ice princess :

ماقصرت اجتماعية مع انها من الرياض وعتبي على بنات الامارات على كثرتهم وين فزعتهم ؟؟؟

ماقصرت اجتماعية مع انها من الرياض وعتبي على بنات الامارات على كثرتهم وين فزعتهم ؟؟؟

إحساس الروح :

السلام عليكم ورحمة الله وبركاته،، اختي سلطانة الطيوبة،، حياك الله انتي واحبابك في دبي وإن شالله تستانس صديقتك عندنا.. اعذريني في الفنادق ماعندي خبره لاني من اهل الدار ماجربتها، بس حياها الله في بيتنا :) انتوا عندكم خبره اكثر مننا في الفنادق لانكم مجربينها.. المطاعم قوليلها تجرب مطعم توسكانا الإيطالي في سوق مدينة جميرا في مينا السلام .. مطعم ايطالي البيتزا عنده روعه، والمكان هناك يجنن.. انصحيها تروح تشوف مينا السلام وتاخذ جولة بالقارب هناك .. القوارب هناك مجانية بس يوصلون فيها سكان فندق ميناء السلام لكن قوليلها يحايلون الهندي اللي عند القوارب يقولوله نحن سياح وبناخذ لفه بس ونرجع، المنظر خيالي هناك لاتفوته خاصة المسا واحسن لها عن الحر .. وهاذي بعض الصور من هناك وماخفي اعظم :) أما في الاشياء اللي اعتقد يمكن مب موجودة في السعودية الجلابيات الخفيفه اللي تجينا من الهند غالبا تلاقينها في سوق عكاظ .. وعن الخلطات والدخون اعرف اخت عندنا في جميرا دخونها روعه وعندها خلطات ماجربتها، بس جربت دخونها عجيب كل حد يسأل عنه، برسلك رقمها عالخاص .. اذا تبغي لنفسها جلابيات مميزة وبأسعار معقولة عندنا بس مو جاهز، هاذي احسها اشياء ماتنلقى فالسعوديه، عندنا خياييط في منطقة اسمها فريج المرر في ديره، معروفه بس اول ماتدخلين هالسوق تلقين الخياييط اللي فالواجهه اسعارها نار، فيه خياط ورا اسمه حسن عبدالله للخياطة والتطريز برسلك رقمه عالخاص عشان يوصفلك المكان .. انا اتعامل معه من ثلاث سنين ومن عرفته مارحت لغيره يعني اسعاره من 140 الى 180 تقريبا .. بصورلك نماذج من جلابياتي وبرسلها عالخاص، حتى اذا هي مو مطوله فدبي تقدر تروح له تختار الموديلات اللي تبيها وتعطيه قياسها ولما تجهز يشحنها لها بالبريد بس خلها تتفق معه من البداية .. هو يطرز الثياب ويخيطها .. بس هي تاخذ له القماش والقياس اكيد، واذا تبغي تشتري قماش زين، تروح منطقة السطوه في بر دبي، في محلات اقمشه جنب بعض بتلاقي عندهم قطع كيمري او راتي تناسب جونا وتعيش للاستخدام الدايم ماتخترب .. اذا تبغي شيل وعبايات ، عندها في ديره مركز معروف اسمه مركز ابوهيل، اسعاره معقوله لكن اذا تبغي تفصل من المحلات الراقية اللي عندنا مثل ماي فير ليدي، سيدتي الجميلة، إيفن إن بلاك، غواني .. هم موجودين في مراكز دبي بس هالمحلات غاليه واسعارها مبالغ فيها وايد، لكن تقدر تلاقي موديلاتهم بالضبط نفسها في عجمان فيه محلات تقلد شغلهم وبنفس المستوى وشغل نظيف وبأسعار معقوله، انا من دبي ومتعودة افصل في عجمان يعني الشيله اللي بتلقينها في دبي ب300 تلقينها هناك ب150 او 170 .. ونفس الشي بس الفرق ان في دبي اجار المراكز عليهم غالي وهم يبالغون في الاسعار عشان الاسم على اساس انه ماركه معروفه ولا الاقمشه والشغل نفسه .. طقم العباه مع الشيله (اللي فيها شغل خفيف) فدبي 700 وفوق، هناك تلقينه 300 او 400 .. طبعا انا اتكلم عن المحلات المعروفه اللي شغلها مضبوط مب اي كلام.. محلات العبايا هاذي تلقاهم جنب بعض في عجمان، وترى المسافة من جميرا لعجمان مب بعيده بتاخذ ساعه الا ربع او ساعة، اما اذا كانت ساكنه في ديره بتاخذ نص ساعه، المحلات في عجمان في منطقة الرميلة شارع النخيل وبرسلك رقم احد المحلات على الخاص عشان يدليها.. واذا بتفصل ماتبي جاهز ممكن تتفق معاه اكيد يرسل لها اياهم بالشحن .. لان هالفتره مع قرب العام الدراسي الجديد والعيد راح يخلصون لها في شهر تقريبا .. الشنط والاحذية والملابس اعتقد نفس المحلات العالميه عندكم موجودة، مثل ناتشرالايزر، ناين ويست، مانجو، برومود .. المكياج اتوقع نفسه عندكم : ماك، ميك اب فور ايفر، مكياجي .. قوليلها تروح الملا بلازا يسوي معارض بين فتره وفتره، والحين فيه معرض مستمر لين اول تسعه، انا احب اروح هالمعارض تلاقين عندهم تشكيله منوعه جلابيات، عطور، احذيه وشنط واسعار جدا معقوله تنفع لهدايا .. لو تبغي فساتين سهره جاهزة تروح مركز البستان (قرب الملا بلازا) عندهم محلات كثيره واسعارها معقوله بالنسبه لباقي السوق، يعني ممكن تلقى عندهم فساتين ب900 درهم وفوق، بس انا سمعت ان الفساتين عندكم ارخص، احنا عندنا الفساتين الجاهزة اسعارها بالهبل، مركز البستان فيه اشياء راقيه ومعقوله، والمحل اللي تعاملت معه اسمه MB عنده تصاميم لبنانيه روعه، يسوون نفس تصاميم زهير مراد وإيلي صعب على قولتهم .. سامحوني طولت عليكم بس حبيت افيدك وقلتلك الاشياء اللي حسيتها مميزة.. واي استفسار حاضرين .. حياكم الله ويا مرحبا الســـااااع :) .. اذا تذكرت اماكن ثانيه اكيد بقولك.. انا فكرت في الاماكن اللي اروحها وذكرتلك اللي احسه مب موجود عندكم .. والسموحة :26: اختكم،، إحساس الروح ..

السلام عليكم ورحمة الله وبركاته،، اختي سلطانة الطيوبة،، حياك الله انتي واحبابك في دبي وإن...