ايه ده انا حسة ان انا اللى بتكلم هو فيه حد بيقعد يعيط لوحده غيرى فى الدنيا دى :icon33:
ويا ريت حد حاسس يلا ما علينا

انا تقريبا بعمل زيك يا رانيا بس دايما ضميرى بيأنبنى وحسة انى ممكن اديهم اكتر من كده
بس القعاد فى البيت حاليا شبة مستجيل
انا بفكر لما الفترة اللى احنا فيها دى تعدى قدام شوية ان شاء الله
بس اصلى جربت القعاد فى البيت بالنسبة لى ليه عيوب وبيأثر فى نفسيتى جدا وخاصة ان جوزى شغلة بيتأخر فبزهق قوى
مش هاتصدقوا انى ببقى انشط وبعمل كمية حاجات اكتر من لما ابقى قاعد فى البيت ويومى بيبدا بدرى جدا وينتهى متأخر جدا انا تقريبا مش بنام اكتر من 4 ساعات فى اليوم

بالنسبة للعصبية دى مش مرتبط بالشغل هاتستغربى لو قلتلك ان الشغل بيخلينى نفسيا اتحمل حاجات مش كنت بقدر استحملها وانا قاعدة فى البيت

عامة ربنا يهدينا جميعا للى فيه الخير لينا ولاولادنا

بس بسم الله ما شاء الله
فيه ستات بيشتغلوا كتير اهوه طب تيجو ا نعمل صب ست من الموضوع ده لستات البيوت العاملات المطحونات دائما هاهاهاها :)

اختلاف !!!!!!!!!!!!!!!!! واحد بس
يوووووووووووووووووه حدث ولا حرج

طب بالمناسبة بقى لما اضحكوا واحنا مخطوبين كان كل ملا يجى يزورنا لازم افتكس بقى واوريله الشطارة
وانا من النوع اللى احب اى طعم جديد يعنى عملت مرة لحمة اسبانى بعصير برتقال وكرامي وحاجات كده
والارز عمرى م اكنت اعمل رز ابيض لازم بالبهارات او القرفة والمكسرات والزبيب او او او او ما تعدوش
ف كان صاحبنا كل مرة يجى ياكل شوية صغيرين او يقولى انا لسة واكل مع واحد صاحبى

لحد ما اتجوزنا والفاس وقعت فى الراس
قالى شوفى بقى العك اللى كنتى بتعمليه ده انسيه انا كانت بطنى بتوجعنى لما اكل اى حاجة عندكوا بس ما كنتش برضى اكسفك

بعد كده الرز يتعمل ابيض بالكتير اوى بالشعرية مفيش حاجة اسمها بهارات فى الاكل البهارات يعنى ملح وفلفل اسود
يووووووووه تقليدى بشكل لا تتخيلوة

تعبت اوى على ما عودته يغير شوية بسيطة من زوقة فى الاكل يعنى الحمد لله عملت مرتين بريانى يعنى هو بياكله على مضض بس انا بعمل مش واخده بالى :)

روشانا ومادو
بالنسبه للشوربه ما اقدرش استغنى عنها
يعنى فرصه لو سلقت اللحمه ومش محتاجه لكل الشوربه
بحتفظ بالباقى فى الفريزر ومش بحب الماجى خالص
فى طريقه حلوه بديل للماجى لكن من صنع ايدك لو حابين اكتبها
مادو بما انك غاويه شوربه ايه رايك نعمل ملف للشوربه فى رمضان
وللمقبلات الخفيفه لان رمضان بيحتاج لكسر روتين الاكل وخصوصا فى الحر
روشانا
فى ناس فعلا بيكون عطاءها ونفسيتها احسن مع الشغل
لانها مشغوله طول الوقت ومش شحنه زهنها بالمشاكل فبيكون عطاءها احسن
لان الهدوء النفسى اهم حاجه لان علاجه صعب ما ينفعش معاه ادويه
ربنا يرزقنا جميعا الهدوء والاستقرار النفسى

قعدت النهاردة كتبت شويت قوائم افطار بسيطة كده على قدى وعلى قد قدراتى المتواضعة فى المطبخ

والاهم انها سريعة ومش بتاخد وقت لانى معنديش وقت :)


بفكر انزلها فى موضوع لوحده بمكن حد يستفيد منها حاجة

بس بعد اذنكوا هاحطها هنا اخد رايكم فيها الاول :




======================افطار====================
ارز ابيض+فراخ محمرة+ملوخية+لسان عصفور

أرز ابيض+بسلة+لحمة+شوربة

ارز ابيض + شوربة خضار+لحمة

ارز بالشعرية+كوسة بجزر مبشور +لحمة او فراخ محمرة

ارز بالشعرية+بامية+لحمة

ارز بالشعرية+سبانخ باللوبيا+لحمة

ارز بالشعرية+بامية+لحمة

ارز ابيض+صينية بطاطس فى الفرن+لحمة او فراخ

ارز ابيض+مسقعة باللحمة المفرومة+لحمة+شوربة

كشرى اصفر+شوربة عدس+باذنجان مقلى بتقلية طماطم

كشرى
(ارز بعدس اصفر +عدس اسمر +مكرونة+بصل محمر+دقة)

مكرونة باللحمة المفرومة بولونيز+شوربة

صينية مكرونة نجرسكو بالفراخ المسلوقة والبسلة المسلوقة

كبدة اسكندرانى وبطاطس محمرة وعيش وشوربة نودلز

سجق بصوص (طماطم وفلفل وبصل وتوم)+ مكرونة اسباجتى او عيش وطحينة

ارز ابيض+سمك مقلى+سلطة خضرا

ارز ابيض+سمك مشوى+سلطة خضرا

ارز ابيض+صينية سمك بالبصل والتوم والطماطم والفلفل

بريانى فراخ
فراخ + ارز بسمتى +خضار(بصل+بسلة+جزر+بطاطس)

بريانى لحم

مكرونة محمرة +كفتة فى الفرن بطشة فحم

مكرونة اسباجتى +بفتيك بانيه+ سلطة خضار روسي

ارز ابيض+فرخة مقطعة فى كيس فرن بالخضار(بذنجان+كوسة +جزر+بطاطس+بصل+بسلة)

فتة شاورمة لحم +شوربة

شاورما لحم او فراخ + ارز بسمتى او مصرى بالخضار(بسلة وجزر)

ارز ابيض مع كفتة داود باشا بالدمعة

ارز ابيض+ حمام محشى بصل+بطاطس بالسلق والليمون

لحمة كباب حلة بالبصل بطشة فحم +ارز ابيض او عيش بلدى

فرخة متبلة مشوية فى الفرن ومعاها بطاطس محمرة وعيش وسلطة طحينة وبابا غنوج

لحمة باردة ترنشات + ارز اسبانى(بالفاصوليا الحمرا وبصل اخضر وخلطة ميلرز )+ شوربة

ارز ابيض+ صينية كوسة محشية لحمة معصجة وبطاطس محشية لحمة معصجة وتسقى بعصير الطماطم فى الفرن



ملحوظة عامة :

مع اى خلطة او طبخة او اى تسبيكة طماطم اضيقى قليل جدا من السكر ربع معلقة مثلا لاضافة طعم جميل

اضافة بشر جوزة الطيب مع اللحم المفروم يعطى نكهة ورائحة رائعة سواء كفتة او عصاج

====================الحلو==================

قطايف محشية ريكوتا

كنافة محشية مهلبية

خشاف(بلح منقوع فى لبن)

ارز بلبن مع كرات ايس كريم على الوجة

جيلى

سلطة فواكة الموسم مع وحدات كريم شانتية على الوجه

====================عصائر===============

كركدية

مكس تمر مع كركدية

عصير مانجو

عصير ليمون فى الخلاط (ممكن اضافة لبن ونعناع اخضر)

عصير كنتالوب

عصير بلح باللبن

جوافة باللبن

ملحوظة عامة :

مع اى عصير اضيفى قليل من قطرات الليمون لابراز النكهة

مع بعض العصائر مثل الليمون والكنتالوب والجوافة والبلح اضافى اللبن يعطى مذاق افضل وقيمة غذائية اعلى

====================مخلل وسلطات==================

بدنجان مخلل
(يسلق البذنجان الاسود الرفيع نص سلق ويوضع فى ماء وملح وتوم مفروم وخل مع قطع فلفل حامى)

خيار مخلل
(يوضع الخيار فى ماء وملح وتوم مفروم وشطة وفلفل حامى ترنشات)

طماطم وخيار كله حلقات بدقة توم وخل وليمون وملح وفلفل وكمون

سلطة خضرا(طماطم بصل خيار فلفل جرجير مقطع صغير ومتبل بملح وفلفل ورشة زيت وليمون )

سلطة خضار روسي
نسلق بسلة وجزر وبطاطس وفاصوليا نصف سلق
نصفيهم
نضيف ملح فلفل مايونيز مستردة ونقلب

سلطة كول سلو
كرنب سلطة مقطع وجزر مبشور
فى طبق نخلط مايونيز معلقة سكر ملح خفيف معلقة زبادى
ثم نضيف الخليط على الكرنب والجزر

سلطة طحينة
طحينة وميه ساخنة نقلب جيدا بحيث تختفى تماما الطحينة فى الماد ثم نضيف ملح وفلفل وعصير ليمون وخل

سلطة باباغنوج
نشوى باذنجان بقشرة وبصلة بقشرها على الشياطة فوق البوتجاز العادى
ثم نقشرهم ونضعهم فى طبق غويط مع معلقة كبيرة طحينة ومعلقة زبادى وملح وفلفل وكمون وعصير ليمون ونقلب جيدا بشوكة


سلطة زبادى
زبادى وخيار مقطع صغير ونظبط الملح

======================سحور===============

جبن انواع بيضاء ورومى وشيدر

عسل ابيض

بيض مسلوق او مقلى

فول بالبيض

شكشوكة بيض

جبنة بالطماطم

فول بتقلية طماطم

فول بالزيت والليمون

سمبوسك مقلى

مسقعة بدنجان وبطاطس وفلفل وطماطم

بيتزا
بالفرخ او الخضار(بصل فلفل مشروم) او هوت دوج

فطائر محشية خلطة اجبان او هوت دوج او خلطة جبنة بيضا

طعمية

قرص طعمية بالبيض

بذنجان مقلى

توست بالبيض البقدونس ونشوحة فى طاسة تيفال بذبدة خفيفة

ساندوتشات هوت دوج وكاتشب ومايونيز

ساندوتشات هامبورجر بالكاتشب والمايونيز

ساندوتشان سجق

ساندوتشات كبدة اسكندرانى

ساندوتشات عيش سورى بشاورما فراخ او لحم

صنية جلاش بحشوة خضار الوصفة تحت


======================مقبلات====================

سمبوسة
فلفل ملون +بصل اخضر+زيتون+خليط جبن شيدر موتزريلا رومى
او
جبنة بيضاء +فلفل ملون+بقدونس+(نعناع)

كبة بطاطس ورز محشية لحمة معصجة

صنية جلاش الحشوة
فلفل الوان + بصل اخضر + طماطم +زيتون + بسطرمة او هوت دوج او سجق باقى عندك(بس انا بفضلها اكتر بالبسطرمة) + خليط اجبان كلة مقطع صغير
وندهن بين الطبقات بذبدة خفيفة خالص او لحسة سمن ونحطة فى الفرن يحمر اكب علية كوب لبن مضروب معه بيضه
وملح وفلفل وادخلة يكمل سويه