شوفوا شو صار معاي (مستجدات ثاني 10 ايام)
الاحد - 11
من بدايته اقدر اقول انه يوم عادي..سرت الدوام وماكان عندي وايد شغل.. احس اني وايد هادية.. يعني اذا حد كلمني ما اتضايق.. اسولف عادي بس يوم اكون بروحي.. اكون كله سرحانة وافكر وبالي مشغول.. رديت البيت ويلست مع اليهال.. وسولفت مع خالتي شوي وضحكنا.. والله مسكينة خالتي سوالف الله يحفظها...
عاد اول مرة احلم بحية في حمامي!!!! كانت طايحة في المغسلة وصغيرة.. ما حاولت تأذيني ولا اتيي صوبي.. بس يوم فتحت الماي عليها تلونت على اصفر وبرتقالي واسود والجزء اللي تلون كان صوب راسها.. كأنها تتسبح ومستمتعة ان الماي يصب عليها!
الاثنين - 12
ضربتني ضيقة... افففف... بديت اعرف ليش انا اتضايق..من زمان يوم كنت انسانة عادية مثل باقي البنات كانت اتييني ضيقة قبل الدورة وما اكون طايقة عمري ولا طايقة ان حد يكلمني ..ألخ.. الحين عاد اظن اتحولت من انسناة عادية الانسانة اتوماتيك صارت الضيقة اتييني قبل وبعد الدورة...لول الله يخسها من حالة.. بروحها دوم متأخرة وفوق ها بعد ضيقة!! عنبوا!
اليوم ابدا ماكان يومي... كل شي ابا اسويه مايستوي! ولا شي كان يستوي صح حتى اني كنت خايفة ان اليوم بيردون علي عشان الترقية وبالفعل ردوا علي ولان اليوم خايس من بدايته حتى الترقية ما حصلتها...لول بمعنى كلي هوا...لول بس ماعليه "صبرا آل ياسر"
رديت البيت وانا مزاجي دااااون..خالتي وصلت بالسلامة وبتم عندنا فترة ويلسنا نسولف ونسولف
ورقدت وما اذكر شو حلمت
الثلاثاء - 13
النفسية خرى لانهم ما وافقوا لي على الترقية.. عشان الازمة المالية اونه!!
وجان اعصب وما اداوم.. وقلت في نفسي انا ليش جي.. بس والله تعبت من الشغل.. صار لي لين الحين 8 سنوات اشتغل واكد والحمدلله وصلت لمنصب وايد زين في الشغل.. بس هذا الشي بدا يأثر على شخصيتي.. كل يوم استوي اقوى واقوى.. وهذا يطفش الرياييل بس والله مش بايدي.. عشان احمي نفسي من ضعاف النفوس والشباب المفلع.. لازم اكون قوية واعطي في الويه عشان كل حد يلزم حدوده معاي..
المهم...قلت ما بسير الدوام اليوم بس قلت لا...اول بتأكد اذا عندي اجتماعات او اشياء مهمة اسويها واخلصها.. وشيكت وطلع عندي اجتماع سخيف مع التين.. قلت طاف لانه مش وايد مهم وجااااااااااان اغيب...لول
ياسلام ما احلى الغياب لول (محد يقلدني في هالشي..قلدوني في الزين مب الشين.. ياويلكم لو غبتوا عن دواماتكم...لول) .. حسيت في شي غلط لاني غايبة بس والله اني احتجت هاليوم عشان افكر وارتب نفسي.. قلت خلاص بصلي استخارة وبطلب من ربي ان ينور لي دربي هل استقيل واطلع من الدوام ولا اتم؟! واذا حسيت اني خلاص ما اقدر.. بطلع وبالفعل صليت فالليل بعد العشى.. وقريت السورة ودعيت للكل الحمدلله (jameela200 عطيتج يوم خاص فيج للدعاء عشان ما تزعلين مني http://forum.********.net/images/smilies/smile.png )
الاربعاء - 14
رحت الدوام عادي وما سويت اي شي يذكر غير اني طلعت امشي مع اليهال وتمت عيني اليمين ترف واااايد بدرجة مزعجة..حد يعرف شو معنى يوم ترف العين اليمين؟؟
وبعد العشى صليت استخارة مرة ثانية.. ودعيت ان الله ينور دربي هل اتم ام اطلع من شغلي
الخميس - 15:
الدوام عندنا مسووين اليوم مثل حفلة حق كل الموظفين بعد الدوام.. اونه.. على اساس لازم نحضر..بيكون فيها مسابقات وهدايا والعاب..الخ
طبعا سويت طااااف لان مالي بارض,,زين مني اشوفهم في الدوام بعد لازم اشوفهم بعد الدوام..مابسير..خلصت دوام ورحت الجمعية واشتريت اغراض للبيت ورديت البيت وصليت وقريت سورة البقرة بس ما صليت استخارة.. صليت يومين واليوم ووقفت.. باجر ان شاءالله بصلي وبوقف يوم لين اكمل 7 ايام..
الجمعة - 15
نشيت الصبح الساعة 8:30 وتميت عالفراش كسلاااااانة... وااايد احب الويكندز..واحب الكسل...لول
سويت لي ريوق والكل طبعا راقد.. ويلست اطالع تلفزيون.. وانا اقول في خاطري جان زين لو عندي الكروس تراينر- cross trainer كنت حرق كم سعرة حرارية وسويت شوية رياضة ونشطت جسمي...شكلي بروح اشتريها
وعلى الساعة 10 بديت اسمع حشرة اليهال.. والركظ وفجاة اختفى الصوت!! قلت بشوف شو السالفة.. ونزلت وماحصلت يهال تحت.. قلت بسم الله توني سامعة صراخهم!! وسالت الخدامة قالت انهم طلعوا عند ربعم برى! ايواااااااا ...الله يرحم ايامنا الشارع كان مقدس عندنا..لول اول ما انش من الرقاد نطلع نلعب بخياسنا...لول عشان جي المناعة 100\100 ماشاءالله من الوسخ...لوووول
وعلى الساعة 11 اشوف بو راس راد البيت (ولد اختي) واتسبح ولبس كندورة نظيفة ويلس يتريا.. قلت على وين ماشاءالله.. قال بروح المسجد بصلي الجمعة....( ااااخ ويهي فشلة).. انزين شاطر شاطر (ماشاءالله عليه كل جمعة جي.. بروحه يتسبح ويلبس ويتريا يودونه للصلاة (عقبال عيالي اللي ما يو لاهم ولا ابوهم) لول
ويلست اسولف وياخالتي وتخبرني عن عيالها واسألها عن ناس شفتهم من زمان يوم سرنا عندها.. اللي توفى واللي سافر واللي عرس واللي مريض واللي بو عيال..الخ سبحان الله كل حد انشغل في حياته
واتجمعنا عند الغدا .. بس في الويكند نقدر كلنا نيلس على سفرة وحدة..يالله كيف مشاغل الدنيا تحرمنا من الجلسات العائلية.. صارت عندنا عوايل متفككة لان كل حد مشغول في حياته..اللي في دراسته واللي في دوامه واللي في شغله الخاص واللي ويا ربعه..الخ.. بس نتلاقى في الويكند..
السبت - 16
قمت الساعة 7:30 الصبح!!!! الله يغربل العدو.. النشاط ماينزل علي الا في الويكند.. عنبوا نشي جي من وقت ايام الدوام انزين!
وطبعا يلست اطالع التلفزيون لين الساعة 9 .. شفت برنامج حلو في الجزيرة الوثائقية "اسمه الموت الاسود" وكان موضوعه عن وباء الطاعون اللي انتشر في القرن ال17 يمكن! شي جي
وكيف بدأ ومن وين طلع.. صراحة برنامج حلو... وقلت الحمدلله اني ما انولدت ايامهم ولا طلعت اوروبية المولد.. الحمدلله اني انولدت في دوله مسلمة عربية..
الساعة 11 مرة ثانية رقدت..لين الساعة 1:40 الظهر... نطيت من الفراش.. قلت اوهووووو انا ما احب الرقاد لين وقت متأخر جي وجان اقوم واتسبح واصلي وانزل تحت..
يلست مع اليهال وخالتي... صدق ان الامهات اهم شي عندهم ان عيالهم كلوا ولا لا.. اول ما شافتني خالتي.. قالت لي كلتي!! كل ما تشوفني نفس السؤال..كلتي.!!! لووول واذا قلت لا تقول..لييييش؟؟ خليها تحط لج اكل.. انزين مب يوعانة...لاااااااا كيف...ليش..لول
ويلسنا سوالف انا واختي..تعرفون قبل انا واختي علاقتنا كانت وايد سطحية وكنا مش وايد متفاهمات.. وكله مشاكل بيننا.. حتى ما كنا نتعامل مع بعض مثل الاخوات يعني عادي اتمر ايام ومانكلم بعض..(الله يسامحنا على هاذيك الايام) بس الحين الحمدلله واااااايد اتغيرت الاحوال للاحسن.. صرنا ربع اكثر من اخوات.. نسولف ونضحك ونحترم بعض الحمدلله.. من بديت اقرأ سورة البقرة سبحان الله..بيتنا صار هادي وما فيه مشاكل الحمدلله... صارت النفوس احسن بوايد عن قبل
نصيحة يا اخواتي..ترى العمر ينقضي وخصوصا الحين تمر الساعة مثل الدقيقة.. اذا متزاعلة مع اختج او اخوج او احد من اهلج.. ابدي بالتي هي أحسن واتصالحي معاهم ..في النهاية الظفر ما يطلع من اللحم... اقري سورة البقرة باستمرار وبعد كل قراية حاولي شوي شوي تكلمين اختج او اخوج وبتشوفين كيف بيستقبلونج ببتهاج وبيسولفون معاج على طول
كل ما تكبرين في العمر بتحسين ان العلاقات الاجتماعية ويلسات الاهل شي لا غنى عنه..
الاحد - 17
سرت الدوام وكان يومي عادي.. سألتهم شو سووا في الحفلة.. مش طلع اسمي في السحب!!! لول انا اللي في حياتي مافزت بشي ويوم طلع اسمي في السحب وفزت وانا مش موجودة في الحفلة..لول بس شفتي كيف الرزق ايني بعد ما بديت اقرى سورة البقرة.. من حيث لا احتسب..)
المهم هالايام ماعندي وايد شغل وبعدني متضايقة لانهم ما وافقوا على الترقية..بس بعدين اقول يمكن خير لي..يمكن الله كاتب لي الشي الاحسن وانا ما ادري.. مهما صار تراني راضية ويارب لك الحمد والشكر على كل شي.. ما بعكر مزاجي عشان الترقية (لا حصلنا الريل ولا الترقية ,,الحيــــــــــــــاة حللللللوة...لول.. عاشت زووز1 اللي تفكر بايجابية) وما بستقيل... ما بسوي مثل وايدين من الناس اذا ما اترقت على طول تستقيل بدون ماتفكر.. وعقب تتوهق.. اعرف وحدة استقالت وتمت سنتين تدور وظيفة! قلت بسكت عادي وبشتغل بس بعد بدور في اماكن ثانية ويوم بحصل وبمسك الوظيفة الثانية عقب بطلع من هني..
كلمت ربيعتي اذا تعرف حد يبى يوظف وقالت بتشوف
رديت البيت وصليت ويلست مع الاهل ويلسنا برى البيت لان الجو كان حلو وهادي وطارت صرصورة صغيرة خايسة فوق راسي.. وقمت اصارخ ... على قولت خالتي ها حتى مش صرصور.. هاي نملة عودة..شووووو.. حتى ولو تراها اتخوف (انا وايد اخاف من الحشرات... واااااايد) وقمت عنهم وتميت امشي حول البيت اوني اسوي رياضة..
رديت الغرفة وصليت العشاء وقريت سورة البقرة وقمت صليت استخارة ودعيت ربي برؤيا صالحة ورقدت بدون عشى (عشان ما يزيد وزني..لول)
وتعرفون شو حلمت؟؟؟
ولا شي...لول
الاثنين - 18
يوم عادي.. من اجتماع لاخر.. وخلصت كم من ايميل بس!
وما كان عندي اي شي اسويه...ويلست على النت احاول ادور قران للايبود مالي.. ابا انزل القران فيه عشان اقرأ في اوقات الفراغ (مثل اذا اتريا لين ايي دوري في العيادة او انتظر ربيعتي توصل بدال ما انا يالسة جي بدون ما اسوي شي.. بقرأ قران)... بس للاسف ما حصلت واللي حصلته مع صوت وانا ما ابا مع صوت لان بطيء... ابا بس صورة وانزل انا كل ما اخلص مقطع
بعد الدوام اتلاقيت مع ربيعتي .. صار لي فترة ما طلعت ولا شفت ربيعاتي..احس عمري مثل الوحدة اللي عمرها 60 سنة..من البيت للدوام ومن الدوام للبيت..ربيعاتي كلهن عرسن وانشغلن في حياتهن وصار عندهن عيال (ماشاءالله ولاحول ولا قوة الا بالله..الله يحفظهن ويسعدهن في حياتهن وعقبال كل البنات اللي ماعرسن يارب) ويلسنا نسولف انا وهي وضحكنا والجو كان حلو
رديت البيت وصليت وقريت قران ورقدت
الثلاثاء - 19:
رحت الدوام واكان عندي اجتماع ويوم خلصت اتصلوا علي من الHR يبون يشوفوني.. طلعوا يبون يطلعوني كورس دراسي وبس يبون مجموعة مميزة يدخلون هالكلورس واسمي من ضمنهن (طلعت مميزة انا ما ادري...لول) مدة الدراسة سنة بس بشكل متقطع.. قلت حلوووووو..بس اللي ماعجبني ان لازم اتم في الدوام بمدة الدراسة يعني بيوقعوني على عقد
وعطتني اوراق وبروشور للكورس.. والله شكله حلو.. ومنها نتعلم
قلت معقوله هذي هي نتيجة الاستخارة؟؟ الجماعة يبون يطوروني ويعتبروني مميزة ومهتمين فيني... شي طيب
قلت لها بفكر وبرد عليج خبر..
رديت البيت وصليت استخارة مرة ثانية.. انا حابة الفكرة بس مب حابة اني اوقع عقد يلزمني اتم عندهم سنة زيادة... يلست افكر وافكر واجلب الموضوع من كل صوب.. ومش عارفة هل اوافق ولا لا.. هل بيأثر علي بعدين ولا لا..شو بستفيد من هالدراسة.. واذا صار وانخطبت..شو بسوي لو هالانسان قال ما في شغل؟؟ كيف بقدر اطلع وانا موقعة عقد يلزمن اني اتم؟
من كثر ما كنت افكر.. راسي دار.. رقدت ...رقادي كان متقلب وايد ومش مرتاحة فيه..واحلامي كانت مب حلوة..حلمت ان الريال ناوي يطول.. مال بو سنة او سنتين!!
الاربعاء - 20
ولا حسيت باليوم ابدا.. خلصت اشياء وايدة
انا رادة البيت.. اتصلت علي ربيعتي.. وخبرتها السالفة.. قالت لي عادي مش دوم يستوي هالشي..هي بعد درست على حساب دوامها وعقب طلعت.. قالت محد افتكر فيني.. ولا حد سألني او افتكر فيني! قلت اوكي حلو الكلام بس انا لاني مرات يوم انتحس..انتحس عدل.. فاكيد بيسألوني وبيقفون حصى في دربي..لول
المهم.. وصلت البيت..وكالعادة لازم انزل واشوف اليهال وحصلت امي يالسة اتغسل الحوي.. مع الخدامة وبنت اختي وولد اختي الاهبل يالس يتزلج بالماي!! يتحسبه سكي دبي يمكن..لول..وقلت لها ليش تغسلين الحين ترى الجو غبار.. قالت ماعليه خليه ينظف المكان شوي.. ورحت داخل يوم شفتها مشغولة
ويلست شوي وسرت اصلي ورديت تحت مرة ثانية وحصلت خالتي يالسة اتصلي.. ويوم خلصت قلت لها دعيتي لي قال هيه...بشو؟ (ملقوفة لازم اعرف) قالت بالريل..قلت ياهي مشكلة هالريل اللي مب راضي ايي ويفكني من حشرته!! يعني الحظ واقف على هالريل وبس!! واخرتها ما ادري منو بيطلع! (الله يستر بس)
وفجأة.. حدث مالم يكن في الحسبان!!
عاصفة هوائية شنيعة استوت..غباااار وهوا وزوابع ... ياحليلج يا اماه.. توج غاسلة الحوي وجنج ماغسلتيه..رد وغبر
قلت خلني اروح غرفتي وارتاح.. وسرت صليت العشاء وقريت السورة ودعيت بس ما صليت استخارة.. والله اني اقرى قران واحس بالغبار يدخل في حلجي ..لول
قلت لا تكون الدريشة مفتوحة.. وسرت اشوف الا انها صدق مفتوحة شوي.. وصكرتها وتاكدت من كل الدرايش حتى اللي في الحمام وانتوا بكرامة انهن مصكرات
وحطيت راسي ويلست اطالع تلفزيون.. شفت مسلسل CSI Miami وايد يعجبني.. احب التحليلات والكشف عن الجرائم.. وعقب جلبت القنوات حطيت LBC ومن زمانه الLBC قناة اسخف منها ماشفت
اونه امس حاطين برنامج عن الحب وحب المشاهير والحب الهوسي..الخ
(والقهر ان اسمها فاطمة الزهراء.. خربت الاسم ودنته صراحة) اتحب عاصي الحلاني (ما ادري على شو؟.. خسف وصوته اخسف) واونها رايحة لبنان كرمان لا تشوفو لعاصي (صدق اسم على مسمى..عاصي وهو عاصي..) وتمت كل شوي تصيح واونه اغمى عليها.. ومش قادرة تتنفس.. ومش مصدقة انها رايحة تشوف عاصي الحلاني! وطاحت بيغمى عليها.. قلت في خاطري ..شو ها!!!! خطر في بالي اصطرها طراقيييين من الخاطر يمكن تعتدل شوي
وايد اتبالغ هاي ومسوية عمرها انها مهووسة في عاصي ومن زين هالعاصي اصلا..امحق ويه..
قلت الحمدلله والشكر.. الله يرحم ايام مراهقتي..غير سلمان خان ما في حد حلو...لوووول
وما كنت مهووسة به بس اوني عايشة الدور شوي..لوول
وشوي اول ما شافته.. صاحت.. وحضنته..وتصيح.. وتسولف شوي معاه وتصيح وتتكلم شوي وتصيح..حتى هو قال شو بدي اعمل وحسيته لايعة جبده منها بس يجامل الكاميرات!!
قلت انا السخيفة اللي يالسة اطلع هالبرنامج السخيف.. يخاطب ناس سطحيين وصكيت التلفزيون ورقدت
ويمكن تبون تعرفون شو صار في موضوعي... ولا شي
انا بروحي لاعت جبدي خلاص.. وبشل الفكرة من راسي خلاص..
دعواتكم يابنات.. ما اعرف ليش الموضوع يتيسر بس ببطأ شديــــــــد بطأ قاتل.. بس مش متعسر مثل قبل!
ابا الموضوع يتسرع ما ادري كيف اخليه يتسرع
تحديث :
البنت اخر دخول لها كان في 2011
وفي الاغلب انها تزوجت وعايشه حياتها احلى حياه
وحتى لو لسه ما تزوجت خلاص انتوا قريتوا بعينكم طيف عايشه حياتها ع الآخر عكس أول ....
اتمنى تكون حمستكم واعطوني ارائكم
الصفحة الأخيرة
الحمدلله بديت قراءة سورة البقرة مثل ما قلت يوم الخميس الموافق 5-3-2009
انا كنت وايد مشغوله في هاليوم فقريت السورة على مرحلتين.. الصبح والمساء والحمدلله دعيت للبنات اللي طرشن اساميهن (الله يرزق كل البنات مبتغاهن يارب)
طبعا النفسية هادية الحمدلله وكل شي مر تمام.. في اشياء كنت ابا اشتريها وكنت خايفة انها خلصت من السوق بس يوم رحت حصلت الاشياء اللي اباهن بسرعة وبالصدفة..(لاني ابا اطرش هدايا لربيعتي)
رقدت وقمت ثاني يوم وحصلت مسج على موبايلي اني فزت بمبلغ من المال!!!! (هذي البداية) صح انه مبلغ بسيط جدا بس بعد نعمة وياتني لين ريولي] وانا مابقول لا... لول
المهم قمت ويلست مع اليهال (الوحوش) سبحان الله ايام المدرسة ماينشون من وقت جي.. بس ايام الويكند ينشون على صياح الديك!! المهم سويت لهم ريوق سندويشات بيض وجبن.. وايد عليهم مع نص كوب شاي..
وعاد بدأ النشاط وبدأ النط والهبل والنكت السخيفة..
خالو خالو..ليش سموها الرحبة؟ ليش..؟ لان فيها حبة هاهاهاها!!!... سخيييييييييييييف.. انطب احسن
خالو خالو مرة طلعت لي حبة في ويهي هاهاها..!!! ...يارب ارحمني من سخافة هالولد.. انطب ياثقيل الدم
حطوا على قناة طيور الجنة.. اول مرة اشوف هالقناة!! كلها اناشيد للاطفال بس فيها موسيقى ودق!! حلوة الاناشيد بس كيف فيها دق وموسيقى!! والبنات لابسات قصير ومناكير في الاظافر..ألخ.. وهي يالسة تدعي!! هاه!!! شو الفرق بينها وبين الاغاني.. نفس الدق واللبس القصير..ألخ!! والمشكلة ان اليهال مدمنين على القناة ويغننون قصدي "ينشدون" معاها؟!
بعدين رديت الغرفة ويلست اغلف الهدايا واسوي حركات حلوة (اوني عاد مبدعة..لول) لين خلصت ووسخت الغرفة كلها عشان كم قوطي..لول بس والله كان وناسة وتضييع وقت في شي حلو
وماصار شي غريب يذكر..غير اني كلت وااايد على الغدا..لول (الحلوة متأخرة واااااايد كالعادة) ومزاجي خايس بس وايد هادية وماسكة عمري بالغصب..
قريت السورة ورقدت.. حلمت اني حامل وربيت مرتين!! "لا تفهموني غلط.. والله بعدني انسة..لول"
ثالث يوم قمت الصبح وطرشت الهدايا لربيعتي.. شوي والا هي داقة مستااااانسة عليهن..لول جنها ياهل..لول.. وتمت تشكرني.. استحيت منها وجان اسوي عمري مشغولة عشان اصكر بس عشان ما اتم تشكر فيني..
وضربتني ضيقة خايسة .. وكانت نفسي مفتوحة للحلويات.. ولحسن الحظ ان ما كان عندي اي حلويات ولا كنت عادي زدت 20 كيلو..
رابع يوم..اخر الاخبار مع الريال.. انه الموضوع تقريبا اتصكر.. لا جديد فيه (الحمدلله على كل حال) اهله مسافرين عشان اخوه اللي سوا الحادث (الله يهدي شبابنا) وما صار اي جديد.. ما اعرف هل لازالوا غير مقتنعين ام اقتنعوا.. ام سدوا كل الدروب.. طبعا انا اكتب هالكلام والدمعة على عيني.. وكاتمة السالفة في قلبي.. وتبون الصراحة بديت اشل الفكرة من راسي.. ولا بفكر فيها.. كل انسان ياخذ نصيبه في الدنيا واذا لي نصيب تراني باخذه بس ما بحرق اعصابي ولا بهتم بالموضوع.
خامس يوم.. رحت الدوام وكل شي كان اوكي بس انا متضايقة وايد..(متى تنزل الحلوة وتفكني)..قلت بروح اقرا سورة البقرة يمكن احس بتحسن.. وقريتها ودعيت من قلبي ان اموري تتيسر ودعيت للبنات ان الله ينول كل وحد مرادها (الله يرزق كل البنات الازواج الصالحين يارب)
والله ضربتني ضييييقة ودخلت منتدى ثاني وقريت مشكلة وحدة من العضوات ..والله عورت لي قلبي حتى اني صحت عليها انظلمت من ابو ريلها (حسبي الله ونعم الوكيل فيه اذا صدق هو خرب حياتها وطلقها من زوجها).. قلت في نفسي سبحانك يارب..لا المتزوجة مستانسة ولا اللي مش متزوجة مستانسة!
قلت بسير ارقد وحطيت راسي وانا حزينة.. وسبحان الله يابنات.. اتذكرت اني ماخلصت قراية السورة.. والله يلعن الشيطان يكسلني.. ان عادي ارقدي ..الا هو يوم واحد بتتأخرين وبعدين انتي قارية 40 يوم قبل وماصار شي.. والله وساوس تدور في راسي.. وقلت خلاص برقد انا تعبانة.. بس والله اني ماقدرت... قلت ما اريد اخرب الشي اللي بديته.. خلني اقوم واقرأ.. وما شاءالله علي وعلى عنادي.. استانس يوم يطلع العناد في المكان والوقت الصح.. احلى شي يوم اعاند الشيطان لابركتن فيه..والله وقمت وقريت السورة وانا اتثاوب.. ياربي ليش صارت ثقييييلللة علي.. تراني دوم اقراها واحسها خفيفة...لأيش اليوم ثقيلة.. وابا اخلصها بسرعة!!
شو ياني.. بس والله لا أكملها لو شو مايصير.. والحمدلله اني كملتها واتعايزت اسير افتح الورقة اللي كاتبة فيها اسماء البنات عشان الدعاء.. بس ماقدرت.. شعور الذنب ياني..غصبت عمري ورحت وفتحت الورقة ودعيت لهن وحدة وحدة (يااااااا رب استجب لي يااارب.. يارب كل البنات اللي طرشن اساميهن وبدن معاي في قراءة سورة البقرة انهن يتزوجن الشخص الي يبونه عاجلا غير اجل.. يااا رب)
سادس يوم
قمت ورحت الدوام كالعادة.. بطني عورني الدورة ياية في الدرب بس بعدها.. وكان عندنا برزينتيشن مال الدوام.. ويلسنا وقلت بروح قبل ما ينترس الحمام (وانتوا بكرامة) وبتوضأ عشان وقت البريك اروح على طول واصلي.. وانا داخلة الحمام.. ولا الحلوة نزلت... اخييييييرراااااااا فرجت.. متأخرة 11 يوم..
حسيت بهم وانزاااح.. وايد اتحسنت النفسية... ورحت وما خليت شي ما كلته..لول
ورديت البيت ويلست اقرأ سورة البقرة من الكمبيوتر..
انا ابا اتزوج هالانسان اللي في خاطري واهله مايبوني.. رفضوني بدون حتى ما يشوفوني ولا يعرفوني! طيب يمكن انا زينة واناسبه اكثر من بنت عمه او خاله!! يمكن هو ما يتقبل بنت عمه بعدين... مش حرام تظلمون البنت معاه! يمكن يتزوجها وماتطلع مثل ما يباها.. ويقوم ويطلقها.. مش حرام تضيع البنت وتدمر لانه ما عجبته او العكس صحيح؟
وايد افكار دارت في خاطري.. اطالع التلفزيون ولا ادري عن شو يتكلم وانا هايمة في تفكيري.. اسئلة كثيرة دارت في بالي.. قلت ياريت اوصلها لاهله..
بس اللي جابر خاطري انه هو يباني.. سمع عني الزين الحمدلله وشافني في دوامي وانا ما ادري.. طايرة في مشيتي (والله لو ادري جان شوي على الاقل اتدلعت في المشية..لول)
بس بعد!.. لين متى بيتمسك.. في النهاية يا هو يغلبهم ولا هم يغلبونه!
بس خلاص ما اريد افكر اكثر.. بس
بسير ارقد,,
اليوم السابع
رحت الدوام وكان عادي.. خلصت وايد اشياء ورحت عند المدير العود فجأة وكلمته اني ابا ترقية.. جي دقت في راسي.. وسرت لول
والله ما اعرف ليش احس انها بتتيسر علي.. جلست معاه وقلت له اني كملت كم سنة عندكم واشتغل شغل 3 واكرف واتأخر في الشغل واخلص كل شي اول بأول والكل يشهد لي بهالشي.. ليش ما ترقوني! جان يسألني كم سؤال وجاوبتهم وقال لي ان شاء الله خير
الحين ما اعرف هل بيسوي لي سالفة ولا بيطشني.. المهم انا جربت حظي وبنشوف شو بيستوي.. الحين بسكت عنه والاسبوع الياي بذكره... صار ترى خير وبركة واذا ما صار.. باكل تبن وبخلص شغلي..لول بس ما بستقيل.. اخاف اتوهق وما احصل وظيفة في مكان ثاني..لول
ما قدرت احصل الريل.. على الاقل احصل الترقية.. لول...
احس ان جسمي تعباااان.. من الحلوة
اليوم خلصت قراية السورة في 40 دقيقة!! قبل في 46 دقيقة... في تطور
اليوم الثامن
اليوم الخميس..طبعا رحت الدوام وكانت عندي وايد اشياء اخلصها والحمدلله خلصت الاشياء الهامة.. وبعدين ياني صداع.. قطلعت قبل نهاية الدوام بساعة تقريبا.. ورديت البيت..
حسيت ان راسي بينفجر.. بالعادة يوم راسي يعورني انا ما اكل بندول.. اتحمل قد ما اقدر واذا وااايد تعبني الصداع.. اكل حبة بندول ..يعني في الشديد القوي
وبما ان ما علي صلاة هالايام.. قلت بروح الغرفة وبرتاح.. ورحت وقريت سورة البقرة من الكمبيوتر وانا تعبانة.. والله اني كنت متعايزة والشيطان الملعون يقول لي رقدي.. خلاص اقريها باجر.. الله يلعن الشيطان
بس طبعا زووز1 لا تؤمن بالمستحيل.. وطبعي عنيييد.. اذا قلت ما بخرب قرائتي للسورة.. خلاص ما بخرب فياريت لو الشيطان يبعد عن دربي لان لا مجال اني انصت له.. الحمدلله افكر بايجابية لانه بيرد لي..
يوم وصلت لنص السورة خف عني الصداع بس ما راح..
قمت انسدحت شوي عشان ارقد وشفت الساعة... اوووف بعدها 8:15 المسا... قلت انا لو رقدت الحين.. .بنش الساعة 3.. بتم مثل البومة خلني اطالع تلفزيون شوي وبرقد بعدين ويلست اجلب في هالقنوات.. وعلى الساعة 10:20 رقدت..
اليوم التاسع:
قمت الصبح نشيطة على الساعة 7.. (عنبوا ايام الدوام ما سويتها...دوم انش متاخرة..لول) وشفت الجو مضبب.. جان اروح اسوي لي ريوق.. ياسلام عليج يا زووز1 يالفرنسية..سويت اومليت وشاي وتوست.. ويلست اطالع تلفزيون.. والكل راقد.. المهم بعدين نزلت عند الاهل واليهال..
تغديت ويلسنا نلعب.. والمساء سرنا سوينا رياضة ومشينا في الفريج.. عشان جي نحن فينا سمنة وكروش ناكل ونجابل التلفزيون.. ولا نتحرك وعقب نتذمر
يوم مشيت حسيت ان الدورة الدموية في جسمي اتحركت اخيرا.. حتى اني تعبت وانا امشي وهذا ان دل فيدل على ان جسمي ما فيه لياقة ويحتاج لرياضة لانه صار له فترة اتعود على الكسل
انا كنت دايما اسور رياضة لين نقلنا .. وبس ما قمت اروح ولا قمت اتحرك ولا اسوي رياضة.. صرت كسولة بس شكلي بسوي جدول جديد لقضاء يومي وبدخل الرياضة غصب فيها وببدأ ان شاءالله...
اليوم العاشر
رقدت الساعة 12:30 وقمت اليوم الساعة 9 الصبح
وطبعا لانه ويكند الكل راقد... سويت لي ريوق خفيف ويلست اطالع التلفزيون
شفت فيلم هندي (تراني من محبي الافلام الهندية...لول)...
والله اني احب الويكندز وايد.. لاني ارتاح من الدوام والشغل.. احيد يوم كنت ياهل كنت اسمع الكبار دوم يقولون.. لا تكبرون خلكم صغار.. كل ما تكبرون تزيد المسؤوليات والمشاكل والهموم.. ونا كنت اقول في نفسي..لااااا انا ابا اكبر واتخرج واشتغل.. وبالفعل كبرت وخلصت جامعة واشتغلت.. والحين اقول والله ايام الطفولة احلى..لا تفكير ولاهم ولا مشاكل... صدقهم يوم قالوا.. لا تكبرون خلكم يهال حلوين... بس هذي سنة الحياة .. والحياة هي اللي نحن نصنعنها.. يا نصلحها ولا ندمرها
المهم.. اليوم بس تميت ماسكة اليهال.. يعني وقتي كله راح وياهم
ورديت الغرفة.. وقريت سورة البقرة... والحمدلله مر اليوم بسلام وبدون اي مشاكل.. بعدين يلست افكر هل بحصل الترقية ام لا؟؟ يا رب احصلها
انا ما اعرف كيف بعض البنات يفكرن.. وحدة مرة كاتبة انها تبى تعرس وتبى اتييب عيال وتبى ريل تحبه ويحبها ..ألخ.. بس طلعت من الجامعة ويالسة في البيت!!! انزين ليش؟؟
ليش تيلسين في البيت.. ليش ما تكملين دراسة؟؟ وشو ضمنج انه حتى لو ياج المعرس بيرضى فيج؟؟ يمكن هو يباها جامعية (وايدين هالايام يبون وحدة دارسة وتشتغل عشان تساعده) انزين يمكن لو تخرجتي واشتغلتي.. حد من عيال الحلال يشوفج ويتقدم لج؟؟
ليش صاكة الباب على عمرج وتقولين ابا اعرس... ليش ذابحة حياتج وانتي بامكانج انج تستغلين ايام العزوبية في العمل والتعلم.. تراها الخبرة في الحياة بتساعدج وايد باجر في حياتج الزوجية وويا عيالج بعد
يا بنات فكروا عدل واستغلوا ايام العزوبية في اشياء حلوة.. ابني نفسج وشخصيتج.. قبل لا تنشغلين مع الريل وتقولين ياليتني سويت ويالتني تعلمت