قصتي مع النحافه والعلاج اللي مايخطر على بال

السلام عليكم ورحمة الله تعالى وبركاته
انا اول مره اشارك بالمنتدى ويعلم الله اني سجلت بالمنتدى هذا الاكثر من رائع عشان افيدكم بتجربتي وان شاء الله اني اسوي شي اكسب لي من وراه دعوه بظهر الغيب وهذا احسن مابالدنيا كلها..

الاسم عمشى شليويح
المهنه راعية غنم لا لا من جد عاد اللي بعد كذا جد
انا يابنات ماخليت شي ماسويته عشان اسمن ولو كيلوين ولي باع طويل بالتجارب من كثر ما امي تجرب فيني خالاتي يعطوني وصفات بنت البواب حق المدسه تمطط لي خدودي خخخخخخ :09: :09: بصراحه شكيت اني صخله للتجارب ماني ادميه وكل هذا طلع على فشوش حبوب اعشاب خلطات بالحلبه وشي بحبوب فاتحه للشهيه بس اللي بقى الفليت ماجربته صراحه..
المهم

مالكم بطوالها جت الايام وراحت الايام وانا مثل ماكنت تخرجت من الثانوي وقلت ماني مسجله بالكليه بقعد سنه اتفرغ لنفسي واستصح واربرب لي شوي كود لاجاني معرس ما يهج لما يشوفني يحسب اني مومياء منحاشه من قبرها والله وضيعت سنه على الفاضي وياليتها جت على كذا الا نحفت ازود من اول كنت هه 40 هه 41 صرت يا 39 يا 38 والله لا يوري مسلم صرت هرجة العيله وشبلاكي قاضيه مصفره مشحبه ومن هالكلام اللي يخلي المعنويه مايحتاج تزوجت الحمدلله سنه سنه ونص والله سبحانه ما اردا اني اخلف وتجيكم السالفه والله راح تستغربون دلوني حريم على وحده تمرخ لانه الدوره لما تجيني وانتم الكرامه اصير خرقه باليه ماعاد اقدر اتحرك من المغص اللي ماينفع فيه ولو شربت دوا الخرفان الهايجه وظهري تقولين شايله كيس دقيق من الكبار بينقص نصين..
يوم شافتني المره اللي مرختني قالت وش هذا انتي كركوبه كذا ليه مثل العجز :bkh: قلت لها ما اشتهي الاكل واذا شميت الزفر تحووووم كبدي وكل شهر اقول هذا وحام من شدة حومة الكبد الللي تجيني ومعي دوخه دايم ومصفره مع اني مسويه تحاليل كامله والحمدلله كل شي عندي تمام ميه ميه ولا فراخ الجمعيه قالت لي والدوره قلت لها كذا كذا كذا

وشوفو يابنات المفااااجأه من جد
اول ماحطت يدهاعلى بطني قالت لي رحمك ماهو بمكانه قلت لها ايه يمكن راح البقاله يجيب اغراض ولا شي؟؟؟ وينه اجل قالت بظهرك والله يابنات هذا اللي صار تقول من لبس الكعوب والنطنطه تقال سكنيه هذا قبل العرس وبعد العرس يعنني من زود السنع :3_2_8v: اشيل الدورق الكبير حق المويه وانزل التلفزيون واشيله لحالي وانا عود يابس ابنكسر قالت لي عشانك نحيفه رحمك نط من مكانه مافيه شي يمسكه لا شحم ولا لحم وهذا اللي ساد شهيتك وملوع كبدك ومرختني 7 ايام وكانت تقول لي ماتاكلين شي لين اجي امرخك وقلت بنفسي مادرت اني اخر شي افكر فيه الفطور اليوم الاول مرختني بزيت الزيتون وسوت لي برنيه (كاسات هواء ) اليوم الثاني الثالث والله يابنات اني صرت اجوع من اليوم الثالث وصرت ادق عليها اقولها وينك ابطيتي ترى جعت الله يغفر لك وفعلا كلامها صحيح الله يجزاها الجنه قالت لي بعد كم يوم راح تشتهين العيشه وعلى فكره انا سالتها عن اللي ما تزوجو لسه قالت عادي المرخ زين للكل بس طبعا ماراح تمرخها مثل مرخ المتزوجه يعني لهم طرقهم المهم يابنات صرت ادور الاكل دوره بسم الله علانا صرت وانا اكل افكر وش اكل بعدها والله لا شعوري احساس غريب اول مره احس اني اكل ومستمتعه بالاكل امي صارت تدس اخواني عني لا اتخيلهم فروج مشوي ولا شي وزوجي حط لي ميزانيه خاصه للاكل خخخخخخخخخ وبعدها بشهر وشوي بس زدت من 39 الى ؟؟؟؟؟
الى 50 اذكرو الله قولو تبارك الله ماصدقت على الله اني اجمعهم دولا تحويشة العمر
تغيرت ملامحي وانا وش ملحي من اول بس صرت شي ثاني على قولة بنت خالتي تقول توك صرتي مره :icon28: :icon28: :icon28: وحتى اللبس صار لبس الحين ماهوب مثل اول احشي حشي البس 20 تنوره تحت ملابس عشان تجي قدي التنوره اللي بالواجهه خخخخخخخخخ
الزبده لا تسكتون وخاصه اللي الدوره تتعبها بزياده يكون عندها مشكله يمكن مثلي وهي ساكته عن نفسها ومعليش لو طولت عليكم بس والله حبيت افصل شوي عشان الفايده تعم والبلشه لو محد قرا موضوعي وانا توني عاد اول مشاركه لي ياسلااااااااام تصير كسحه ماحصليتش وراح اعتزل الكتابه على الساحه الشعبيه خخخخخخخ وعلى فكره فيه تمريين عشان تعرفين اذا كان رحمك بمكانه ولا لا وللفايده اللي تبيني اقولها وشو تقولي وانا حاضره من عنوني الثنيتن وانا بنت شليويح..