قصة وحده قرأت سورة البقره خلال 40 يوم تعالوا شوفوا كيف حياتها تغيرت وصارت للأحسن

LAYAL. • 9 سنوات

كمملي

ما اقدر اهوى غيرك • 9 سنوات

كملي ربي يوفقك ويسعدك

anan1919 • 9 سنوات

يوميات اليوم 20-29

خذت اجازة يزمين من الدوام عشان اطلع اليهال شوي.. (اوني الخاله الطيبة)
وسويت بلان لهم.. قلت يوم الاربعاء بودي اموي الجمعية عشان تاخذ اغراض البيت.. وبقص على اليهال اونها حديقة..يلا سيروا لعبوا..لول بس اللي صار ان امي راحت مع اختي العودة يشترون اغراض حق بيتها.. واختي الثانية بتطلع مع ريلها.. وانا سووني البيبي سيتر!!!! (ربيتهم ونسيتهم... والله اهلي مستغليني استغلال سيئ)

ومن خطة الجمعية الى جليسة الاطفال.. اقصد الوحوش

وتعالي يازووز1 ومرة ثانية سمعي سوالف اليهال المملة وسمعي نكتهم اللي انا يوم كنت ياهل اقول نكت احلى..لول.. اونه خالو خالو (انزين ليش مرتين خالو!!.. قولها مرة) بقولج نكتة.. مرة انا وابوي رحنا الحديقة واشترا لي حلاوة وسوينا مادري شو وركبنا السيارة...وبعدين مادري وين رحنا هاهاها...

ايه وين النكته؟؟ هاي قصة مش نكته!! لو تنطب وايد احسن

اكتشفت ان تربية اليهال صعبة..! شربي النونو حليب ورقديها..واربعي ورى اليهال عشان يحلون الواجب وعشيهم وسمعي سوالفهم ولعبي معاهم..هذا جزء بسيط من الاشياء الثانية.. عشان جي الجنة تحت اقدام الامهات.. الله يعطيهن العافية

المهم يلسنا نحل الواجب.. اتصدقون اتطورت المدارس عن ايامنا..صاروا يطلعون الواجب من الانترنت.. مب مثل ايامنا.. من الكتاب نفسه لول.. اول مرة اعرف هالشي.. بنت اختي يت تسألني منو من العلماء العرب سووا اختراعات افادت الناس؟!
هاه!!! انا ما اذكر البارحة شو متعشية.. تبيني اتذكر منو المخترعين وشو اختراعاتهم... يلا نسوي بحث في جوجل الله يطول بعمره.. وطلعنا الاسماء والاختراعات.. والله كشخة اتذكرت اشياء مال ايام المدارس

يلا دور الولد.. سير هات كتبك وحل الواجب.. ما عندي واجب.. عن الكذب.. وبظرابة ياب الكتب وطلع في واجب انجليزي مخشوش!
ما عليه يا مسود الويه بتحله وريلك فوق راسك.......

خالو كيف ريلي فوق راسي.....

ما اعرف هذا مثل صيني يالبغام!!..(وصدق الولد السالفة...لول)

والله فديت البنات مؤدبات ويسمعن الكلام مش مثل الاولاد حشرة ومشاكل... بظرابة لين حل الواجب
و اول ما خلص..سألني تعرفين تيولين؟؟ ..
هاه.. ليش رقاصة قالوا لك!! ..
طاع هذي ..يولة..يووووولة...

يلا روني انت..
انزين انا بروح اييب عصى وبراويج... اوكي

وشوي الا هو داخل بشو؟؟؟؟ .. اداة مميزة لليولة... جديدة في الميدان ولا يعرفها الكثير..
العصى مالت المخمة!!! اللي نخم الوسخ في البيت... ياب عصاتها وبيووول!! ههههههه
وبدت اليولة .. وصارت المنافسة بينه وبين اخته.. منو بيفوز باللقب لين جائني اتصال من امهم.. رقدوا اليهال؟؟
لا بعدهم..
.شووووووه!!! الساعة 9:45

انا بعد ما يا في بالي ان الوقت متاخر عليهم!! يلا قوموا.. يلا وقت الرقاد.. لا نحن نخاف نرقد بروحنا.. وسرت يلست مثل الحارس لين يرقدون.. وطبعا بظرابة وتهديد ووعيد رقدوا.. افف.. رقدوا هذول من صوب ونشت النونو من الصوب الثاني.. ويلا سكتيها ولعبيها وشربيها حليب.. وسوت كاكا.. طبعا انا ممكن اسوي كل شي الا اني اغسل كاكا.. نووو واي
واول ما يت امها.. عقيت عليها بنتها عليها ورحت ارقد

ثاني يوم خذت نقاهة من البيت (تعبت.. كنت جليسة اطفال كم ساعة.. لازم ارفه عن عمري شوي) طلعت مع ربيعاتي واستانسنا وسولفنا وضحكنا...

ثالث يوم اللي هو يوم الجمعة.. قلنا يلا بنروح القرية العالمية وطلعنا جيش..ورحنا للقرية.. نصيحة محد يروح القرية مع اليهال.. لانهم حشرة وما يخلون الواحد يتشرى على راحته
بغيت امر على وايد قرى وما لحقت..بس الحمدلله استانست فيها

وردينا البيت وحطيت راسي ولا حسيت بالدنيا
حتى ما اتذكر شو حلمت.. شكلي ما حلمت شي من التعب..

ملاحظة: لاني خذت اجازة وكنت مسوية خطط طلعات وروحات وييات.. كنت ابدا قراءة سورة البقرة على الظهر.. مرات الضحى ومرات اول ما انش.. يعني لازم اطلع ساعة فراغ واقفل باب غرفتي واقرى السورة عشان ما انشغل وتروح علي

ياتني علوم من بعيد ان اهل الريال مرة ثانية ماطلوا (ابا اصفعهم..لول).. وهذا الشي ضايقني وايد وحسسني بالنقص.. سألت عمري..انا شو ناقصني؟ وبديت افكر بسلبية.. بس بعدين رديت استغفر ربي اقول يارب انت اعلم بما في نفسي.. اللهم ارزقني الخير حيث ما كان.. اللهم انك رحيم فارحمني ويسر امور زواجي من هالانسان ويسر امور زواجه مني
طبعا هذا كله كان في نفسي وما اتكلمت فيه جدام اي احد لا اهل ولا صديقة ولا اخت.. وحتى يوم طروا السالفة سويت عمري عادي وانا من داخلي متغصصة.. فكرت قد ما اقدر بالمنطق وقلت ترى كل شي قسمة ونصيب.. واذا لي نصيب باخذه بس بعد.. ما بفقد الامل ان ربي حاط لي الخير واكيد قرب وقت هالخير

اختي العودة ربت (عقبال البنات اللي ما حملن لين الحين.. الله يرزقهن الذرية الصالحة اللي تكون لهن قرة عين..يارب).. ويوم رحت ازورها في المستشفى قالت لي دعيت لج وايد (الله يستجيب)

يوميات ال30-40

لاني كنت متضايقة.. قمت اطبخ اطلع ضيقتي بشي مفيد وايجابي ابرك من الشي السلبي ترى في النهاية بيرد علي.. جان اسوي هاك الخمير اللي نصه تحول مناقيش..لول.. بس كلوه..حتى امي تسألني كيف سويتي المناقيش.. لول (مسكينة ما تدري انه المفروض يكون خمير...لول)

حصلت كورس وطلعت اسبوع.. ارتحت من الدوام وهمه وابتعدت عن الكل.. كنت متضايقة من سالفة المماطل.. بس رتبت وقتي بحيث اني اروح الكورس وارد.. اصلي.. اقرأ سورة البقرة.. اشل عمري واطلع اخلص مشاويري واسوي شوبينج حق البيبي ولاختي.. وشريت لامي هدية حلوة عشان تستانس.. (والله فديتني فنااااانة

الحمدلله مر الاسبوع على خير وهدت نفسيتي وحسيت ان ما شي يسوى الزعل.. وفكرت وايد.. جلبت الموضوع من كل صوب عشان هالانسان.. انا صح اني اتمناه لي بالحلال وكزوج وليس صديق او عشيق.. انا نفسي اسمى واجود من هالشي والحمدلله والشكر.. بعد هذا لا يعني اني اعلق نفسي بامال واحلام قد تتحقق وقد لا تتحقق.. قلت انا بكون عادية واذا حد غيره دق الباب.. ما بقول لا حتى لو انا ميتة عليه.. بس عصفور في الايد ولا عشرة على الشجرة. وانا مش ناقصني شي الحمدلله (يارب لك الحمد على النعم اللي عطيتني اياها سواءا شفتها وعرفتها او ما عرفتها)
الكورس مر بهدوء وما خليت شي وا اشتريته لليهال ولأهلي..

ومرة ثانية ياتني هفة طبخ.. قلت بسوي حركة جديدة بالخمير.. جهزت عجينة الخمير (وحدة من بنات المنتدى الله يجزيها الخير.. عطتني المقادير) وزدت عليها سموكدت بيبروني مفروم smoked pepperoni - وجبنة شدر sharp cheddar cheese - مبشور وخليتها تتخمر.. وطلعت يممممممم (الله يجزيها الخير اللي خذت المقادير منها..) خمير بالببروني والجينة يم يم

ثاني يوم سويت كب كيك الجزر.. ضبطت معاي مية بالمية.. وايد استانست والنفسية صارت احسن الحمدلله.. وتابعت قراءة سورة البقرة..

وحلمت اني حامل وولدت!! وحملت مرة ثانية وولدت!! انا اللي اعرفه ان الحامل في الحلم هي حامل هم والله اعلم..!

ثاني يوم حلمت ان بنت اختي سوت كاكا على ايدي (يعي) وركضت عند المغسلة عشان اغسل ايدي بس ما اذكر بعدها شو صار

تعرفون شو العلوم اللي وصلتني؟؟ ان اهله سألوا عني.. والحمدلله وصلتهم أخبار طيبة عني (وجــــــــــان استانس).. الحين فيني فضووووول اني اعرف شو استوى بس ماسكة عمري حيل.. ثقيييييلة يازووز1.. يا خبر اليوم بفلوس.. بكرة يكون ببلاش.. معقولة اتيسرت؟؟؟
معقولة في مجال انهم يوافقون؟؟ دعواتكم يا بنات

اليوم اخر يوم.. كملت 40 يوم وانا اقرأ سورة البقرة.. الحمدلله في خلال ال40 يوم وايد اشياء صارت.. معظمها كانت حلوة بس الشي الاكبر هو الراحة النفسية اللي حسيت بها.. هذي عندي تسوى كل شي.. الحمدلله مرتاحة وايد وهادية اعصابي بعد ما قريت هذي السورة العظيمة..اتيسرت اموري وايد في كل شي..حتى اذا اطلع مكان زحمة احصل باركنج بسرعة..ممكن يكون هذا بسيط بس يسوي فرق بالنسبة لي..

الحمدلله يارب على نعمة الاسلام

انا محظوظة اني عرفت قدر هذه السورة.. كنت مخططة ان اقرأ السورة ل40 يوم بس الحين خلاص ما بوقف باذن الله.. بتم اقراها كل يوم بعد ماحسيت بالفرق قبل وبعد..وبتم ادعي وادعي لانه في النهاية بيرجع لي..

اخواتي خذيها نصيحة من اخت غريبة.. ما اعرفج ولا تعرفيني.. ما اعرف شو همج ولا اعرف شو في خاطرج ولا اعرف شو كربتج او شو امنيتج..بس اذا تبين راحة البال والسكينة.. ابدي قراءة سورة البقرة.. مافي شي يسوى راحة البال

طويلة.. هيه طويلة اول كم يوم بس بعدين من كثر الاعادة تحسينها اقصر واقصر واقصر.. بتتعودين وبتصير جزء من حياتج مثل الصلاة.. اذا ما صليتي تحسين في شي ناقص او في شي غلط..
جربي القراءة لمدة اسبوع بس.. ساعة كل يوم.. ترانا نقضي اكثر من ساعتين ونحن نحش ونغتاب وانم على الناس.. وكم ساعة انطالع تلفزيون وافلام وام بي سي ومسلسلات..ألخ

نروم نقضي ساعة نقرأ فيها هذه السورة العظيمة واول ما نخلص نرفع ايدنا للسماء وندعي لبعض..

الحمدلله انا مانسيت اي وحدة من الاخوات اللي طرشن لي اساميهن.. اخر دفعة اسامي ياتني عالخاص كانوا الاخوات: منال..نوال..فاخرة.. شيخة..عايشة.. نيرمين..مروة

الله يحقق لكل وحدة مرادها واللي ما عرسن ان شاء الله اييها ولد الحلال اللي يصونها عاجلا غير اجل واللي ما حملت بعدها..الله يرزقها الذرية الصالحة اللي تكون قرة عين لها عاجلا غير اجل ويرفع كربة كل مكروب ويسر امور كل مهموم

اشكر كل الاخوات اللي دخلوا موضوعي وشجعوني لو بكلمة وحدة ودعوا لي عن ظهر الغيب.. الله يجيهن الجنة يارب

انزين بس خلاص..سويتيها فيلم هندي حشى.. جلبي ويهج

'طبعا انتوا شفتوا الخيرات اللي جتها بفضل الله ثم بفضل هذي السوره العظيمه وبدأت ولله الحمد تنخطب يعني انفكت العقده عنها وهي بشاره طيبه الان لازم كل وحده تعقد العزم وتتوكل على الله لان الواحد ما يدري البلا من وين جاي '

إنزلوا تحت في الصفحه راح تلاقوا الجزء الثاني من يومياتها

anan1919 • 9 سنوات

معليش فاصل برى الموضوع :11::35:

قصتى مع سورة البقرة و 7معجزات صارت لي

بسم الله الرحمن الرحيم

و الصلاة و السلام على خير الانبياء و المرسلين
ارجو من المشرفات انهم ما ينقلون الموضوع عشان اكبر كمية تستفيد منه و الشق الايماني موجود بقوه فيها
بنات اول قولو ماشاء الله تبارك الرحمن ولا حول ولا قوة الا بالله العلي العظيم
صاحبة القصه حلفتني ما اكتبها لكم الا اذا ذكرتو الله تعالى
تقولي:

كنت مصابه اخر عشر سنين من حياتي بالامساك الدايم جربت كل شي ما نفع معاي شربت الحليب المركز لحاله اكلت البرتقال اكلت الفاكهه اخذت الملينات تعبت تعبت تعبت من الامساك الشديد و المزمن لدرجة و الله العظيم فقدت الاحساس بشعور الخروج اذا جاك ( عفوا) يعني ادش الحمام مدري ببول ولا اتغوط؟؟؟؟؟ لين الحمد لله ما ثبت على التحاميل و للاسف مو كل التحاميل القاها بالصيدليات ما ينفع معاي الا نوعية خاصه اضطر اوصى عليها احد اذا سافر
ومره اشتد الامساك علي و الالام ما ارحمتني تخيلو شربت قارورة زيت خروع كامله الخروع المخصص للشرب
اشربه و نفسي لايعه منه كنت اسكر خشمي و اشربه بسرعه تخيلو زيت ثقيل تشربونه مليت و تعبت قلت شهيتي
و مع الصدقات الحمد لله كانت نوبات الامساك الشديد تخف يعني كنت دايما من 10 سنين للحين بامساك دايم بس اوقات يزيد مره
و بالسنة 8 من الامساك شفت رؤيا ان احد يعطيني معلومه حسيته ملاك بس ماشفته و الامام النابلسي يقول الاحساس بالرؤيا اقوى من المشاهد يعني شي تحسينه اقوى من شي تشوفينه بالرؤيا المهم حسيت احد يكلمني و ينصحني بس ما اشوفه يقول لي الكيوي فيه شفائك او علاجك و بس و الله قمت و اشتريت الكيوي هذي الفاكهه ما كنت اكلها و سبحان الله
تعالى انهد بطني مثل السيل ماشاء الله تبارك الرحمن ولا حول ولا قوة الا بالله العلي العظيم و استمريت على الكيوي يوميا
لازم اكل حبه و اليوم الي يمر بدون كيوي اعاني فيه من الامساك و خروجي يتاخر و يصعب ( عفوا)
ومره قريت الحوامض مو زينه بالدوره فنويت اترك الكيوي على اساس اخذ دوا للامساك بس بالدوره

و قبل لا تجي الدوره التزمت البقره وكانت نيتي الاصلية تسهيل زواجي لاني اعاني من العنوسه بس كنت لما اقراها اخلي نيتي شامله للشفاء والوظيفه و الزوج الصالح و الذرية الصالحه و الهدايه بس اكثر شي للزواج المهم لاحظت الله تعالى صرفني عن اخذ الدوا مع اني كنت معزمة اخذه عشان لا اعاني من الام الامساك و استمريت اقرا البقره و القفازات علي
يوميا لازم اخلصها يوميا يعني ما اقسمها و ماشاء الله تبارك الرحمن خلصت الدوره و بطني كان يمشي طبيعي بدون كيوي و دوا؟؟؟؟؟ عرفت انها بركات البقره و انها مثل ماقال الرسول صلى الله عليه و سلم اخذها بركه ولاحظت ملاحظة قوية اني باليوم ال12 تقريبا قريت نصها لاني كنت مشغوله و لما جيت اخرج ما اخرجت
يعني الي تبي بركتها تخلصها يوميا
بركة ثانية لاحظتها اني اذا قريتها اسوي اشياء كثيره بوقت قليل يعني سبحانه يبارك بوقتي و بصحتي لاني بالعاده اذا دخلت المطبخ اسوي حلا او طبق رئيسي و باحد الايام لاحظت اني سويت حلا و طبق رئيسي و غسلت 3 انواع من الخضره و قريت الكهف و الجرايد هذا كله بنص يوم و بالعاده الاشياء هذي اسويها بيومين
بركة ثالثه كنت على قولة اهلي صرافه اي شي اشوفه يعجبني اشتريه رغم ان مصروفي قليل بس اغلبه بالسوق يروح
ولاحظت ان طلعاتي قلت مره للسوق و صرت لاول مره بحياتي اوفر فتحت لي حساب ووفرت لي ماشاء الله وين كنت ووين صرت
بركة رابعه لاحظتها ان نومي مقلوب بحكم اني مو متوظفه ولا متزوجه فعادي عندي اسهر و اقلب نومي بس الصراحه شفت الكثير من الطاعات تفوتني بسبب نومي المقلوب و دعيت الله تعالى ان نومي يتعدل و حاولت جاهده اعدله ما تعدل
ولما كنت اقرا البقره بفتره ما كنت ملتزمه فيها يوميا بس اقراها يوم و ثلاثه لا بس بركتها الحقتني حتى يوم تركتها سبحان الله شفت نومي يتعدل تدريجيا و صارت قومتي بالصبح و يا اخواني الموظفين لدرجة هم استغربو مني ماشاء الله تبارك الرحمن بركة خامسه : انا كثير احب القراءة و عندي كتب كثيره للحين ما قريتها و الصراحه كله من ادمان النت و خصوصا عالم حوا لدرجة احيانا اقعد بال8 ساعات باليوم على النت طبعا 8 ساعات متفرقه المهم لاحظت ادماني خف تدريجيا و الحين اقعد بس 4 ساعات ماشاء الله و خلصت 40 صفحه من كتاب جديد بس بيومين و انا اول الي اترجى نفسي ترجع للقراءة لو صفحه باليوم ماشاء الله
بركة سادسه: انا معروفه بالبيت اني ما اسمح لاي احد يتكلم علي كلمة رغم اني حليمه بس ما احب احد يقط كلمه علي و يروح يا اعطيه محاضره يا اتهاوش ما عندي حل وسط و الصراحه تعبت من النقطه هذي بشخصيتي لاحظت اول امس اخوي سوا موقف مو حلو حقي شفت روحي هادية و مسامحه و مطنشه فعلا لاول مره بحياتي اطنش من قلب مو تصنع او محاولة تعود لا تطنيش من قلب شفت روحي عاقله ثقيله و انا بالمواقف هذي اعترف خفيفه بركة سابعه: اني كنت اعاني من ادمان الاغاني و الحمد لله هداني الله تعالى ماشاء الله تبارك الرحمن و تركتها بس الواحد لابد يمر من غرفه و الاغنيه صوتها عالي و قلبه يميل فكنت اداري قلبي و اقوله احذر ترجع للمعاصي كنت اسال الله تعالى يكرهني بالاغاني و الحمد لله سبحانه كريم استجاب اكثر واكثر و اليوم طاولتي بعد ما كانت مليانه باشرطة المغني فلان و المطرية فلانه مليانه بالأناشيد و محاضرات دينية و اشرطة قرآن
بس الحمد لله البركات قاعده تزيد و تزيد باشياء ما كانت بالنية وو الله و اشوف ربي يحققها لي لكن السؤال هل استمر و اتعظ ببركات البقره او اتركها اذا اخلصت حاجتي؟
اسال الله تعالى انه يحببني بالقران اكثر و اكثر

هذي قصتها رويتها لكم باسلوبي
و بدوري اقول حق كل بنت و حرمه و انسان اذا تبون اي شي اتجهو لمعطي النعم لا تعلقون قلوبكم بالناس لا تقولون انا عندي واسطة وظيفتي بالجيب ولا تقولين ما عندي واسطه بظل عطالية طول عمري اتجهو لله تعالى كثير ناس سمعت عنهم انهم توظفو بدون واسطه الي تبي زواج ترا سهل بس الابتلاءات ربي يسويها ليش؟ عشانه يحبنا و يبينا نقترب منه تعالى و الدعاء هو الشي الوحيد الي نكلم الله تعالى فيه الجاو يا بنات لله معطي النعم عندك مشاكل مع زوجك حمولتك عيالك مجنينك مراهقين اتعبوك شغالتك ما تسمع كلامك فلوسكم مافيها بركة قاطعه رحمك فيه طبايع مو حلوه و تعبتي منها حساسة زياده عن اللزوم عندك رهاب اجتماعي و ترجفين اذا خالطتي الناس عندك الام ظهر تاتاة صداع سحر عين نفس مس امراض عضوية وراثية مشاكل للبشره و الشعر تبين صديقه حقيقة مو لاقيتها تبين صحبه صالحه تبين جيران تزورينهم ويزورونك اتجهي لله تعالى تبين وظيفه رزق اتجهي لله تعالى انتي احسن من الي عندها واسطه هذيك توظفت بالواسطه ولا تقربت لله تعالى انتي عندك فرصه تتقربين لا تكرهين الابتلاءات و تتاففين اصبري لان الله تعالى يحب الصابرين يا حظك بكره تدخلين من باب الصابرين بالجنة اصبري و توكلي على الله تعالى لا تقولين تخصصي مليانين منه وعجزت و الوظيفه ماراح تجي اعرفي ان اذا اشتدت المحنه الشيطان ينشط اكثر ما يكون و يوسوس لك و تتركين الدعاء و اليقين بالله فيروح رزقك منك الفرج مثل الحلقه الي ماسكينها اثنين و يشدون فيها و يشدون و يشدون بعدين تفرج لانها ما تحملت الشد كذلك الشيطان مصيره يياس منك اذا شافك مستمره بقوة املك و حسن ظنك بالله يروح عند لغيرك
خليك مع الله تعالى يكون وياك خلي قلبك ابيض نظيف حلو اذا سمعتي واحده توظفت سواء بواسطه ولا غيرها افرحي قولي الله يبارك لها الي عطاها بيعطيني ازود خليك ايجابية شوفي النعم الي عندك يكفي الامن و الاستقرار شوفي معاناة اهل مصر الله يكون بعونهم
اذا متاخره عن الزواج تاكدي الله تعالى اصرفه عنك لسبب و هالسبب فيه الخير لك روحي المحاكم بس يوم واحد بتشوفين مصايب الحريم و كل واحده لو سالتي قلبها وش لونك بيقول لك اه يا ليت يرجع الماضي و ارجع معززه مكرمه ببيت اهلي شوفي المعلقات الي صار لهم سنين معلقين لاهي طايله سما ولا ارض شوفي المطلقات الي عيالهم بعد ماكانو باحضانهم انوخذو منهم بغمضة عين مو كل من تزوجت انسعدت كثير من النساء ودها الماضي يعود و تظل بدون زواج اريح لها ولا تجيب عيال يكونون سبب عذابها الله يفك عوق كل مطلقه و ارمله و معلقه و بنت
مريضه لا تعلقين قلبك بالشيخ الفلاني و تشدين الرحال له و تكلفين اهلك سفر و فنادق الشيوخ وسيله لكن الاصل ان الواحد يرقي نفسه لاباس الواحده تروح اول مره للرقاة يعلمونها تفاصيل الرقية الصحيحه بس اذا هي تقدر ترقي نفسها الافضل هي و فيه حالات ما يقدرون يرقون انفسهم لان العارض الخبيث الي فيهم اقوى من احتمالهم هذولي محتاجين دايما للرقاة اسال الله تعالى انه يعجل بشفاء كل مريض
ما عندك عيال و قلبك يتقطع على كلمة ماما اتجهي لله اكفلي يتيم و سميه بينك و بين زوجك بالاسم الي ودك تسمين ولدك فيه عيشي الحقيقه هذا ولدك باحساسك عطفتي عليه و كفلتيه و بفلوسك القائمين على تربيته جابو له لعبه و لبس جديد و جزمه جديده بالعيد حسي بامومتك مع اليتيم و بتشوفين نفسيتك كيف تتعدل لان النفسيه لها دور بتاخر الانجاب
باختصار اخذو البقرة و التزموها كلام محمد عليه الصلاة و السلام ما جا من عبث لانه ما ينطق من كيفه رغم بلاغته ينطق من وحي الله تعالى الي خالقنا ادرى بالي يصلح لنا ايمانا بروحه ما يكفي لازم من العمل لازم من التطبيق اجل وش الفرق بين الي يؤمن بالله و يستعين بكلامه و بين الي يؤمن وما يطبق مثل الي يدرس عشان ينجح وواحد داخل على البركه هذا اغلب الظن بيسقط بالاختبار لانه ما بذل السبب الاول توكل و الثاني تواكل
البركه بتنوجد اذا انوجدت اسبابها و البقرة من اهم الاسباب ولزوم الصبر ايضا من اقوى الاسباب و هو الصبر من غير شكوى

قاعدين نقرا كل يوم قصص بنات و تجاربهم و بنفس الكلمه متحدين كلهم يقولون صارت لي المعجزه الفلانية و الفلانية
فهل نتعظ ارجو ذلك و ان الله تعالى يوخر عننا الكسل و صدأ القلوب و نحبه مو بس باليقين بالعمل

ادعو لصاحبة القصه يعجل الله تعالى بزواجها و شفائها و رزقها بكل خير

رابط الموضوع بعالم حواء
http://forum.hawaaworld.com/showthread.php?t=3774391

anan1919 • 9 سنوات

طبعا انا بعد ما خلصت قراءة سورة البقرة حسيت بشعور راحة نفسية كبيرة الحمدلله..

كنت اسمع من وايد بنات انهن يحلمن باحلام مب زينة مثل جن وحد يقول لهن لاتقرين السورة..ألخ بس انا ما واجهت اي من هالاحلام والحمدلله وهذا يعني ان ما علي عين او سوا او حسد.. (مع اني قبل كنت اتحسب ان فيني عين)

عقب الاربعين يوم.. قلت باخذ بريك كم يوم وببدأ من اول وجديد.. وقولوا شو صار فيني يوم وقفت..

1. مسكتني عصبة في رقبتي وتمت تعورني يومين..(اي صدق تعور) وما رمت احرك رقبتي
2. الريال اللي اهله كانوا على وشك الموافقة.. اجلوا الموضوع..لان اخوه سووا حادث (الله يهدي شبابنا اللي المتهورين في السواقة).. اخ يالقهر ..لول
3. طبعا كان يوم ميلادي من كم يوم وعمري صار 550 سنة ويعدني عا......آنسة

بصراحة اتمنى اشوف مشاركة الكل.. ويمكن نحن ما نقدر انساعد بعض بس اكيد نقدر ندعي لبعض.. وما تعرفن يمكن تستجاب الدعوة ورب العالمين كبير ويعرف ما في النفوس..
قال رسول الله : ( دعاء الأخ لأخيه في ظهر الغيب لا يرد)

عن أبي الدرداء -رضي الله عنه- قال : قال رسول الله صلى الله عليه وسلم "دعوة المسلم لأخيه في ظهر الغيب مستجابة عند رأسه ملك موكل به، يقول له كلما دعا لأخيه: "آمين ولك مثله"

وقال الله – تعالى -: "وقال ربكم ادعوني أستجب لكم"، وقال في الحديث القدسي: "أنا عند ظن عبدي بي"، وقال الرسول - صلى الله عليه وسلم -: "إن الله حييٌ كريم، يستحي أن يرفع العبد يديه ثم يردهما صفراً خائبتين"

والاخلاص في النية اهم شي.. اذا ما تحقق الشي اللي تبينه بعد ما بديتي قراءة سورة البقرة.. لا تقولين اووه الله ما استجاب لي. وانا تعيت وانا ادعي واقرأ بس بعدني منتحسة.. وما صار اللي اباه...ألخ

بالعكس قولي الحمدلله على كل حال ويمكن باجر يكون احسن عن اليوم وردي اقري وادعي مرة ثانية.. واكيد لرب العالمين حكمة في عدم الاستجابة اليوم.. يمكن في شي انتي ما تشوفينه في امنيتج ويمكن في شي احسن بوااايد ينتظرج بس بعده ما يا الوقت انه يطلع عندج

بقولج قصتي: من زمااااان كنت ابا واحد من اهلنا وكنت ادعي ليل نهار ان الله يجمعني فيه لانه كان مثال الانسان اللي كل بنت تتمناه من صلاة وصيام وحاج بيت الله ورياضي ومايدخن ودارس ومثقف ويشتغل ووسيم..ألخ

تميت سنتين ادعي يوميا انه يكون في نصيبي وقمت ليل وتميت اقول يارب اذا هالانسان فيه خير لي في ديني ومعاشي وعاقبة امري يكون في نصيبي واذا ما كان يارب ابعده عني وارزقني اللي احسن عنه..

وبالفعل اتقدم لي.. وكنت طاااااااااااااايرة من الفرحة.. قلت معقولة انا واايد محظوظة... واااو
قلت بصلي استخارة عشان اقطع كل وسواس

بعدها بكم يوم.. شفت الريال مع وحدة (مواعد) في كوفي شوب وهو ما توقع اني ممكن اروح هناك.. وانا كنت بالصدفة داخلة المول لحاية مع ربيعتي وانا طالعة يت عيني عالكوفي شوب وعليه هو بالاخص..

انا انصدمت ورديت اطالع عشان ما اكذب نفسي.. وسألت ربيعتي.. انتي شو تشوفين هناك,, قالت ريال ويا وحدة!!! (وهي ما تعرف منو هو)

وطلعت وانا تفكيري منشل.. ولا قادرة اتكلم..!!!
وصحت صياح هاك اليوم وعلى طول بدوووون اي كلام قلت نو واي.. ما اباه.. وهو من سواد الويه ما رد حتى يحاول يقنعني اني غلطانة...

من عقبها كنت كل يوم احمد ربي انه كشف لي هالانسان قبل لا اتوهق فيه واتعلمت درس صح ان الله استجاب دعائي بعد سنتين بس رواني ان هالانسان مب هو الانسان المثالي لي ورواني فيه شي ما كنت اتخيله فيه.. واكتشفت انه مسوي نفسه انسان صالح وديُن وهو من هناك............... وتزوج وحدة اجنبية! عشان تخليه يلعب على كيفه

عشان جي اقولكم لا تحزنين اذا ماحصلتي الانسان اللي تبينه لان الاحسن يترياج.. ولا تيأسي ابدا لانج ربحانة في الحالتين.. اذا حصلتي الشي اللي تبينه فهذا خير لج واذا ماحصلتيه فهذا ايضا خير لج بس اكيييييد حصلتي الاجر الوفير

الحين هالانسان اللي انا اباه.. ادعي ربي دايما انه يجمعني معاه بالحلال اذا كان فيه خير لي واذا ما كان ان شاء الله يبعد عن دربي..