السلام عليكم ورحمة الله وبركاته
مبروك الملف الجديد بجد البدايه ما شاء الله قويه وفى اسماء جديده منوره معانا
بجد ايمان برنامجك ما شاء الله روعه تقريبا فكرنا قريب لبعض انتى سبقتى وقلتى
كل ال عاوزه اقوله للبنات لكن حا اضيف حاجتين
الصدقه مبلغ يومى فى الحصاله وليلة العيد تخرجيه لاى فقير ولو حابه تخرجيه يوميا
كل واحده حسب ظروفها وعايزين نتفق على حاجه مهمه
كلنا من بداية الايام نبدأ الكتابه
الله اكبر الله اكبر لا اله الا الله الله اكبر الله اكبر ولله الحمد لانها سنه مهجوره فى ايام العشر
ونرددها فى البيت طول اليوم وولادنا معانا
وحاجه كمان هى قيام الليل حتى لو ركعتين موظفه ووقتك ضيق صليها بعد العشا
او قبل النوم بربع ساعه المهم لازم ان شاء الله نصليها
نيجى ليوم عرفه ده نعمل له برنامج مخصوص لانه يوم غير اى يوم
اكيد كلنا لنا مواقف وايام معينه محفوظه فى الذاكره
كذلك يوم عرفه يوم غير اى يوم فى حياتى محفور فى قلبى وذاكرتى
وفعلا لما حيت عرفت سر بكاء بابا بشده يوم عرفه كنت معتقده انه نوع من الخشوع
لكن بعد ما جربته فى الحج وعشت مشاعره لقيت نفسى ببكى بشده يوم عرفه
بكاء كله شوق وحنين وخشوع لهذا اليوم ربنا يرزقكم جميعا بالج ويرزقنى يارب
أنا الحمد للح حجيت من سنتين كانت وقفة عرفات يوم جمعه
كنت طول الطريق فى سفرى بدعى ربنا انى اذوقك لذة الخشوع والعباده
وطول الطريق معايا كتب عن المناسك وتقريبا بذاكر
فكنت محتاره فى رمى الجمارات ويوم عرفه حا يكون ازاى
وفعلا يوم عرفه كان طول الوقت قراءة قرآن ودعاء وتسبيح واستغفار
كان اليوم متنوع بين الثلاث حاجات ولما تمرى ببصرك على كل المحيطين
اما بيقرا فى المصحف او رافع ايده بالدعاء ويبكى فكان يوم كله خشوع
وحصل موقفين كان فى معانا مايه وفى ناس كبار فى السن بياكلو فعطناهم
كل المايه ال معانا والله مجرد ما خدو المايه لقينا قزايز مايه نتتحدف علينا
فاستغربنا وعلى فكره كنت انا وصحباتى قاعدين بره الخيمه لانك براها بتحسى فعلا بروحانيات اليوم
وكان معان عصير وبسكوت وفى ولد مش عارفين لهجته يبدو هندى بيشاور عاوز حاجه مننا
عطناه كل الاكل ال معانا بمجرد ما عطانا ظهره والله اتحدف علينا نفس الحاجات ال الولد خدها
لكن اضعاف وخلاص مقلربين ننزل من عرفات عايزين نوزع اللاكل ال معانا كل ما نوزعه يرجع اضعاف
فقررنا خلاص بلاش نوزع اكل لان حا نشيل ازاى والكميه كل مره فى الزياده
ومر الوقت زى الحلم الجميل وباقى ساعه علىالغروب كلنا عشنا مع الله دعاء بشده وبكاء
والمكان بقى فيه هدوء وسكينه غير عاديه كأنه خالى من البشر ومرت الساعه دقائق لاكنها كانت خلوه مع الله
ولذه لا توصف خلاص الغروب بدأ قالو يالا استعدوا عشان حا ننزل والله كان وقت النزول له
رهبه وخشوع غريب تخيلو مكان فيه ملايين والله هدوء وسكينه غريبه اللون الظاهر هو اللون الابيض
لا يوجد صوت لبشر فقط صوت حركة القدم جميع الناس فعلا ما حدش شايف حد كله فى عالم آخر
وفقط الشفايف هى المتحركه دعاء وتسبيح المشهد زلزلنى وبقيت ماسكه فى زوجى واقول له
انا حاسه انى بتفرج على يوم القيامه نفسى نفسى بالرغم من وجود الملايين لكن المكان يبدو خالى من شدة الهدوء
وكلنا بقينا فى حاله غريبه هو ده شكل يوم القيامه
ونزلنا من عرفه على مزدلفه قررنا نا خدها مشى هروب من الزحام كنا اربعه نساء بأزواجهم المسافه تقريبا
تسعه كيلو ما حسناش بالطريق وكان المشى ممتع جدا لانه كل تلبيه وتسبيح
وجمعنا الحصوات من مزدلفه وصلينا المغرب والعشاء وكانت ليله برد رهيب
لكن كنا فى قمة التعب والاستمتاع متلذذين بالتعب لانه فى سبيل الله
ثم توجهنا لمنى لرمى الجمرات كل من حج قبلنا نصحنا بلاش توكلو ازواجكم فى الرمى
لانكم حا تندمو وتحزنوا جدا لانكم ما عشتوش المشاعر دى فكنت متعجبه من كلامهم
ومحتاره ياترى ايه اللذه ال فى الرمى
ومشينا على الجسر مشوار كبير ووصلنا لمكان الرمى منهكين من التعب
لكن بمجرد وصولنا تبدل حالنا تسمعى صوت ثابت ومنظم ال هو صوت الحصى
لكنه يزلزل كيانك ويقشعر له البدن له رهبه غريبه وتبداى فى الرمى الحصى بحجم الحمصه
وترفعى ايدك وتقولى الله اكبر لكن كأنها اول مره تكبرى تزلزل الكيان وترمى الحصاه مشاعر غريبه
مش انا انا اتبدلت من واحده منهكه من المشى وبترمى حصاه صغيره لكن بترميها بمنتهى القوه
وحاسه انها مش حصى هى قنبله بقل قوتك بترميها وكل جسمك بيتزلزل
وبعدها نتجه للقبله وندعى فالدعاء مجاب ونبدا ننزل من الجسر نعود لوضعنا الطبيعى
من شدة القوه لشدة الضعف فمشاعر الرمى غريبه وكلنا حاولنا نوصف حالنا قولنا نفس الاحساس
يارب يرزقنى بالحج ويرزقكم جميعا ويرزق كل مشتاق
فا حا نحاول ان شاء الله يوم عرفه نعيشه بالمشاعر دى وانا واثقه كلنا حا نقول
نفس الكلام يوم غريب كله رهبه وخشوع
وتقبل الله منا جميعا صالح الاعمال
اللهم اعنى على ذكرك وشكرك وحسن عبادتك

انا رجعت للملف السابق لانى حسيت بتتكلمو على موضوع مش فهماه
نيرمين كلنا مسلمين يعنى بيربطنا دين واحد فدى اقوى رابطه
ولغتنا واحده وكلنا معاكم بقلبنا وانا عارفه ان ده اضعف الايمان
وكلنا فرحنا جدا انك من غزه عشان نقرب للصوره اكتر ونعيشها
من خلالك وانا عن نفسى بكون عاوزه ارد على الكل لكن فى ناس
جوايا فى قلبيى لكن بنسى ارد عليها بمشاركه اكيد لضيق الوقت
او ابنك جنبك بيشد فيكى جعان فانتى فى عيونا وقلبنا وكلنا بنحبك فى الله
مادو بجد الغيبه طالت يارب يكون المانع خير ويارب تشاركى معانا عشان نشجع بعض
ونشد الهمه فى الايام الكريمه كل البنات مواضيعكم رائعه وبسلم على الجميع
بدون ذكر اسماء عشان ما انساش حد وياريت اول ما تعرفو اذا كان بكره بداية العشر
تقولو عشا نتسحر

الله اكبر الله اكبر ولله الحمد الله ولا اله الا الله


عروس بارك الله فيكى

وجسمى كله بيقشعر وحاسه انى ببكى الله من الفرحه يارب اوعدنا وبابا وكل الحجاج يجوا بالسلامه



ميرو شكرا يا قمر


نرمو يلا تعالى يا عم يعنى لازم نتحايل عليكى



ياريت تبلغونا بالخط العريض امتى اول الصيام

السلام عليكم يا بنات


ايمان

ما شاء الله تبارك الله عليك بجد كل حاجة قلتيها لازم ان شاء الله اعملها

وانا كنت ناوية من غير حاجة بس كلامك حمسنى وشجعنى اكتر

ربنا يجزيك الخير ويوفقك في حياتك

عروس... كلام اثر في جدا وانتى بتقولى هو دة شكل يوم القيامة مش ممكن تخيلت المنظر
ربنا يرزقنا بالحج يارب

نرمين... احنا كلنا بنحبك بس الواحد فعلا بينسى يرد على بعض المشاركات خليك معانا وطمنينا عليك

عطر

كريم النخاع دة دخل دماغي مع انى قريته كتير ومافكرتش اعمله عشان الريحة بس طريقتك حلوة اوى

هايا

انا بعلم بودى الحاجات دى زي ما قلتى بس بلاقيه بيفهم اللعب بطريقة تانية هو دة قصدى

سما

الحمدلله انك بخير يا قمر والماسكات حلوة

بلو روز

حمدالله على سلامتك وازى ماما طمنينا عليها

ماشاء الله لا قوه الا بالله
انا حاسه البدايه مريحه للنفس و مبشره بالخير
رغم اني جيت متاخره بس اسعد
لاني قريت وصف عروس عن الحج بعد ما كنت قريت المقدمه
فالاحساس كان رهيب و حقيقي شعرت بقشعريره و شوق رهيب
لكل طاعه تقربنا لله
اللهم ارزقني و كل من تقرا كلامي بالحج
اللهم اذقنا لذه الايمان و حلاوه الخشوع
اللهم جمعنا في الفردوس الاعلى
اللهم بارك لنا فيما رزقتنا و قدرنا على طاعتك و حسن عبادتك
اللهم ارضى عنا و اغفر لنا

لا اله الا الله و لله الحمد