قصتي مع بائع المحل

سلام عليكم ورمضان مبارك والله يتقبل منا جميعاً 💕
أمانه عليكم قصتي لاتروح يمين وشمال ولاحد ينقلها لأي برنامج ماراح اقول شلل ومرض بس الله يسعدكم لاتنسخوها لأن اكثر من مره شفت سوالف عضوات هنا بالانستقرام وفيه سالفه حكتها وحده مشهوره بالسناب لعضوة هنا يعني خلاص استروا علينا مو لازم تنشروا خبرنا 😪
ندخل بالموضوع انا اشتغل بمحل نسائي كبير بمدينة الرياض وممنوع دخول الرجال وفيه قريب مول تجاري اغلب وقتي فيه واتعشى فيه واشتري منه واذا تأخر السواق انا هناك وكل من في المول عرفني وحفظني والله ما أبالغ كللللهم من رجال أمن وعاملين سواءا اجانب او سعوديين وحتى النساء ويعرفوني بالأسم ويتكلمون فيما بينهم عني يتساءلون عن وضعي من فين اجي متزوجه ولالا وكذا ، وطبعا بما أني اروح بكثرة صرت زبونة بعض المحلات واتردد عليها كثير وفيه محل يبيع كل مايغري الانثى ف انا نشبت له كل يوم اروح اشتري مره ماسك مره سنفرة مره جهاز للشعر ومره اخذت خيمة ساونا وماقدرت اشيلها قلت لصاحب المحل انا بروح وبرسلك السواق ياخذها بس مدري اي وقت ارسله قال قولي لي قبل عشان اجهزها قلت مايحتاج بس يجيك اعطه قال خذي رقمي وقبل يجي علميني قلت اوك واخذت الرقم وسحبت عليه ماقلت له ومرت الأيام والشهور وجا ذاك اليوم اللي ابتلشت بماسك ماعرفت طريقته ومن ورا مكتوب كله كوري او مدري ايش ذيك اللغة واروح ارسله ع الواتس سلام عليكم انا فلانه اخذت منك اليوم ماسك وش طريقته وشرح لي الطريقة ومن يومها بدا يتكلم معاي وانا اسلك له بشكل مو طبيعي ومنحرجه ازبد له او اعطيه بلوك وانا كل يوم بالمول اسرح وامرح ولا احظره ومن بكره عنده اشتري ماسك ! حسيت صعبه استمر يرسل اطنشه بالساعات ولّا ارد اليوم الثاني برد بارد على امل انه يمل مني وماعاد يرسل بس استغربت انه قال بعطيك شي واتمنى من كل قلبي ماترفضينه انا جاني فضول قلت وش الشي ؟ قال تعالي بكره وخذيه رحت وعطاني هديه اخذتها وفتحتها كانت عبارة عن سوارة ماركة قيمتها ألف وشوي 😑 استحيت مره وشكرته وانا وجه فقر قلت له غاليه مقدر اخذها برجعها ولاتردني تكفى 😅 قال منتي مرجعتها ولافيه شي يغلى عليك لو تطلبين عيوني وانه يحبني ومن ذا الكلام وانا تسليك تسليك إلى ما لانهاية وقلت كذاب وبعدها بكم يوم كلمني وقال عندي لك شي ثاني تعالي خذيه طنشته ورحت المول عادي وكنت مع صديقتي اسولف وقبال محله يشوفني ( صديقتي ذي تشتغل بالمول قدام محله ) ويرسلي ع الواتس خلي السوالف وتعالي وانا مسوية مجنونه ما اشوف وجات عيني بعينه وأشر لي بيده وحسيتها في وجهي مافي مفر ورحت عطاني كيس قال لاتفتحينه الا في البيت وبتلقين منديل لاترمينه وحرص علي اكثر من مره على المنديل قال خليه معك طول العمر لاتعطينه احد ولايضيع منك انا خفت مره قلت وش ذا المنديل لايكون حاط لي سحر اخذت الهديه ومتردده افتح ولا ما افتح وبما اني ملقوفه اكيد فتحت وش تحسبون 😂 لقيت قلادة ذهب وانصدمتتتتت قلت ذا منجده يحبني ولايستهبل مخلص فلوسه علي ولقيت المنديل وكان عليه بقعه سودا وكان فيه بيوتي بلندر عاد وقتها افكر وش جابها عرض ذي وبعدين قال لي انه شافني ماسكتها عند صديقتي وفكر انه خاطري فيها وحطها 😅 المهم انا للمره الثانيه وجه فقر ماتعودت يجيني ذهب هديه قلت آسفه برجعه هو والسوارة ولاتعطيني شي بس بأسلوب ذرب وانه لاتكلف على نفسك وكذا لقيته اخذ بخاطره وزعل مره وحلف انه ماياخذ شي واي شي يعطيني اخذه وانا ساكته قفلت الموضوع واستمر هو بالهدايا عطاني اساور وساعات وعطور وشنط كلها غالية وشرالي مكياجات وفرش من ذا بالم وفوكس وماك واشياء من محله ببلاش اجهزة شعر وماسكات واشياء كثير لين جا هذك اليوم اللي ماتحملت قلت مايصير كذا انت ماقصرت معي والله يسعدك انا ماقدر اخذ منك شي ولااقدر اتواصل معك اعذرني وحتى محلك ماقدر اجيه وبكره كل الهدايا بجيبها لك ، كانت ردة فعله انه زعل قال انا والله العظيم احبك لو ما احبك ماسويت كذا ولا خسرت نفسي وانتي غالية عندي فوق ماتتصورين قلت له انت كذاب وعطيته كلام قوي حسيت بتأنيب الضمير بس قلت لازم عشان انهي المصخرة ذي قال الله لايسامحك انتي ماعندك قلب ولا احساس وشايفة نفسك ولاترجعين الهديا مابي شي ، واليوم الثاني رحت بكيس كبيييير يالله اشيله حطيت كل شي وعطيته تدرون وش صار 😑 عطاني كيس هديه ورفض ياخذ الكيس اللي معاي😕 انا انهبلت توقعت بيطردني بيقول وش جابك ولاهو مستقبلني بهديه ، وماخذت هديته الجديدة وخليت الكيس اللي جبته معاي في الارض واتجهت للباب بطلع قال بتاخذينها يعني بتاخذينها ولابجيبها لين سيارتك ولابحطها عند صديقتك تناقشنا كثير وحسيت اللي برا لاحظو ولفتنا الانظار والمحل كله قزاز ومكشوف اخذته وانا زعلانه ومصدومه قلت على الكلام اللي امس ماعاد بيطالع في وجهي حتى ، المصيبة يابنات تدرون هديته وش طلعت ؟؟؟؟ طقم ذهب وقسم بالله ما اكذب😑 يعني هذا الانسان مدري كيف يحس ومدري كيف يفكر احيان احزن عليه مره واحسني قاسية واقل ادبي عليه بس والله هو يجبرني ويضغط علي لأنه مايفهم كلمة لا حاولت انهي علاقتي معاه مو راضية تنتهي طالما انا ب هالمحل ودايما متزاعلين والسبب اسلوبي جاف وبارد معاه وقاسية زي مايقول هو يشوفني شايفة نفسي وانا لا والله بالعكس قلبي يوجعني يوم اعامله كذا يعطيني ومو مقصر علي بشي وفيه مواقف كثيرة ماذكرتها كان واقف معاي وساعدني يعني احس اني كلبه وذالته واحس بتأنيب ضمير انا نفسي يصحى على نفسه ومايسوي كذا والله افكر اقول انا وش سويت له وش عطيته ما استاهل يسوي لي كذا يعني يابنات والله مافي اي مقابل لو انا اعطيه شي او اخذ مني شي كان قلت مصلحه بس ولاشي حتى كلامي يجيب المرض معاه وهو محترم ماعمره قل ادبه ولا جاب طاري الجنس ولا قال بقابلك ولاقد قرب مني او مسك يدي ماشفت منه الا كل خير بس محيرني تعامله معاي يعني تخيلو بالليل يكون زعلان ومنفجر ويقول ماعاد بيكلمني والصبح يشوفني اشتري من الكشك اللي يبيع عصير وايسكريم وكذا يجي يقوله على حسابي والهندي صديقه ومتفق معه ان كل شي اشتريه على حسابه وماعاد ياخذ مني ولا ريال ومره حس اني متضايقة ناداني ولما رحت سألني وشفيك متضايقة اذا ناقصك شي انا موجود وعطاني فلوس ومارضى ياخذها ياناس والله اني ما استاهله 😑 والحين يقول لي اغراض العيد علي ومصمم ، احيان اخذ قرار اني اصد واحظره بالواتس ويرسل لي رساله على رقمي كلها عتاب وكلام طالع من قلبه يخليني اشيل الحظر غصب ويقول كسرتي قلبي ومابي منك شي بس كلميني بأسلوب ولاتجرحيني ومدري ليه ماتشوفيني شي وما اسوى عندك انا احبك بجنون ومستعد اسوي اي شي عشانك والله يابنات هذا كلامه مازودت حرف هو ماقاله برساله وحده ولا وقت واحد بس هذي بعض الجمل اللي يقولها لي وتبغون الصراحه محسسني بقيمتي اكثر من اهلي ايش اسوي فيه انصحوني كيف اتعامل معه وكيف انهي اللي بيننا ادري انه غلط مع العلم انه غصبا عني صار له مكانه بقلبي طبعا مو حب يمكن صديق او اخ واتمنى له كل خير وترى والله العظيم ماكذبت بشي واكتب وانا صايمة وهذا اللي صار معاي ولاحد يقول اتركي شغلك مقدر محتاجته والمول حاولت مليون مره ماروح وتلقائي رجلي توديني وبعد تعرفت على صديقات هناك اروح لهم وبس هذي قصتي ورجاءا لاوحده تسب في اخلاقي وشرفي