السلام عليكم ورحمة الله وبركاته
طبعا انا ابغى اقولكم عن قصصي في ايام الطفولة الله لا يبلانا بس :blink:
اول قصة افتكرها في وحدة طبعا الله يستر عليها قالت لماما بنتك توصل كلام :S_45:
وانا ما ادري عن شئ المهم كانت في علبة فلفل احمر مطحون زي المخللات وكدا والعلبة من يوم ما ماما جابتها محد فتحها المهم طليت فيها قولت دي العلبة محد فتحها طبعا انا ماكنت اعرف انو اليوم الموعد الا جاءت ماما في الليل هيا وخالتي خالتي دركتني تدريكة مصارعين ما شاء الله عليها تلعب تكواندو وماما طلعت العلبة الي فيها الفلفل المطحون ودخلت يدها كلها بالعلبة وفكت فمي ودعكتو في فمي دعك المهم جلست تسب فيا بالسعودي والمغربي وتقولي توصلي تاني كلام :icon33:
وانا بس ابكي و زي الاطرش في الزفة اقول ايوا ومو فاهمة ايش الحكاية :(((( المهم بعدها حرمت افتن او اوصل كلام :p
تاني قصة دي سويتها و انا في التمهيدي كانت المدرسة حقتنا الله يذكرها بالخير تجلسنا حلقة ونجلس ندرس او نتكلم المهم كانت جنبي صحبتي ولقيت خرزة في الارض على شكل لؤلؤ المهم دخلتها في اذنها وياسلام طبعا انا مع الخيل ياشقراء قولت لها حتى انا اعرف ادخلها في اذني المهم فضلنا على دا الحال الين مانشبت في اذني < نهاية اللقافة :blink:
طبعا قولت لابلتي العسل ونادت المديرة جو معايا تقريبا 4 ابلات ابلة نسيت مين هيا وابلة صحبة ماما و المديرة و الرابعة نسيت من هيا برضو ودوني مستوصف اهلي ماعندهم دكتور روحنا مستوصف حكومي حولونا على مستشفى الملك فهد على ما اعتقد بس كان في بساط اخضر وطلعنا وروحنا عند دكتور الاذن جاب شئ زي السنارة بس نحيف و شفاط مرة نحيف جاب الشفاط وحطو على خدي وقلي لاتخافي دا بارد وهواء بس لاتخافي ياشطورة :blink: وانا كالعادة زي الاطرش في الزفة المهم مدري ايش قربع في ادني وطلعت منها بسلام لا وفوق دا طول الطريق اقرقر والابلات يمشوني :icon32:
اخر قصة صارت لي في رمضان ان شاء الله محد ينحط في الموقف دا لقيت كعب يجنن ناعم و كعب زي الي هابين فيه البنات دي الفترة المهم شوفت الكعب خقيت لقيته في بريشكا المهم هما حاطين زي الكراسي تجلسي على الكرسي وتقيسي المهم انا من الكسل الي فيا كنت لابسة فلات اخدت الكعب وجربتو بس في رجل وحدة الله يعزكم الا تحصل الكارثة لايوجد توازن صرت واقفة في الهواء ابغى امسك نفسي مني قادرة المهم ما ادري كيف مسكت نفسي فجاءة والحمدلله ماطحت على وجهي ولا كان رحت فيها لبست الفلات ورجعت الكعب قولت خليك مكانك عساني لا لبست كعب صرت كل ما اشوف الكعب اهرب من المكان :blink:
دي البعض من القصص الي حصلت ليا ولا انا قصصي ماتخلص والي عندها قصة تضحك تقولها
براءة اططفال
انا مو مفتكرهه شئ ابداً
ع العموم كنت مممممممرآآ شقيية
><"ههههههههه