قصتي .. وعقدتي ..... للحكيمات فقط

السلام عليكم ..


عندي مشكله مع زوجي واتمنى ردود حكيمه وعاقله بعيد عن السب والتجريح


انا انسانه الحمدلله املك جمال ملامح ماشاء الله والحمدلله لكن بشرتي قمحيه مايله شوي للاسمر
المشكله بدت من الصغر
امي دايم تقول لي لاتلبسين فواتح انتي سمراء واذا لبست تقول غيريه طالعه سوداء فيه
وكانت جدااا حريصه على لون ملابسي
وهالشي حطمني وكنت ابكي لاني اميل للسمار
هي جاهله شوي وتبيني اطلع كشخه الله يحفظها
وعماتي جدا جدا بيضاوات كانوا يحسسون امي ويقهرونها
كبرت وكبرت هالعقده معاي
وصرت اعتبر سمارتي شي معيب فيني
لدرجة ان ملابسي كلها غوامق وكم طويل
واذا جلست اطالع ببشرات الحريم وبشرتي
اذا شفت سمراويات افرح فيهم ان معاي احد طبعا انا عائلتي عايلة بيضاء وشقار وجمال ماشاء الله
المهم ياطويلات العمر
انخطبت وتزوجت واحد ابييييض واهله بيييض وشقار وهم يقربون لأمي
علما بأني رفضت بالبدايه بسبب ذالشي
بس استخرت وتوكلت على الله


وكنت متخوفه صراحه....معقده
وتفاجأت يوم ملكتي الا ام الزوج جايتني
وقالت .. شوفي ياحبيبتي
انا ولدي كان يبي وحده عاديه مايبي الجمال ...الجمال عندهم البياض طبعا .....


لأن بالعربي اهم شي عندنا الاخلاق
ويكفي زوجت ولدي الكبير جميله لكنها اخلاق خايسه
فاخترناك لكذا


كلامها حطمنننننني جدا
توقعت اني اعجبته
للعلم خطبوني من عيال عمومتي وكان واحد فيهم يحبني موووت ومعجب بحلاتي وسماىتي لكني رفضته بسبب انه مايصلي


وكنت ببطل بسبب كلامها لكن امي كانت تقول لاتفكرين بكلامها


تزوجت طبعا
وطلع زوجي يحب البياض بس ماقال لي هالشي


طبعا كان خجول ولااذكر انه تغزل فيني يوم عرسي وقلت يمكن اني شينه بعينه


تزوجت اخته وتحنت بيدينها
ليلة الحنا جاني يمددددددح بجمال اخته وجمال الحنا بيدينها وانه زاهي ومدري ايش
فجبرت بخاطره وجاملته
دخلت الحمام وبكيييييييت لاني ما اقدر اتحنى بسبب اني اميل للسمار
عنجد عقددددددده
تأصل هالشي فيني وصعب يروح
قولوا لي غبيه لان هالعقده عنجد غباء بس متغلبه علي


المهم .. كنت البس واكشخ لكن البس قصير او مشلخ لاااااااااااا


يوم من الايام لبست لزوجي وحاولت اتغلب على العقده
لبست قصير وبلوزه مشلخه
واستقبلته وكان عااااادي جدا بارد
وراح نام علطول
بعدما صحي
خبرني بسالفه وكان قصده يكون مخلص معاي
طبعا هالكلام اول العرس
قال جاتني بالعمل موظفه معانا وجلست معاي
وجلست تسب السعوديات انهم فاشلات وشينات وتقارنهم ببنات كندا ان جمالهم طبيعي
والسعوديات مكياج وعلى كذا كسولات ببيوتهم ويكلفون على ازواجهم بمقاضي ومدري ايش


وبدت تمدح بنفسها انها ام لخمسة اطفال وزوجها قعيد على كرسي
وان ربي خلقني بجمالي الطبيعي
واني ماعمري فكرت بشغاله على وظيفتي وتعب عيالي وزوجي
ومن هالكلام مافهمت وش قصدها يوم تتكلم مع زوجي كذا


حقددددددت على زوجي يوم رد عليها انه مو باين عليك انك ام خمسة اطفال
وصارحني بهالشي
بكيييييت وسبيته وسبيت اهله حاول يراضيني رفضت وحلفت ماعاد البس له وانه مو كفو اضيع وقتي علشان اكشخ له
واهملت نفسي بعدها وحسيت بإكتئاب ماخليت شي ماجربته علشان اصير بيضاء جمالي ناقص بنظري


الى يومنا هذا وانا مهمممممممله لنفسي وتعرضت لمواقف مع زوجي وزادت الحاله
زوجي يحاول يحسسني اني عادي حلوه
بس يقهرني يوم يدقق ببشرتي بنظراته


وصار موقفمؤلم فيه انفجرت خلاااااااص
فتحت جواله ولقيت بقروب اخوياه صورة وحده ترقص وتسرب الفديو مسكينه
وتعاليق اخوياه انهم ماجاهم النوم بسبب جمالها


وزوجي له تعليق يمدح بشي فيها للاسف مو فيني


بكيييييييت ومسكت جواله وحاسبته
ومن بعدها منعته من اشياء فيني مدحها في البنت
وصرت ابكي اذا قرب مني بهالاماكن


وصار يلعن بالجوالات
وانا تعقدت زياده


ما ادري وين بوصل احس بالغباء لكن شعور الام والتحطيم والحزن اني سمراء كسرني ومو قادره اتغلب عليه


وللعلم الشي اللي زادني على حالي ان جسمي مو موحد


تعباااااااانه نفسيا ومكتئبه
ساعدوني