أكيد كلبوياتكم قد سمعتوا عن ((الزير سالم)) قبلهم يحتسون عنه في المجالس السياسية وفي سوق الأسهم خاااااصة<< يدلك ان ما عندها خبر
لكن....يا هل ترى هل قد تساءلتم في جوف نفوسكم منهو هالزير سالم ولم سمي بذلك؟وماسبب التسمية وعللي ولماذا ووشوله؟؟
يمكن بعضكم دايمن تمحطها روحها بهالأسئلة..لأني أحبكم وما بين عيوني ألا انتم قلت لازم اجيب لهم العلم الوكاد يا بنت بس قصي عليهم القصة يمكن لم يعرفونها من قبل...!!
نأتي إلى القوووصة
هذا سلمكم الله هماه الزير سالم واحد<< متأكدة مهوب اثنين..ويدعى عدي بن ربيعة ويدلعونه الزير سالم وفيه ناس يدلعونه أبو ليلى المهلهل..ماشاءالله عليه مدلّع..
بس ياهو زلابه بشكل..المهم هذا الزير سالم له أخو يقاله كليب بن ربيعة << مير لو سموه ثعيلب اوجه..
عاد انت يا كليب مناسبن قبيلة بني شيبة يعني معرسن على بنتهم وفي اللغة بنى على بنتهم<< بس ترى نصابه اللغة لاتهمكم تحسب انها بيت ما تدري ذالدبا خخخخخخ<< تمون على اللغة
المهم : انت يالهدر..
الزير مصادقن أخو مرت اخوه ويصير ولد بني شيبة فلنسميه فرضا شيبان..فكان صديق الزير سالم مرررة ويمون عليه..فكانوا الهدرين يسهرون مع بعض كلبوقبل تالي الليول ويلعبون كيرم وجنجفة..ويرشخون من هالوشسمه حتى الثماله..هذي عملتهم كل يوم..لا شغل ولا مشغلة..حتى أن كليب يتكبكب ماء وجهه من اخوه..ويتفشل منه حتى انه غسل يدينه منه وشعر أن لا فائدة من الحتسي..وكان الزير سالم يسمع بالشعر..فكان ينطل أبيات غزل على بنيّ القرية ذالقليل الحيا غير آبه بخزياة الأمر(مأخوذة من قولنا يا خزياه)..
على أنه ليس بأطخم بل أنه مخيس وسربوت..مع ذلك بنات القبيلة كانوا يخقون عنده مالت عليهم..بالاضافة الى انه وصخ ما يتروش ألا في السنة مرة يخاف يصير سمكة اذا تروّش واجد..بل وإن كشته منتفشة على بعد مترين..وهيئته مبهذله وحالته حالة..
مدري وراه على أن اخوه كليب كان رئيس القبيلة..لو اني من اخوه كان تستلته وتخلصت منه..شينبغابه ذا..وكان الناس يعيشون في سلام وأمان وسعة صدر إلى أن جاء ذاك اليوم المشؤوم..ألا وهو موعد جيتي ودخولي في الحكاااااية..
تااااااابعوا معي بقية الحكاية..
كنا ذاك اليوم طالعين للنفود حنا وخوالي..وقعدنا فيه إلى أن شاءالله..ويوم شاءالله قالوا: يالله مشينا ما عاد ألا خير..قلت وانا اقشم: اصبروا توها تزين القعده..قالوا: أها بس قومي ولا يكثر..وقمت وانا ادربي راسي..
وادور جزمتي ما لقيتها..ذكرت اني ناسيتها فوق الجبل واقحص واروح اجيبها لا عادها من جزمه فلتذهب إلى الجحيم..المهم جبتها ويوم رجعت ولا العالم كافخين ومخليني..اتلفت يمين يسار ما فيه ألا غبراااااات..
أفاا ياذي النيلة المنيلة بسبعين نيلة..قلت: وش السوات ياربيه ما في ألا أني انطق في مكاني الين يرجعون..بعدين قلت لا خل روح مشي..بس ما ادل..يالله خل امشي ويسرها الله..وامشي وامشي وامشي وامشي وامشي<<علق الشريط
اليييييييما تعبت من المشي وخبقت لي هنيهاات..
وأنا اللي ألمح زولا يأتي من بعيد..واتروّع..قلت عسى ميب شيفة ولا حمار القايلة<< الحمد الله حمار القايلة في الليل..والله ولاه زول رجال ومعه ناقة..
يوم شافني وقف وقام يتلص فيني وقال:
هو: من أنتي يا فتاااااااة؟؟
أنا وانا ابولع بريقي: أنا شسمه كسرة..كسرة ملح..
هو قام يضحك..وأنا اقول في نفسي (مصلن يمصلك يا شيبة عرعر)..
هو يوم وقف من الضحك: ولماذا يا كافي كسرة فقط لماذا لم تكن كاملة؟(ويضحك)
أنا: يا ثقل طينتك تكفى..تسمع بالتنكيت أنت يا فتى؟!
هو: نعم تكلمينني؟؟!!
أنا: لا أكلم ناقتك ذالمايدزة!!
هو: أوه هههههه هذي ناقتي وتدعى(الرقطاء) وهي ناقة مدللة انتقيتها من القطيع وهي أفضل ما لدي..ما رأيك بها؟!
أنا: مالت عليك انت وياها!!
هو: ماذا تعنين بمالت مالذي مال؟؟!!
أنا: لا فقط هي حتسوة يراد بها أنها جميلة جدا..
هو: نعم نعم أعلم ذلك..لكن ما قلتي لي مالذي جابك هنا؟؟!!
أنا: القراده جابتني!!
هو: ماذا !!! القراده!!!(ويضحك)وهل تمتطين القراده يا هذي؟؟
أنا: وش قرادته قردوك بلا قردوك يا هذا؟؟!!
هو: القرادة ألا تعرفينها تلك الحشرة الصغيرة التي في شعر الجمال..
أنا: طيب بشر الوالده..صدق انك فااضي..
هو: ماذا تقولين يا مرأة من أين أتيتي وما هذه الملابس التي ترتدين؟؟!!
أنا: بس ودني لأهلي ولا يكثر..
هو: ما هو الذي لا يكثر..
أنا: انك رجلٌ قرقة لماذا لا تنطم وتدلني على الطريق؟؟!!
هو: انتي تتقنين اللغة..لكن لا ادري ما بلاكي احيانا لا اعي ما تقولين..
لكن سآخذك معي لمضاربنا كي ترتاحين قليلا ثم ننظر في أمرك ونشوف مالقصة؟؟!!
أنا: مابي اروح معك..بروح لهلي..
هو: ومن هم أهلك؟؟ماذا يقال لهم؟؟
أنا: أهلي آل ملح..
هو: ماهي هذه القبيلة أول مرة اسمع بها يبدو انكم نازحين من مكان ما..
أنا: نزحوك بلا ورزحوك..ثم قعدت اصييييح واقول : ابغى أهلي..
هو: لابأس عليك يا فتاة لاتصيحي سوف أوديك لمضاربناثم ندور أهلك لا تتروعي..هيا معي..
ثم اشار للناقة وبركت على الأرض..وقالي: هيا انقزي..
أنا: لا لا مابي تخوف..
هو: لا انها لا تخوف..فهي أليفة..
أنا : ما بي مابي اركب..جب لي حصان ولا ما بي
هو: اذن فلتنطقي..وياخذ ناقته ويروح..
أنا: خلاص خلاص والله ماعاد اقول شي ولا اتنعفق بس لا تخليني لحالي اخاف يجيني الضب..!!
هو: اذن اركبي على الناقة..
واركب ويوديني لمضاربهم يوم وصلنا ولاي مدري ويني فيه احط راسي وخمد..
يتبع