هلا ياعضوات حواء
يااحلى عضوات في العالم كله (( للواسطه ))
اليوم جبتلكم قصه من تأليفي عن واقع عايشينه طبعا مو الكل بس للاسف موجود
وهو الواقع اللي عاشه سعود مع امه
واتمنى انه يعجبكم الحبك
طبعا الموال الصباحي اليومي في بيت ام سعود
الام : يولد قووووووووووم قوووووووم قامت عليك القيامه (( وكأن القيامه لقامت بتقوم عليه لحاله ))
الشمس طلعت وانت لسا نايم متى بتروح للمدرسه
سعود : يمه الله يخليك خليني انام لسا بدري على المدرسه
الام : وووووووووووووجع نومه مامنها قومه ان شاء الله قول امين
سعود امييييييييييين
وطبعا الجيران تعودوا على هذا النشيد الصباحي واذا ماسمعوه مع كل صباح يعرفون ان ام سعود ماهي فالبيت او صاير عليها شي لا سمح الله
ويصحا سعود من النوم ويغسل ويتوضا ويصلي
يممممممماه (( هذا سعود ينادي امه ))
امه : ووووووووجع وش بلاك تصارخ مع الصبح
سعود : ياسبحان الله انا اللي اصارخ
امه وش قلت
لا يمه سلامتك اقول صبحك الله بالخير
الخير من الله ماهو من عندك
كل شي من الله يمه
المهم يمه وين الفطور
وشهوا مابقي الا هي وراك ماتروح وتسويلك سندوتش وتاكله ترا مانت بزر ولا لاروحت المدرسه تفطر فالفسحه
((مع العلم ان سعود في الصف الخامس الابتدائي))
يالله يالله عجل على المدرسه ذحين تبدا الحصه وانت ماروحت
ويحب سعود على راس امه
مع السلامه يمه
يالله يالله عجل على المدرسه
وماتصدق ام سعود ان سعود يروح المدرسه وتحط عبايتها على راسها ودور من بيت لبيت تقهوى عند ام عبد الله و تفطر عند ام خالد وتشرب الشاي عند ام حسن وتغدى عند ام ياسر وتقيل عند ام محمد
ويخرج المسكين سعود من المدرسه مايلقى امه فالبيت (( طبعا حال تعود عليه )) ويسويله سندويتش زي الصبح وياكله ويتفرج في التلفزيون شوي وينام
يصحى سعود من النوم ويصلي العصر وبعد العصر تجي امه ويقوم سعود ويحب راسها
هلا والله يمه
هاه وش تغديت
يمه صلحتلي سندويتش
وانت يمه وش تغديتي
والله انا حلفت علي ام ياسر مسويه هذاك المرقوق اللي يحبه قلبك واني استحيت اردها
بالعافيه يمه
ويروح سعود لغرفته ويجي لامه ويقولها يمه قفلي عيونك
يمال الوجع شايفني عميا ولاماشوف اخلص هيا وش عندك
يمه هذي شهادة تقدير عطوني اياها في المدرسه
وعلى ايش عطوك اياها من زين شكلك علشان يعطونك شهاده
يمه عطوني ياها علشني متفوق فدروسي
ااااااااااااااااااااااااااااااه
وريني اشوفها
من زينها عاد اللي معطينها لولد عمك احسن منها
يمه انا الاول على فصلي علشان كذا اعطوني اياها بعدين ولد عمي فمدرسه خاصه وانا مدرستي حكوميه
والشهادات اشكالها تختلف بس معناها واحد
يعني انت جبته من نفسك هذا علشان انا وراك اصحيك كل صبح لو ماهو انا ماتروح للمدرسه
جزاك الله خير يايمه
يمه ايش رايك علشان اخذت الاول على فصلي قولي لبوي يمشينا والله طفشت من جلست البيت
وراك ماتقوله وش بينك وبينه
يمه ابوي يعصب علي انت قوليله احسن
ايييه هين ولا انا ماقوله كلمه الا قال تم خل ابوك فحاله وانا فحالي
ليه يايمه حنا حتى على الاكل مانتجمع
انت تخرجين وابوي يخرج وماشوفكم كثير
ويقولها يمه دام مافيها خرجه خلينا نطلع فالحوش ونشب النار ونشوي ونصلح شاي
الام انا اليوم معزومه على العشاء عند ام ناصر (( اللي هي زوجة عمه )) مسوين عشا لولدهم علشان جاب الاول على فصله
انت ودك تشوي اللحم عندك فالثلاجه توه العيد وخير الله كثير هاه بس لا تلعب فاللحم
سعود يتمتم لا يمه انا قلت نتونس مع بعض
انا رايح العب كوره مع العيال في الشارع
الام : روح
وييروح سعود ويلعب كوره مع العيال
اذن المغرب ورجع سعود على البيت وغير ملابسه وتوضا وراح للمسجد يصلي
بعد الصلاه رجع للبيت وذاكر دروسه وبعد ماصلى العشاء راح مع امه وابوه لبيت عمه
وبعدين رجعوا لبيتهم ونام سعود
ومرت الايام على هذا الحال وكبر سعود
وفيوم وهو فالمرحله الثانويه دخل على امه المطبخ
يمه وش مزينتلنا عشا
وووووووووووجع ماتفكر غير فبطنك
وراك ماتساعدني بدل مانت واقف
ولا ودك تطفح وبس
ويسكت سعود شوي ويقول
يمه انت ماتعرفين الحنان
منهي منهي منهي
عساها ماهي حنان بنت عمك
وراك تسال عنها ولا ودك نخطبها لك
فكر فالشغل اول وبعدين فكر فالخطبه والزواج
واصلا حنان وامها متكبرات مايرضن بك
لا اله الا الله
ذحين اللي طرا الخطبه والا الزواج منهو
اقول يمه انت تعرفين الحب
وشهوا حب الشوربه تلقاه فالدرج هنا بس ماقلتلي وش ودكك به
سعود هاااااااااااااااااااااااااه
بحطه للعصافير دايم اسمع اصواتهم على الشباك قلت اكسب فيهم اجر
وخلص سعود المرحله الثانويه بتفوق وجاب نسبه عاليه وقال لامه
انا مادام جبت نسبه زينه ابغى ادخل طب بس المشكله ماعندنا هنا طب ولازم اقدم فمدينه ثانيه علشان ادرس الطب
الطب الطب وشهوا
يمه يعني اصير دكتور
روح روح روح
علشان جاراتي يقولولي ام الدكتور سعود هذا اذا جبته شكلهم بقفلون الجامعه اللي انت بتقدم فيها
ودخل سعود الجامعه فالجامعه تعرف على صالح اللي صار صديقه الصدوق اللي مايقدر يستغني عنه
قام سعود يحكي لصالح عن حاله مع امه وضطهاداتها له وانه دايم يهدي نفسه ويقول اصبر يولد هذي مهما كان امك
وانه كثير فكر ينتحر بسبب تعامل امه معاه وكان صالح يهديه ويذكره بعقوبة الانتحار وعذاب الله
وفي يوم من الايام وسعود نازل من الجامعه لمدينتهم صار عليه حادث ودخل العنايه المركزه وجلس فيها شهر مايدري عن شي
كانت تجيه امه وطل عليه وهي تصيح على حال ولدها وتدعي الله انه يخليه لها
طبعا سعود لا يسمع ولا يشوف
بعد شهر الدكتور خرج سعود لغرفة التنويم قال وضعه مستقر ومايحتاج العنايه بس لسا مافاق
ماصدقت امه انه يحطونه فغرفه علشان تكون جنبه وتشم نفسه على قولها
كانت دايما تصلي عنده وتقرا عليه و تدعيله ان الله يقومه بالسلامه
جلس فالتنويم عشره ايام وامه مافارقته ولا لحظه وحده
وفي يوم كانت تردد
قوم ياسعود ترى حالي كسيفه
قوم ياسعود شف حالي بلياك
ياسعود النوم ماصرت اهتنيبه
كل مافي يا يمه يتولع للقاك
انت غذا القلب وانت طبيبه
ياجعل ياسعود المنايا تخطاك
وفي هذا الوقت فتح سعود عيونه وسمع كلام امه وتبسم وقال انت امي
وتقوم امه وتحب راسه وتلمس جسمه وتصيح ماهي مصدقه نفسها ان ولدها قام وكلمها
وتشافا سعود وخرج من المستشفى
وعاش سعود مع امه ايام غير
الايام اللي كان يحلم بها
ويتخرج من الجامعه ويصير دكتور
ويتزوج بنت عمه حنان
وخلفوا صبيان وبنات
وسكن امه معاه
الختام
لا حظتم معاي ان سعود كان مقدم طاعة الله على كل شي
وانه كان بار بامه مع الجفا اللي كانت تعامله به
هذا هو سبب تفوقه وسعادته الاخيره
ان الام لا تحمل لابنها او بنتها الا الحب لاكن بعض الامهات يخفون هذا الحب ومايطلع الا لصار لولدهم اوبنتهم شي
يلزم عليك تسجيل الدخول أولًا لكتابة تعليق.
رووووعة ....انتي مبدعة....يا بنت البحر
تسلم خالدية ...يوم طلعت ...مواهبك
اسلوووبك يعجبني...وقصتك كان لها هدف ...وهذا الاحلى فيها
وهدفك كان ديني ...يعني ...تستاهلييين التميييز...
في انتظااار جديدك....ترانا طماعييين
تسلم خالدية ...يوم طلعت ...مواهبك
اسلوووبك يعجبني...وقصتك كان لها هدف ...وهذا الاحلى فيها
وهدفك كان ديني ...يعني ...تستاهلييين التميييز...
في انتظااار جديدك....ترانا طماعييين
الصفحة الأخيرة
وفالك البيرق والمليون وصح لسانك
يااااااااارب تفوزين