قصتي الحزينه

السلام عليكم ورحمة الله وبركاته

أخواتي انا من سنوات طويله وانا أقرأ كثير أشياء بالمنتدى وكنت أقرأ قصص حزينه وأدعي لكل وحده محتاجه الدعاء بدون ماأشارك لأني ماكنت مسجله بالمنتدى..
سجلت وحبيت أشاركم بقصتي اللي فيها أحداث كثيره سعاده وحزن..
وأطلب منكم تدعون لي وأسألكم بالله اذا بتشاركوني بتعليقاتكم لاتجرحون لأني شفت كثير بالمنتدى عن حياة الغير وحتى لو ماعجبني بعض التصرفات كنت أسأل الهدايه والتوفيق للجميع..
أنا انسانه طيبه قلب لدرجة الغباء مريت بحياتي بناس غلطو في حقي كثير وكنت أسامحهم بنفس الوقت مهما كان حجم الغلط.
أحب الكل عمري ماكرهت أحد أدور على سعادة الكل وخاصة أقرب الناس لي دايما افكر فيهم أكثر من ماأفكر بنفسي.
بفترة المراهقه تعبت كثير كنت عايشه وأحس بنقص بحياتي تمر علي لحظات أحس اني منبوذه وانه ماأحد يحبني أمي مشغوله بمشاكل الوالد واهله اللي ضلموها وضلمونا كثير.
كنت أدور على أي شي يسعد أمي ويلبي رغباتها وأول شي جاء في بالي بعد ماخلصت المدرسه اني اتوظف حتى اساعد أمي وأخليها فوق الكل وماتحتاج أحد طبعا ماعندي الا اخ واحد واصغر مني.
الوالد متزوج ثلاثه من غير أمي..
كنا عائله صغيره بسبب انه أمي بعد ولادة اخوي صار فيها عقم والباقي عائلاتهم كثيره..
ماكنت أحس بحب ولاراحه كلها مشاكل وظلم وتعب..
بيوم تعبت أمي وأخذتها للمستشفى دخلت عالدكتور والحمدالله تطمنت عليها وكنت واقفه باخذ الأدويه الا شفت ممرضه طلعت من مكتب وقالت خلاص بنعلن الوظايف بعد يومين ان شاء الله.
انا هنا ماصدقت على طول رحت للمكتب وحصلت واحد جالس استحيت اتكلم ورجعت قال خير أختي عندك شي..
قلت بنفسي لازم اتكلم عشان أمي يمكن ربي يكتب لي الوظيفه..
قلت بصراحه انا ادور على وظيفه الله يجزاك الخير اذا ساعدتني الله يعلم بحاجتي لها..
قال فيه عندنا وظايف بس رواتبها قليل جدآ قلت مو مشكله انا موافقه وأبيها..
قال انا المسؤول عنها بس والله مسافر بعد يومين ويمكن أتأخر جيبي ملفك وان شاء الله اذا لك نصيب بنتصل..
قلت الله يسعدك ماتنسى قال ان شاء الله
حسيت انه مو مهتم..
قلت بنفسي هذي فرصه لي لازم ماأضيعها واصلا نادرآ ماألاقي أحد يوصلني لمكان ليش ماأخذ رقم المكتب وسألته قال والله تليفون المستشفى مقطوع من شهر بس اذا بغيتي هذا رقم الجوال بعد اسبوع ارسلي لي رساله وذكريني بإسمك والله يكتب لك الخير..
ترددت أخذ الرقم بس قلت باخذه وبرسل مو جالسه اسوي غلط ابي اتوظف مو حرام الوظيفه..
والله كان رجل كبير مو شاب صغير مراهق وكان محترم جدآ كان يتكلم والله وهو منزل عيونه..
وبعد اسبوع ارسلت له وذكرته
ومارد على رسالتي انتظرت وانتظرت وبالأخير اتصلت فيه كانت المكالمه كلها عن الوظيفه وبعد يوم رجعت اتصلت وبدون ماأحس بدأنا نتكلم بمواضيع كثيره واوقات نضحك وصرنا نجلس بالساعات ماكنت افكر بشي وقتها..
رفض اتوظف بهذي الوظيفه لانه فيها اختلاط وبدون شعور وافقت..
مرت أيام واشهر وانا اكلمه وكنت انتظر لحظة مكالمته بفارغ الصبر..
والله كان انسان بمعنى الكلمه ولامره طلب مقابلات ولامره قال كلام يخدش الحياء كنت اشكي له لو صارت مشكله لما كان يجي العيد او مناسبه وابوي يمنع عنا المصروف بسبب المشاكل كان يحولي على حسابي ويقول اشتري لأمك ولك كان يوقف معي بأي شي..
اذا تمنيت شي مالاقي الا يقول خوذي اللي عند الباب والاقي هالشي اللي ابيه..
لأول مره حسيت اني مرغوبه حسيت اني ملكه اللي ابيه يوصلني..
كنت ابكي من الفرح حبيته حب جنوني وهو بادلني نفس الشعور ويمكن اكثر..
قال لي اسمعي انا ماابيكي يوم او شهر انا ابيكي عمر كامل.. ابيكي زوجتي وام اولادي..
يالله اقسم بالله كان احلى كلام مر علي بحياتي كنت ابكي مو مصدقه..
وهنا وقف كل الكلام تذكرت انه من قبيله غير عن قبيلتنا ومستحيل ابوي او اخواني يوافقو عليه خاصة انه ابوي متشدد جدا جدا جدا
مستحيل البنت تطلع من غير قبيلتها..
بكيت بس مو من فرحتي من حزني قلت ابوي مستحيل يوافق قال مافي شي مستحيل على الله..
رحت صارحت امي عاتبتني وزعلت علي كثير وبعد كم يوم قلت لها انه يبيني بالحلال ويشهد الله انه مالمسني ولاقابلته الا مره وحده لما طلبته الوظيفه..
كلم امي وصارحها بكل شي..قالت له امي انه ابوي مستحيل يوافق ولو وافق اخواني ممكن يذبحوني..
طلبتها تساعدني وانه نحاول..
وصار وكلمت امي ابوي وصار زي البركان وعصب وقال مستحيل والله لو تجلس عانس..
وكلمت امي واحد من اخواني من ابوي طبعآ ماسمعو ولا كلمه جاء لعندي وضربني فوق ماتتخيلون بعدها صرت اتحمل الكلام والآهانات كل يوم ضرب من اخوي من ابوي اذا قلت له انه شخص طيب ومحترم وانه مو مهم القبيله وكلمت ابوي وقلت له انه مااعرفه وانه اعرف اخته ورفض..
عدت ايام وأشهر وكنت بحاله الله يعلم فيها كنت اتجنن لو ماكلمني حبيته اكثر من نفسي كنت ادعي ربي يوميا كان واقف معي بكل شي كان يقولي ياليتني اموت ولايجي اليوم اللي تتزوجين فيه غيري قلت مستحيل اتزوج غيرك ولو بيجبروني والله لأموت نفسي..
كل بعد فتره كان يجي احد يخطب كنت ارفض اشوف احد او يجون وسبحان الله مايتم شي من نفس الناس يصير شي عندهم وتنتهي الخطبه..
مرت قتره طويله..
تدرون كم مرت 7 سنوات..
ايه كل هالسنين مرت وانا واياه بعذابنا وكل فتره نحاول في اهلي وكنت اتعذب اكثر واكثر..
كان جسمي شاهد على عذابي كانت تبقى اثار الضرب من اخوي وابوي ومع هذا كان عندي امل بالله كبير..
بعد فتره أرسل واحد وقال لأبوي انه فلان بيعطيك سياره وكاله قيمتها فوق 200 ألف وبعدها تردد أبوي وقال نفكر ونرد لكم خبر ..
يالله يالله رحمتك مو مصدقه جاء ابوي قال اذا بيجيب لي السياره والمهر يكون مثل مااطلب بوافق يارب احمدك واشكرك كنت اسجد وابكي خلاص ماابي غير هذا الإنسان ماأبي غير هذي السعاده
رحت اكلمه كنت ارجف وابكي مو قادره اقوله وبالقوه قلت خلاص وافق والله كان اسمعه يبكي يصرخ من فرحته جلسنا نبكي مو مصدقين احنا بحلم والا حقيقه...
وصار وجاء حبيبي جاء زوجي يالله ماأحلى هالكلمه طبعا اخواني الكل ماحظر الخطبه بس ابوي قال لهم مااحد له دخل بالموضوع خلاص انا وافقت..
اعطى ابوي السياره الوكاله هديه له واعطاه المهر غالي مثل ماطلب..
هو مو غني حالته متوسطه بس طلع قروض على راتبه عشان يلبي رغبات ابوي..
وصاااار وملكنا...
يالله من هذا اليوم ماكنت ابيه ينتهي كان احلى يوم بحياتي ..
كنت اكلم وانا خجلانه قال لي وين راح الكلام والسوالف قلت خلاص صرنا متزوجين ضحك وقال لا ابيكي مثل ماحبيتك..
امي قالت له عجل بالزواج عشان مايصير شي..
وعجلنا بالزواج وجاء يومه...
يوم السعاده يوم الفرح يوم تحققت فيه احلامنا تزوجنا كنت عروسه كنت ابكي اقول يارب اذا انا بحلم لاتخليني اصحى منه..
بس ماطلع حلم دخلنا بيتنا لاني رفضت نروح فندق كنت أبكي مو مصدقه وخايفه ابعد عنه والله كنت اصحى من نومي وارجع اغمض عيوني وافتحهم اتأكد انه انا بحلم والا حقيقه ..
كنت بسعاده بس كنت خايفه مو مصدقه بتستمر هالسعاده...
ومثل ماتوقعت كلمتني امي وقالت لي انه بيوم الزواج صارت مشكله بين اخواني وعم زوجي واولاده وابوي تدخل وكبرت وياليت هدأ الوظع..
بس اخواني وابوي مو راضين يهدأون ويهددون ويتوعدون..
جلست ابكي واقول تكفين يمه تكفين ابوس ايدك لاتخلينهم يقربون من حياتي قالت والله يابنتي بحاول انتي عارفه اني ضعيفه ولا لي كلمه عندهم ..
عرف زوجي الموضوع وقال لي ماابي احد ينكد علينا فرحتنا وماابي اشوف دموع الحزن بعيونك خلاص ابيك تفرحين ابيك بسعاده وبس..
سافرنا وقفلنا كل الجوالات عشت ايام من اجمل ايام حياتي ورجعنا وماقلنا لأحد..
ومر شهر وصارت مفأجأه سعيده لأنه تأخرت الدوره أعزكم الله وكنت حاسه اني حامل بس قلت بتأكد..
ورحت الصيدليه واخذت جهاز تحليل منزلي بدون مايعرف قلت له دواء عادي..
حبيبي ماكان يحب يضايقني بأي شي..
ورحت للبيت وسويت التحليل وطلع مثل ماتوقعت حااامل...
ماحبيت اقول هذي المفاجاه بطريقه عاديه..
طلعت وقلت له انا جوعااانه قال تجوعي وانا موجود امري تدللي قلت اي شي قال الحين رايح..
وطلع من البيت وبيتنا كان بعيد عن المطاعم واستغليت الفرصه وجهزت شمووع وكان عندي ورود وحطيت عالسرير ورقه ملونه كانت مندفتر اهداني اياه قبل زواجنا ..
كتبت فيها
: ثمرة حبنا جايه بالطريق :
وجهزت عصير يحبه وكنت ناويه اتخبى بمكان لحد مااشوف الفرحه بعيونه..
وفجأه الباب يدق وقلبي دق معه حسيت في شي ..
فتحت الباب الا ابوي واثنين من اخواني قال امشي بسرعه قلت وين قال والله وراسي يشم الهواء انك ماتجلسي معاه دقيقه وحده بكيت قلت ليش حرام عليكم قال والله غير تطلقي منه غصب اهله هم السبب والمشكله اللي صارت خلاص هي سبب فراقكم..
ترجيتهم جلست ابوس رجولهم واترجى اخوي وابوي وسحبني مع شعري وقال جيبي عبايتك الا والله لايجي الحين ونذبحه قدامك لأني شفته طلع الحين كنا ننتظر متى يطلع برى البيت خفت عليه وقلت خلاص بروح..
ورمى ابوي جوالي بالبيت وانا اترجاه قال والله ماتكلميه ولاتشوفيه..
وكنت امسك الباب ورماني اخوي مع الدرج وقتها حسيت بدوخه والم ببطني مو طبيعي
واخذوني للبيت اخذوني لتابوتي..
جلست ساعتين ابكي واتألم واستودع جنيني ربي وشوي الا ينزل دم مني وقطع كبيره وانا اصرخ لا حرام عليكم اخذتني امي بالقوه للمستشفى لأنه أبوي ماكان راضي وكشفو علي وانا ادعي ربي يحفظ لي اللي ببطني وقالت كلامها اللي كان مثل الخنجر بداية اسقاط وللأسف ماراح يكمل الحمل لانه توه ببدايته
غدآ اكمل لكم وراح تتفاجؤن بأشياء عمركم ماتتوقعون انها صارت وبهالحياه
اللي جاي احزن من الحزن نفسه..
اعذروني عالإطاله