قصة من قصص فضائل الصدقه

قصه واقعيه عن أثر الصدقه ،،،
السلام عليكم ورحمة الله وبركاته ..
طبعاً بطلة هذه القصة أنا ( والعياذ بالله من كلمة أنا )
في عام 1428 كنت معلمه في قريتنا ومسكني بيت اهلي اللي في القريه
واهلي مقر اقامتهم الاساسي في جده .
المهم كانت معلمه غير متزوجه تسافر يوميا مع بعض المعلمات
من جده للمدرسه تقطع 300 كم .
عرضت عليها انها تسكن معي بما اني ساكنه وحدي وننزل اسبوعيا فوافقت ع طول وسكنت وتونسنا انا وهي ..
في مره قالت نفسي في المكرونه اللي تعمليها اش رايك تعملي صينيه نتعشاها ونتغدها بكره عشان حنرجع هلكانين وما فينا نطبخ قلت خلاص المهم فتحت الثلاجه لقيت كل شيء الا الجزر
طبعا مافي احد يجيب لنا واصلا خلاص ع آخر اسبوع في الامتحانات ما نشتري نخلص العزبه الموجوده .
قمت انا الفالحه فتحت باب الشارع ولقيت بنات الجيران قلت لوحده روحي سلمي ع امك وقولي لها تعطيك حبه جزره لا تكثر!!
بعد شويا دقت البنت الباب وجابت 4 جزرات كل جزه اكبر من الثانيه وقالت لصاحبتي تسلم عليكم امي وتقول اعطوها من العشاء اللي سويتوووووه!!
جات صاحبتي مبتسمه واعطني الجزر وقالت لي الكلاااام!!
طبعا انا جن جنوني وعصبت قلت : ياسلام دحين يوم عرفوا انو سوينا أكل طلبوا
ولا احد يسأل عننا ومن ذا الكلام!!
صاحبتي قالت حراام نديهم قطعه!!
قلت مافي !!
وما اخذت وقت الا المكرونه استوت ودخلتها غرفة نومنا واديت صاحبتي منها قطعه وانا طبعا نفسي انسدت
ووجهت المكيف ع المكرونه عشان تبرد والفجر قبل ما نروح المدرسه ادخلها ع الفريزر!!
المهم قفلت باب المدخل بالمفتاح وباب الغرفه كمان بالمفتاح!!
وسحبت المفتاح ومو عارفه فين رميته كله ذا من القهر!!
وجلست ع السرير افكر وشويا قلت لصاحبتي اش رايك نديهم قطعه !!
قالت لااااا محد يسأل عننا ونفس موالي ردته ليا!!
قلت خلاص شويا قالت صاحبتي حرااام نعطيهم قطعه والله العظيم ذا اللي صار
قلت لا وعدت نفس المواااال
وضحكنا بعدها قلت خلاص نستشبر صديق ونآخذ بالرأي!!
قالت موافقه اتصلت ع اختي الكبيره وحكيت لها السالفه !!
ردت وقالت حرااام اكيد مستنين العشاء مو انتِ ما تبغي اديهم قطعتك او اديهم حق بكره انتِ ماتدري يمكن تتغدوا في المدرسه واعتبروها

( صدقه ودفع بلاء عنكم )!!

سمعتها صاحبتي لاني مشغله الاسبيكر بعد ما قفلت قالت اختك هبلا كيف
نديهم وبكره نجي تعبانين ومن ذا الكلام..
قلت احنا اتفقنا نستشير صديق ونآخذ برأيه قالت طيب خلاص
اتصلت ع الحرمه وقلت شويا ارسلي بنتك العشاء حيجهز فرحت وقالت طيب لا تكثروا بس احنا نبغى نكمل السفره!!
اخذت الصينيه وفتحت باب الغرفه تخيلوا اش سمعت!!



قسما بالله سمعت صوت قال ( تِك ) وعرفت الصوت رحت اجري تتوقعوا اش لقيت!!



لقيت المكوى مشبوك وعلى أقوى نمره (6) ومسكت المقبض ولقيتو مووووولع
طبعاً المكوى ناشونال القديييييييم اللي يفصل من لحاله ويرجع يشتغل لونه ابيض وثقيل ( بالوصف الممل )

تعرفوا من متى ؟
احنا دايم نشغل سورة البقرة في البيت وشابكينو في التوصيله ومعاها المكوى صاحبتي كوت ملابسها ما تقفل العيار بس تسحب التوصيله لانه مو متعودين عليه !!
فلما شبكنا التوصيله عشان نسمع سورة البقرة اشتغل المكوى وما انتبهنا وع آذان المغرب كملت السورة وقفل المسجل من وحده!!
انا في المطبخ اجهز وصاحبتي جالسه تحضر ومشاغيل وصلاة العشاء قفلنا ابوبنا وانوارنا ودخلنا غرفتنا نتحاور في المكرونه!!
ما عرفنا ان صدقتنا اللي كانت ماراح تتم هي سبب نجتنا!!
من خلف الكواليس :
طبعاً بيتنا شعبي والسقف خشب تخيلوا لو انحرقنا بسبب المكوى!!
انا رميت المفتاح ولو لا قدر الله انحرقنا مافي احد ينقذنا لانه الكهرباء حتنطفي ومع الدوشه ماراح اعرف مكان المفتاح!!
من الطمع اللي فينا وللامانه والله الحرمه اللي اعطتنا الجزر ما تقصر معانا وكل فتره والثانيه ترسل بنتها وتقول امي تسلم عليكم وتقول تبغون شيء من السوبر !!!
انا وصاحبتي حمدنا الله ع سلامتنا وقلنا هذا بفضل الصدقه اللي ما كنت حتتم بصراحه ربي ما الهمنا سجود الشكر كان سجدنا شكر له!!
وتخيلوا اليوم الثاني وحده من المعلمات من بنات القريه اهلها طبخوا غداء وشغالتها طبخت غداء فأعطتنا من الغديين ( سبحان الله الرازق في السماء والحاسد في الارض)
و على فكره الشبكه كانت جدا سيئه والاتصالات صعبه وفي الغرفه اللي نحنا فيها لو اموووت مافيها أي برج لو ألف الغرفه كلها بس سبحان ربي سخر لي الاتصال عشان يوريني أن الانسان شجع وطماع والصدقه تطفئ غضب الرب..

وسلامتكم وسامحوني ع طولها بس بصراحه كانت درس ليا
لا تفكروا همس طماعه بس الشيطان شاطر هههههههه
والسلام عليكم ورحمة الله





منقول