قصتي مع تكيس المبايض

ياهلا وغلا
بحكي لكم عن تجربتي مع هذي المشكله الله يبعدها عن كل بنات المسلمين ,,
اولا انا متزوجه وبداية اتفقت مع زوجي نأجل سالفة الحمل لفترة عشان ناخذ راحتنا ولاحقين عالعيال ,,
كملنا سنه من زواجنا وبعدها حنيت اني اصير ام ويكون معاي طفل يشاركني حياتي وتركنا المباعدات وما صار حمل ..
هنا قررت اروح للمستشفى واقابل دكتورة النساء وبعد الفحوصات للاسف تبين ف السونار عندي تكيس حول المبايض درجة متوسطه,, بعدها قررت الدكتوره استمر ع علاج لمدة 6 اشهر وهو اخذ حبوب جلوكوفاج 500 مرتين فاليوم مع حبوب الفوليك ونصحتني اسوي رياضه اقل شي امشي كل يوم نص ساعه مع جدول غذائي..
واستمريت ع هذا العلاج مع المراجعه وخف التكيس بنسبه بسيطه بس بعد ما صاار حمل وانا كان ودي احمل طبيعي بدون اخذ كلوميد او ابره تفجير زمع هذا قلت اجرب عسى يصير حمل وجربت اخذ كلوميد مرتين باليوم وما صار حمل وبعدها قررت الدكتوره نجرب الابره التفجيريه وما صار حمل مع العلم حجم بويضات مناسب جدا بس ما كتب ربي ...
سافرت للهند عشان افحص مره ثانيه واتأكد من وجود التكيس واذا ف حل غير هذي الحبوب ,, رحت عند استشارية لامراض النساء وسويت كل الفحوصات المطلوبه فحص الدم الزراعي والسونار وتبين ان نسبه التكيس عالمبايض خفيفه ويمكن يصير حمل وسببها هي تراكم الدهون ف منطقة الحوض مع العلم ان وزني ما اوفر يمكن زياده عن الطبيعي ب 5 كيلو بس ف نصحتني ابتعد عن اكل الفاست فوود والعيش (الارز) وقالت لي ان مرض التكيس هو صديق مع الارز ويزيده .. وقالت ان حبوب الجلوكوفاج هي انسب شي ل حالتج واستمري عليه بالاضافه اعطتني فيتامينات لي و لزوجي من ضمنها الفوليك واستمريت ع هذا العلاج تقريبا 4 شهور ,,
واشتركت ف نادي رياضي عشان اخفف وزني شوي واحرق الدهون المتراكمه وهالشي ساعدني جدا ,, وبفضل الله حملت بعدها طبيعي بدون اخذ لا كلوميد ولا إبر بعد ما اكملت سنه و 10 شهور بالضبط ..نصيحتي للحريم ضروري الفحص المبكر لان اذا اكتشفتي ف تكيس ببدايته راح يسهل علاجه واذا اهملتي المشكله راح يصعب عليج بعدين وعليكم بالرياضه الرياضه نفعتني جدا مع جدول غذائي متوازن وعسى ربي يفرح قلب كل وحده خاطرها ف ضنى ..
وحاليا انا ام ل بنوته عمرها 5 شهور ربي يحفظها لنا ويرزقنا برها .,,