قصه ولادتي اللي تعسرت بسبب الحلتيت .. والحمدلله على كل حال

السلام عليكم ورحمة الله
اشكر كل من سأل عني و تحمد لي بالسلامة وعقبالكم تفرحون بشوفه اطفالكم

مابطول وهذي القصة
يوم السبت تبخرت بحلتيت وكان الطلق كاذب وانا احسبه حقيقي . يوم الأحد الساعه 3العصر نزلت على افرازات ولاكان فيه طلق قوي لما جت الساعة 7 قلت بروح اتطمن وبدا معي طلق خفيف شميت حلتيت و رحنا المستشفى كشفوا علي بالطوارئ وبدأ الطلق يزيد ويزيد والرحم 3 سم قالوا تنويم ولادة رحت جناح الولاده وبدأ الطلق الحامي يشتغل فيني وكان طلقي انا بدون طلق صناعي ولكن للاسف عنق الرحم مايستجيب كانت قوه الطلق ممتازه اربع طلقات في كل 10 دقائق ولكن الرحم مايفتح الا 1 سم كل ساعة ونص وهذا اللي تعبني و حير الدكاتره و قالت الدكتوره انتي وش مستعمله قلت حلتيت و قالت أكثر من وحده تستخدمه و تنتهي بعمليه لانه يحمي الطلق ولا يفتح الرحم مع اني استفدت منه في ولادتي السابقة وجت وحده مثلي مستخدمة الحلتيت و كمان الدكتوره عاتبتها المهم لما صارت الساعة 2 بالليل والطلق جنني والرحم لسى 3-4 سم وبديت اتعب و اخذت ابر مسكنه و غاز مضحك مسكن للالم وبرضو كان الطلق مؤلم جداااا لدرجه صعب علي تحملها و ركبوا لي قسطرة بول لاني حسرانه و لا اقدر اتبول اكرمكم الله لما جاء الصباح وانا على هالحال تقريباً الساعة 8 كان الرحم فاتح 7 سم يعني استجابه بطيئة جدا و بعدها بدأ الكرب و تعسر الولاده استمر الرحم 7 سم 3 ساعات قرروا الأطباء عملية قيصريه لان الجنين تأثر بالطلق و الابر المخدره اللي خذيتها خدرته هو بعد انا هالوقت من طول المده و حده الالم وصلت لليأس و صرت اقول للطاقم الطبي انا احتضر انا اموووت ساعدوني واكرر انا اموت انا احتضر و جتني القابله فلبينيه مسيحية وهي ولدتني ببنتي كانت بتضربني على وجهي تقول لاتخلي التفكير السلبي يأثر عليك بتولدين و بتشوفين طفلك بس انتي قولي يارب الله وحده يقدر يساعدك محد بهالغرفه في يده شي الامر كله بيد الله سبحانه و طلبوا لي ابره الظهر و جهزوا غرفة العمليات و لبسوني لبس العمليات وانا اردد يا نار كوني برد وسلام على إبراهيم و اقول يالطيف ياخبير المهم وجاني احباط ياعوينتي اخرتها عمليه فجأه بدأت احس بشعور الدفع و قلت لهم انا بدفع و صرخوا لا تدفعين انتي 7 سم لو دفعتي بيتمزق الرحم و تسببين لنفسك مشكله ولكن غصب علي زحرت زحره وحده و فعلا ورتني بدايه النزف و بعدها سبحان الله وقت مابي انتقل للعمليات جتني رغبه بالدفع ثاني مره وفلت انا لدفع وقالت بتشوف كم وصل قالت ماما انتي 9 سم لاتدفعين خليني احضر الطاوله واغراضي و طبعاً الطفل متخدر وصاروا يهزون بطني وانا اصرخ واشد شعري من الالم وصرت ادفع ادفع ادفع طلع الراس وكان الحبل السري ملفوف حول رقبته و حرروه وطلع الطفل بس كان مختنق و طول ما صاح وانا بعد هالتعب كله احاتيه وقول وشفيه وشفيه ومايردون علي وبعدين جعل والدينا بالجنه
واحب اقولكم كل هذا من قل صبري واستعجالي على نفسي ولكن كل شي مكتوب ومقدر وارجوكم احسنوا الظن بالله واتمنى قصتي ما تخوف البكاري والله يقومكم جميعاً بالسلامة