قولولي وش الحل لأنه خلاص ماعاد فيني

السلام عليكم ورحمة الله وبركاته

أبقولكم وش السالفة على طول..عمري 23 سنة بس والله أحس تبهذلت أدبال عمري

انا كنت مخطوبة لرجال كنت أحبه حب ما راح تتصورونه ولا راح تدركونه وبس بقى

الزواج..المهم انا من أول يوم شفت فيه هالرجال انبهرت فيه انبهار مو طبيعي يمكن

لأنه فيه من الجمال والوسامة اللي ماعمري شفتها بحياتي كلها وربي اني سافرت ورحت

وشفت لكن مثل جمال هذا البني آدم ما عمري شفت..واللي زاده انه كان خلوق وطيب مره

المهم أمي ما كان ودها فيه مره تقول ان واحد مثل شكله راح تتعبين معاه لأن شغله

مختلط وتيجيه مضايقات كثيرة جداً وأحياناً المضايقات تزيد عن الحدود..أنا قلت ما يهم

طيب يوم ملكت وكلمته لفترة اكتشفت اني فعلاً ما اقدر أرتبط فيه لإختلاف أمور كثيرة

بيننا وبيئته مختلفه عني..ورغم هذا كنت أحبه وأموت فيه..لكني استخرت الله وفعلاً

فكينا الملكة..وجاء واحد ثاني وخطبني وهو انسان من عائله كبيرة جداً وملتزم وفيه كل

الصفات الزينة والمرغوبة والزواج قريب..

طيب بتقولون لي وين المشكلة ؟! المشكلة اني أحب الرجال الأول مره أحبه بشكل مستحيل

أحد يتصوره وما أقدر أنساه عجزت وربي يا ناس عجزت..ماني قادرة أتخيل واحد غيره

والناس يوم دروا اني أبتزوج هذا الثاني كلهم ماهم مصدقين يقولون ماشاءالله بتآخذين

ولد الفلاني..وأمي دامي تقولي ربي عوضك بهذا لأنه صدق يعجب أي بنت

وهو واحد أخلاق وملتزم وزين قلباً وقالباً والحمدلله يدري بأني كنت

مخطوبة لكن ماعمره سألني ولا سؤال عن الأول نهائياً من طيبه ومراعاته لي..فعلاً

أحس اني ما أستاهله لأنه يستاهل وحده تحبه وتفرح فيه..والله ودي أفرح وأستانس

لكني قسم بالله أحس قلبي انشلع موووت على الأول..لأني عشت فترة طويلة أتخيل

حياتي معاه ووش بنسوي ووش بنقول وكيف أبسوي برنامج حياتنا وكيف أبسعده

وكيف أبهنيه تعبت والله وأحس بألم شديد برأسي من شدة البكاء والحسافه على الأول

فكرت أفك الملكة وأرسله أقوله لكني خفت أخسر على جميع الجهات..لكن ياناس أحبه

ولا أدري هل بعد الزواج أبتأقلم وأنساه وإلا أقعد كذا على حسره عليه..لأن وربي أحبه

ولاني قادره أتصور اني أبتزوج واحد غيره..أحس كأني أبسوي غلط بحياتي..وأفكر كم

مره أنا أبعيش وهل يسوى هذا العذاب ؟! بليز قولولي وش الحل أفك الملكة وأرسل

للأول أقوله لانه هو بعد يحبني ويبادلني كل المشاعر بس خلاص صبرت كثير ولا عاد

أقدر ماعاد فيني أكثر..حاس روحي مخنوقة طول الوقت..