قصة حملي بعدسنين 💘

السلام عليكم ورحمة الله وبركاته
قصتي مثل منتظرة ١٣ سنة انتظار وما ادراك ما الانتظار
لهفة شوق حزن ترقب وخوف وامل مثل الشمعة بهفه بسيطة ينطفي ..
تزوجت مرتين المرة الأولى لم احمل قط وبقيت مع زوجي لمدة ٥ سنوات تقريباً
تزوجت مره ثانية من شاب حنون وطيب وماهو منتبه اصلاً لسالفة الحمل انا اللي انتظر من اول شهر
وبعد ٨ أشهر حملت والله يافرحتي والله ان الدنيا لا تكاد تسعني من الفرح ..ومن اول سونار قالوا الحمل غير صالح كيس والجنين غير موجود ونزل الحمل خلال شهرين حزنت وبكيت وتألمت ولكن داخلي امل اني راح احمل مرة ثانية دام حملت هذي المرة ..وتمر سنه سنتين ثلاث واربع
وانا من مستشفى لمستشفى وم طيبيب الى طبيب ومن تحليل الى تحليل وكل الفحصوات سليمة عندي وعند زوجي ..ولكن ماحملت ..سويت تلقيح مجهري وتلقيح صناعي وكلها فشلت وكم حجم الألم
وع السنة الخامسة ذهبت لدكتور بندر عبدالكريم
وآه يابنات ع التعب من منظار وابر وتحفيز لبطانة الرحم ..وكان عندي دوام والله يابنات ارجع انام زي الميته..
الأمل عندي كان شبه معدوم ولكن اطرق الاسباب
اجريت حقن مجهري ..من تحويشة العمر ع الفلوس اللي مع زوجي ..واستعنا بالله..
طلعت من العملية وانا حشرانه بموت وع طول رحت الحمام ..وقلت في نفسي اذا فشلت لا تقولين ليه ..
الدكتور بندر كتب لي مغذية اسمها البيض مدري وشهي بس مفيدة ..
المهم قمت وجات ذي بالعربية وخذتني ونزلتني تحت انتظار الطواري ..وجاء دوري واشوف اللي معي معاهم كلهم عربياتهم وانا اتمشى انا ووجهي ع روجولي ..المهم وصلت الغرفة اللي فيها المغذيه وجلست المغذية ٣ ساعات ..وطلعت وفي الطريق زوجي يقول اخر محاولة لك وبعدها بتزوج ..وهو يمزح ...وانا الدمعه زي النار ع خدي
قلت له والله لأحمل المره ذي ورحت عند امي ونفس الشيء زي الميتة واليوم الثاني كان رمضان وصمت ..وامي ماتخليني اشيل الفنجان ..ادعي ربي واصلي ونفسيتي مرتاحه..وحلمت اني امسك زجاجة عطر وفسرته طلع حمل ..وفي اليوم التاسع من العملية.. نزل دم قلت بس فشلت وماعلمت امي وكل ما اكون وحدي خلاص تجيني نوبة بكاء ..واحاول اخفي دموعي بس ماقدرت ..جاء زوجي وقلت له وقلت جب تحليل حمل ..
ورحت الحمام وانا فيني طمأنينه من جواتي ومسلمة امري لله
وحللت وطلع خطين والله يافرحتي ..آه يا ناس ابغى اعلم كل الناس علمت امي وفرحت بس ماكانت متطمنه قالت تأكدي بالدم ورحت حللت رقمي وطلع ٣٠٠ يابنت فرحت فرحة وامي بكت وابوي بكى وصياح ماهو طبيعي ..كلمتهم قالوا بعد يومين عيديه ..لازم يتضاعف الضعف.. وحللت مره ثانية وكنت منسدحه وامي جنبي ودقيت ع المستشفى .. وقلت كم النسبة قالت ٤٠٠ والله يابنات شفتوا اللي كأنها اطعنت في ظهرها جلست كذا بقوة وقلت ماتضاعفت المفروض انها ٦٠٠ كلمت المستشفى قالوا ممتازة لكن انا مو مرتاحة وحزنت وصرت ابكي ..وعطوني موعد نهاية الشهر ..ورحت وكنت خايفة انه يصير زي المره الأولى يكون كيس فاضي ..لكن كان فيه شيء داخلي يقول اطمني لا تخافين ..ودخلت والله يابنات احس قلبي بيطلع من صدري من النبض ..وشافت كيس الحمل وقالت شوفتي هذا الصغير هذا الجنين وفيه نبض بس خفيف لانه صغير..
طلعت والله من شعور آه يابنات اقول في نفسي الله انا بصير ام وصرت افكر في الاستقبال وافتح المواقع واشوف ملابس الصغار وقررت وش بلبسه اذا كانت بنت او ولد ..وعيدت مع اهلي وكان اجمل عيد في حياتي ياربي انا اشيل في رحمي طفلي يارب لا تحرمني ....
وجاء الموعد الثاني ..قلت الحين تقريباً ع نهاية الثاني واكيد بسمع النبض زين ..دخلت ع فلبينيه وحطت الجهاز ع بطني قالت انا ماشوف شيء مدام قلت كيف ماتشوفين شيء اكيد في غلط حاولت تسوي مهبلي وانا رفضت ..رحت عند السودانية في الغرفة الثانية قالت اشربي مويه
وشربت يابنات اللين كنت بنفجر .. ودخلت وياليتني كنت بغيبوبه وماسمعت الكلام اللي قالته قالت الجنين متوقف نبضه ونموه ع ست اسابيع المفروض اكبر ..آه يابنات شوفتي اللي ودك تختفين من الموجود ودك تهربين من الناس ودك تاخذين حزنك وتندفنين بقبر هذا كان شعوري طلعت من عندها ..ودموعي شلال ما اقدر امسك نفسي ابد امسح الدموع واقول يارب اربط ع قلبي لكن مافيه فايده دخل زوجي لدكتور وكان واقف ويتكلم بأسرع ماعنده ..قال كل شيء تمام والجنين مافية شيء خذي مغذية فتامين والمره الجاية تسمعين النبض ..طبعاً يتكلم بسرعة يبغى يطلع يعني مالاحظ الفرق بين الاشعه الأولى والثانية ..وانه مافيه تغير..رحت لطبيه ثانية قالت تعالي بعد اسبوع وتشوفين نبضه ..قلت يعني الوضع عادي قالت عادي ..مر اسبوع ورحت انا وامي وزوجي المحترم مسافر اخذت امي ورحنا وشافت السونار ومازال ٦ اسابيع ..وهنا تلاشى كل الأمل والأحلام والانتظار..والله يابنات اني تمنيت في هذي اللحظة اموت ..خلاص مابغى اعيش خلاص تعبت ودي اهاجر لمكان ماحد يعرفني فيه ....
الجنين مانزل بالأعشاب وانا تعبت وموعدي الاسبوع القادم اسوي تنظيف ..
دعواتكم لي