أقلام @aklam_1
محررة
قصتي + معانياتي بإبرة الظهر
السلام عليكم ورحمة الله وبركاته
ولو إني ما أحب أتكلم عن ولاداتي لإنه كل ولادة تترك في نفسي ذكريات غير سعيدة ابدا..وكلها ألم ومعاناة
لكني حسيت بنوع من وجوب رد الجميل لهالمنتدى الغالي علي بالذات عن غيره من المنتديات بسبب تفاعل أعضاءه
مع بعضهم البعض بطريقة ما شفتها بغيره من المنتديات وطريقة مساعدتهم لبعض بمحبة ومودة وعرض المساعدات
والخبرات والأهم من هالشي كله ...عدم تحيزه لجنسية معينة وترحيبه بالجميع من كل الجنسيات
االعربية والمسلمة بشكل خاااص ..الشي اللي إفتقرته في منتديات ثااانية
ولإني إستفدت منه كثـــــــــــــــــــــــــــير بحياتي ...من أول يوم سجلت فيه لين هاليوم وأنا مستفيدة منه ...بكل
المجالات ومن كل أقسامه والحمدلله ..وما أبالغ لو قلت إنه غير لي أشيا وايدة بحياتي
المهم :
أولا أنا ولاداتي كلها كانت أصعب من بعضها وبين كل طفل وطفل عندي يا دوب سنتين
أنا بداية حملي فكرت كثير بإبرة الظهر وزوجي كان رافض رفض قااااطع لها من كثر ما سمع عن أضراراها..وأنا كنت ألح عليه وكان يرفض ..بعدين أستجمع قواي وأشجع نفسي وأقول خلالاص ما راح آخذها وإن شاءالله ربنا بيهونها علي...لكن أرد من خوفي من الولادة اللي قبلها واللي قبلها ومثل ما خبرتكم ذكرياتهم السيئة والإنطباع اللي تركوه فيني أتراااجع وأفكر فيها
الطلق بدأ عندي 9 الصباح...كان خفيف...ظهر مفتوح ومغص في البطن ونقط دم تنزل علي...وطبعا لإنها مو ولادتي الأولى ( الثالثة ) عرفت إنه بداية ولادة
الألم كان يروح وييجي لين 3 الظهر تقريبا ..بدأ ينتظم ويحتد لمدة ساعتين ثلاث ..بعدين يختفي ساعتين ...ويرد يرجع وينتظم ويحتد...وبقيت على هالحال لين ثاني يوم 4 الصبح..وقتها صليت الصبح بفضل من ربنا وقررنا نروح المستشفى
وأنا شااااايلة فكرة الإبرة من راااااسي وقلت بصبر وإن شاءالله باخذ الأجر
لما وصلت المستشفى كان الرحم فاتح 4 سم...دخلوني العنبر لين ال 7 ونص..بدأ وقتها الألم يقصني قص....وبدأت معاناتي مثل كل مرة
كنت أحاول أطبق تمارين التنفس ( واللي سبق وجربتها في ولادتي السابقة ...) ما أقول إنها ما تنفع بالعكس كثـــــــــــــير تخفف من الألم ...( للي ما يعرفوها ..التنفس العميق والزفير عن طريق الفم) لكن هالتمارين تساعدني حتى مرحلة معينة ...بعدها خلالاص ما أقدر أسيطر على نفسي ..صوتي يبدأ يعلى من شدة الألم وأبدا أتلوى يمين وشمال من وجعي....ماااااااااااااااااااااااااا أقدر غصب من عني صوتي يعلى ..الوجع أحسه فوووق طااااقتي ..ولما بدأت الحالة هذي معااي هوووووون أنا قلت خلالالالالالالالالالالالالالالالالالاص الإبرة أريدها لإني ما كنت حابة أكرر نفس فضيحة ولادتي اللي قبلها واللي صوتي فيها وصل لأبعد حدود ونفسيتي بعد الولادة كثير تعبت لإني كل مرة أطلع فيها من الولادة أغطي وجهي من خجلي من نفسي وخجلي من الحريم والرياييل اللي سمعو صوتي برع وبالعنابر كلها
طلبت الإبرة وترجيت زوجي عليها وبدأت عندي حالة هستيرية من البكا وقمت من السرير وصارو يمسكوني لإنه الحركة ما كانت مسموحة ..لكني غصب من عني مادري شو صارلي ذيك الساعة بكاء بكاء بكاء مستمر مثل الولد الصغير..واللي زاد الطين بلة الممرضات اللي ربنا لا يسامحهم كانو يتأففون مني وجت وحدة منهم وبدأت تبهدلني ليش صوتك عالي ولا تعلين صوتك على الممرضة المسؤولة عنك خلال الولادة ولا تصرخين عليها وهالشي غير مقبول عندنا .....وأنا والله العظيم لا صارخت عليها ولا شي ...ساعتها حسيت بالذل ذل كرهت نفسي وعندت على الإبرة بزيادة ..حتى زوجي صار يصارخ عليهم على طريقة معاملتهم لي وبهدلهم وقالهم المخلوووقة قاااعدة تتلوى من الألم لالالا صاارخت على أحد ولا بهدلت أحد !!
لكني تفشلت من نفسي قدام زوجي وقدام نفسي وقلت مااااااااااااا أريد أنذل لأحد خاااصة إنه الولادة فيها تكشف وألم ..وما كنت متخيلة إني أنذل قدامهم أكثر خاصة إنه الرحم كان بعده فاتح 6 سم
المهم نادو طبيب التخدير...غطيت شعري وسترت نفسي على قدر ما أقدر...وطبعا زووجي ما رضى عن الموووضووع غصب من عنه ...وخااصة لما شااف الدكتور كشف ظهري عشان الإبرة ...لكني والله حااولت أستر من جسمي على قدر ما قدرت .......
طلب مني أجلس على السرير وأحط المخدة على بطني وعلى قد ما أقدر أنزل راسي لعند ركابي
والله يا بناااااااااااات كانو ينتظرون الطلقة ترووح مني وعلى طووول يقوووولي يلا نزلي راااسك وممنوووووووووووووع تتحركين وأي حركة فيها خطورة عليك...وتخيلو كانت تيجيني الطلقة وهو يضربني الإبرة ..........روووووووووووووحي كااااانت تطلع قداامي
بس الدكتووور قعد نص ساااعة بالظبط وهو يضرب الإبرة ...والإبرة كبيـــــــــــرة وكاااااااااااااانت تعووور ...والدكتور ما ضربني إبنج موضعي مكانها ...أنا قرأت إنهم يضربون بنج خفيف موضوعي مكان ضرب الإبرة هاي عسب تقلل من لاشعور بالألم .....لكنه كان يضربني إياها ويرد يشلها ويحاول مرة ثانية لإنه كان يحااول يووصل للغضروف على قولته بين الفقرات وما كان يقدر الفقرات كانت ضيقة عندي وكان يحط السبة علي ويقولي إرخي نفسك ....يمكن كلامه مظبوط ويمكن لا .زلكني كنت أنفذ اللي يقوله بالحرف الوااااحد... والله اعلم
بس قعد نص ساااعة بالظبط وهو يحط الإبرة ويغرسها بظهري ويرد يشيلها مرة ثانية ويحااااول ...وهكذا
لين ما فجأة ضربني وجع ......كأنه شووورت كهرباء وضربني ..وصرت أصاااااااااااااااااااااااااااااااااااااااااااااااااااااااااااااارخ بأعلــــــــــــــــــــــــــــــــــــــــــــــــــــــــــــــــى صووووووووووووووووووووووووووووووتي من الألم ...لمدة 5 ثواااااااااااني
زوجي ضغطه إنخفض وكان بيغمى عليه ...والدكتووور صااار يصاااااااااارخ
أنا قلت إنشليت...صرت أرجف وكل جسمي يهتز من الألم ..بعد 5 ثواني راحت الرجة مني والألم ...بعدها الدكتوور طبعا يصااارخ ويقوولي تحركتي إنتي اللي تحركتي ...والله العظيم يا بنااااااااات ما تحركت ولا تنفست حتى....
لكنه قالي إنه أول مرة يصااادف هالشي وأول مرة يصير وياه هالشي .....وانا أبكي من ألمي ( طبعا الطلق بعده شغاااال والجلسة هي هي بعدني عليها ..والأخ يصارخ علي ويقولي إنتي وإنتي ) وكاان زوجي واااقف وقااله ما تحركت أنا شفتها وكنت ماسكها كيف تحركت !
المهم الدكتوور قال لزوجي برايكم خلاص مافي داعي للإبرة ....لا تتفاجؤا ..لكني طلبتها وقلتله كمل شغلك أريدها
ليش !! كل هالألم وكل اللي شفته وآخرت شي ما آخذها ؟! بتقولون تهورت أو تسرعت ولو مكاني ما أخذتوها ..بقولكم بهديك الساعة ما كنت بكامل قواي ولا كامل وعيي....ويلي من خوفي من اللي شفته من الولادات الساابقة ..ويلي من الوجع وخوفي من اللي ناطرني ..وويلي من لئمنة الممرضات والوجوه الكشرة واللي قاعد يصير ويااي
المهم ...رد الدكتور يحاول معاي وقالي ممنووع تتحركين ( على أساس إني تحركت ! ) ....بعد الموقف اللي صار ..جت الممرضات وقررو هم يمسكوني ...خلو زوجي قاعد لإنه من الرعبة ما قدر يوقف على رجليه ووحدة مسكتيني من اليمين والثانية من الشمال....ونفس الشي سبحان الله تم يحاول يدخل الإبرة ويطلعها في ظهري لإنه حضرته مو قادر يوصل للغضروف بين الفقراات
آخر شي قالي هذي آخر محاولة لو ما ظبطت خلاص راح أطلع إنتي أول مريضة تمر علي بهالحالة ...وكانت هي المحاولة الناججة والفضل لله والمنة أولا وأخيرا
وكانت الساعة 9 ونص...قالي مفعولها راح يبدا بعـد ربع ساعة ...10 إلا ربع الحمدلله كان ألم الطلق مختفي عني...الحمدلله الحمدلله إرتحت وصلبت نفسي وقلت ولا إني أحتااج الممرضة الكشرة اللي عندي لا بارك الله فيها...ومن شدة تعبي ...كنت أنام وأصحى...مادري كيف مر الوقت لإني كنت كأني أحلم من التعب..ما صارت الساعة 12 إلا وبدأت أحس بالطلوق مرة ثانية ...ناديتها وقلت لها الطلوق حااامية وحاسة فيها ..قالتلي مو مشكلة ...12 ونص بدأ الدفع ...وناديت لها قلت لها بدأ الدفع قالتلي لا تدفعين بدري عليك ؟!!!!!!!!!!!!!!!!!!!!!!!!!!!!!!!!!!!!!!!!
قلت لها مو قادرة ...قالتلي لا تدفعين ؟!!!!!!!!!!!!!!!!!
زبلتها بعدين ومسكت بالسرير وقلت يااااااااارب ..وبدات أدفع ...صارت تصااارخ ربنا لا يبارك لها وتركض في الغرفة يوم جت وإكتشفت إنه البيبي خلاص راسه ظهر......راكت تركض تنادي الممرضة الثانية وجو يركضون ويلبسون ويحضرون الشرشف والسرير للبيبي ويلبسون القفااازااات ؟!!!!!!!!!!!
وبدأ الدفع ...والحمدلله حمدا كثيرا طيبا مباركا فيه ...الحمدلله أنه هو الرحمن الرحيم الكريم الأدرى بعباده ..الدفع كان على غرااار بناااتي اللي قبل ...كانت بالظبط 5 دفعات منى والبيبي نزل ..(بنتي اللي قبل 3 ساعات ونص وأنا أدفع *)
وطبعا الرااس حسيت فيه 100%...ومثل ما قلت الطلوق الأخيرة ...حوالي 3/4 الساعة الأخيرة كنت أحس بالطلوق كلها لين ما تمت الولادة كلها
وهذا سببه إنهم خففو عني دوز البنج....على العموم في ناس تولد وما تحس بالطلوق أو بالراس..حسب الدووز مال البنح لكن على العموم الأفضل إنه تشعر بالدفع عسب تساعد البيبي ...وأنا أقول أفضل إني حسيت وكان الدوز خفيف
طبعا خيطوني بعدين...ووقت الخياطة دقووني إبرة بنج ثانية موضعية ..لكني حسب ما أعتقد لإنه دوز البنج مال الظهر كان خفيف أو خففوه بعدين فاحتجت إبرة بنج ثاانية وللإنه أساسا وقت الولادة كان عندي إلتهاب وكان محتاج تنظيف وخياطة بالإضافة للخياطة مكان الولادة
وبس هذي قصتي وكثير أتضايق يوم أتكلم عن ولاداتي واللي يصير فيها ...عسب كذا ..إسمحولي ما راح أرد على أي أحد لإني ما راح أرجع للموضوع أو أتاابعه
أنا كتبته للإفادة من موضوع إبرة الظهر والتنبيه لها ومنها ....يوم تاخذونها إسألو عن اللي يعطيها ..وحاولو تتسترون وقت دخول الدكتور عليكم ....ولو قدرتم بدون الإبرة يكون أفضل ...وطبعا صلو إستخاااااااااااااااااارة عليها لإنها مو لعبة
وإستفسروا أكثر عنها وعن مضاعفاتها وأضرارها ...وإدعوو ربنا يثبتكم وقت الجد ووقت الولادة ويصبركم وما تحتاجوون مساعدة أحد غيره وتوكلو عليه وربنا يهون على الجميع
....ودخليكم تدعون لأخوي عبد الرحمن ربنا يرحمه ويعفو عنه
32
5K
يلزم عليك تسجيل الدخول أولًا لكتابة تعليق.
الحمدالله على سلامتك و مبروك المولود و ربي يغفر و يرحم اخوك ياربالحمدالله على سلامتك و مبروك المولود و ربي يغفر و يرحم اخوك يارب
الصفحة الأخيرة
الحمدالله على سلامتك و مبروك المولود
و ربي يغفر و يرحم اخوج يارب