتي ربي يرضى عنها وقفت معاي ووقفه ماراح انساها ربي يبرد عليها بقبرها ويعلي منزلتها
كانت مسويه لي الغداء تشوفيني ثقيلة ياعمري قالت امسك عنكم الغداء جعلها تاكل من ثمار الجنة يارب
المهم صرت كل شهر اراجع عندهم
ما احكي لكم كيف مرت علي 3 شهور كانت من اثقل وكل وقتي خايفة بس اتخيل اللي ببطني كيف يصير شكله اقول انا امه بتقبله كيف مايكون ضناي لو يصير اللي يصير
لكن العالم اللي برى مابي احد يرمي عليه كلمه 🥺 تضايقني اكثر مماتضايقه
دخلت الثامن وانا كل شهر تزيييييييد المويات عندي لدرجة اني انكتم وانا نايمة اقوم مخنوقة 💔
رحت لموعدي ودخلت عند دكتور كبير سوري اتذكر كل كلامه لي كان بلسم
دخلت قالي ايش فيك شرحت له مبدئي وكتب اسمي وطلع له التقرير بالكمبيوتر
قالي يابنتي لايضيق صدرك لساتك صبيه اذا جاء وراح بيرزقك ربي ويعوضك واذا عاش انتي مأجورة يابنتي الاجر بيضاعف لك
كنت اقوله وانا اصيح لا يا دكتور بيجي سليم ان شاء الله
قالي تعالي بالموعد الفلاني واذا ماجاتك الولادة لازم تولدين قيصرية لان المويات اعرف انها تضايقك وتكتمك تولدين افضل
طلعت من عنده ودخلت التاسع وولدت مرة اخوي ولهيت معاها
وكانت هذيك الايام براااااد وامطار كنت كل ماصليت ادعي ربي يارب فرح قلبي بسلامة جنيني واجعل كلامهم يخطيء وقر عيوني بشوفته سليم معافيء
ويارب اذا كتبت انه مريض وتعبان يارب انتم ارحم به مني يارب تختار له الخيرة المباركة وتربط على قلبي وتصبرن على فراقه وتخلف علي الخلف المبارك
كانت هذي دعوتي ..
المهم كنت منسدحة افكر وش اتعشى جتني رسالة واتساب من امي
تقولي يابنيتي روحي للمستشفى طولتي ولا جتك بوادر ولادة الله يستر لايصير الطفل تعبان
قريت رسالتها الساعه 9 بعد العشاء قلت لزوجي قوه نشوف بس نتأكد ياحياتي كنت احسب الوضع سهالات احسب يكشوفون ويطلعوني بعدها
المهم رحت طوراريء
قالت السستر ياحبيبتي انتي مطوفه لك 13 يوم بالعاشر لازم ترقيد 💔🥺
بديت اتنافض واخاف كيف بنام لوحدي
وادق على زوجي قلت له يقولون ترقيد
قال الحمدلله وصل الفرج
وفعلًا طلعت ترقيد
زوجي عنده قاعده بالليل ماتدقين على امك واهلك تروعينهم وانه هذا من باب العقوق
رضيت بالامر الواقع وصرت غرفة التنويم جنب الكشكش والليل كان مرعب بالنسبة لي خووووف وصراخ اللي بيولدن وه 💔
وكل شوي يجون يصحوني عشان التخطيط
جان لمي سستر الساعه 4 الفجر قالت مدام
الساعه 8 فيه اشاعة تفصيلية ثانيه مع نفس الدكتوره اللي سوت لي قبل
قلت تمام
قمت اصلي الفجر وادعي ربي واصيح يارب تفرجها علي يارب تفرح قلبي وتطمن بالي
نمت انتبهت على السستر تحط التخطيط الساعه 7 قالت يلا البسي عباية عشان يروح للاشاعة
لبست عبايتي وفعلًا رحت لنفس الدكتوره سوت لي الاشاعة وقالت روحي لغرفتك اجيك بالغرفة
جتني دكتورة سودانيه
قالت يامدام حالًا توقعي على عملية لأن الطفل جدًا حدًا والمياه كثيرة تعبان ووزنة كبير 3،900 جرام
قلت امري لله ووقعت وعلمت زوجي وضاق صدره قال لازم اجل اعلم خالتي
اللي هي امي
الله يطول بعمرها وفعلًا جتني ياروحي وضايق صدرها ياقلبي بس تناظر وجهي
وتمسح على راسي
قالوا بكره عمليتك
صوموني من بالليل وحطوا قدامي ملابس العملية وقسطرة البول
ما اذكر تفاصيل ذاك اليوم لاني كنت هادية لان امي حولي وتسمي علي
نمت بالليل وانا بس احلم بالعملية وخايفة
صحيت وصليت الفجر وعجزت انام خايفة وامي ياروحي داخت ونامت
انتبهنا كلنا
الساعه 9 السستر
مدام يلا عملية
واسمع دعاء امي لي وهي تخنقها العبرة ياحياتي استودعتك الله يابنتي الله يرجعك بالعافية ويقر عينك بشوفة ضناك
ركبوني السرير وودوني للعملية
وانا خايفة قبلها عطوني مهدي
واحس راكده مابي حيل يمكن من مفعول المهدي
دخلت للغرفة ويستقبلوني 3 دكاتره واحد كنت اراجع عنده وكان يشرح لي حالة التشوهات سوداني
والثاني مصري والثالث سوري ودكتوره هندية
ودكتور للحضانه مع طاقم سساتر للحضانه
اسأل اللي ولدوا عملية كان فيه دكاتره كثيره وقت عمليتكم يقولون لا
انا قلت يمكن عشان الحاله متوحشين وخايفين جايبين اكثر من واحد خدروني نصفي والحمدلله تخدرت وحطوا علي الستارة
وجت سستر جنبي تهديني
قالت خايفة قلت ايه
قلت لها سستر اذا طلع البيبي لاتوريني اياه اخاف يصير تعبان ويضيق صدري قالت تمام
اقسم بالله يابنات اول مافجروا موية الرحم حسيت بخفة حسيت بنفسي يطلع صح
اخذت اقوى شهييييق
وكان البيبي فوق احس بهم يدخلون ايدينهم يطلعونه لما طلعوه اسمعهم يقولون الحمدلله الحمدلله
مسكت يد الستتر قلت لها بشريني
قالت طبيعي مافيه شيء مافيه تشوهات
هي قالت هالكلمة بدا تخطيط القلب عندي يلخبط قعدت اصيييييح الحمدلله يارب
واسمع الدكتور يهاوش السستر هديها هديها
قالت اهدي اهدي مافيه الا العافية
اخذه حق الحضانه طبعًا حبيبي طلع ولا بكى
جابه لعندي قالي شوفيه اهرحبيبي للحين اتذكر نظراته لي يابنات جميل جميل وشعره اسود وكثيف وخشمه صغير مرتب ياحياتي كان ينظرني ونفسه يتباطيء
قالي حق الحضانه تعبان ترى الاكسجين ناقص عنده 💔
اشوفه يركض به ورراه السسساتر اقسم بالله كأنه حلم!
ذاك اليوم
الحمدلله تمت العملية بنجاح وتوفيق من ربي سبحانه
وطلعت لغرفة التنويم
وجوني الحبايب زاروني كانوا يسألون وين النونو اقولهم تعبان شوي
مابي احد يدري 🥺
كتبوا لي خروج رابع يوم
كل الثلاث ايام بس افكر فيه ويوجعني قلبي عليه اذا تذكرته وزوجي كان متعلق فيه يزوره كل يوم ويصوره لي
بس كان فعلًا تعبان قلت مابي اتعلق به اخاف يروح 💔
اليوم الثالث منعوا زوجي من الزياره له
واليوم الربع كتبوا لي خروج الساعه 9 الصبح انتظر زوجي يجي يسوي اوراق الخروج
دخل علي وجهه ماش 🥺
جلس عندي بالسرير قالي فلانة انتي مؤمنة بقضاء الله وقدره قلت له
احمد توفى ؟ 💔
قال ايه بيعوضنا ربي لاتخافين واحمد سبقنا للجنة
اصبري لاتجزعين
قلت يارب اخلفني خير يارب وصبر قلبي والحمدلله والشكر على ماكتبت وقدرت
صار حبيبي عنده مشاكل داخليه سبحان الله
القلب رالرئة والكلى كلها فيها مشاكل ماتحمل وراح
يارب اعطيتني اياه بلاحول مني ولا قوه واخذته هو منك وراح إليك اللهم لا اعتراض ..
يارب العوض المبارك
عشت ايام النفاس كانت كئيبة لكن الحمدلله من عرف ربه هانت عليه مصيبته
مرت سنة 6 اشهر على وفاته 💔
اليوم يوم فضيل عرفة وجمعة اغمروني بدعواتكم وادعولي ربي يرزقني الحمل السليم ويرزقني لذة احتضان جنيني وانا وياه بصحة وعافيه ويحميه من التشوهات والامراض يارب ..
ويرزق كل محروم وكل من يتمنى الذرية الصالحة يارب