zOOna :

أوكي، خل أقول لج عن نفسي لأني اواجه نفس الشي بس انا ما عدت أنظر لها انها مشكله بتاتا،، أصلا أنا ناسيه هالموضوع وأنتي ذكرتيني فيه!!!!!!! أنا مثلج، خشمي طويل، ومن نوع ما يبين اذا من جدام (أو يمكن يبين!! مادري!!) بس المهم ان يبين على صوب يوم كنت صغيره في سن المراهقه كان هالموضوع مسبب لي أزمه و هم كبيــــــــــــــــــــــر باختصار كنت متعقده، ومثلج ساعات أوسوس ان الناس تعلق وانا انسانه حساسه ومازلت حساسه بس مب في هالموضوع كانوا الناس يلفتون نظري حق هالمشكله أكثر مما أنا كنت ملتفته لها!!!! اللي يتطنز، واللي يعلق، واللي يقول كل شي فيج حلو الا خشمج امخرب عليج،، والأهم: اللي يقول لازم اتسوين عملية تجميل <<<<<< وهاي محور كلامي معاج ....... الحمدلله، انا انسانه ملتزمه بديني من يوم أنا في رابع ابتدائي عندي وعي ديني وحاسه بالمسؤليه الدينيه وأخاف ربي فكانوا لما الناس يبون يهونون علي ويقولون لي سوّي عمليه كنت أستنكر هالشي وبشده من داخلي. حزتها انا كنت صغيره ما عندي علم في الفتاوي اذا هو حلال أو حرام، بس أنا من داخلي عندي يقين ان هالشي حرام، وحتى لو فرضنا انه مب حرام، فأنا أقول أسلم لي ان أفكر ان هو حرام بدال لا أروح اغير في خلقة ربي و بعدين أقعد أوسوس عقب ما يفوت الفوت والحمدلله، من شدة اقتناعي ان هالشي حرام، كبرت وأنا رافضه فكرة العمليه، في هالحاله ما صار عندي غير حل واحد، وهو اني أتقبل نفسي مثل ما انا.... وأرضى وأفكر في الأجر اللي انا أحصله من ورا كل لحظة ضيق نفسي أمر فيه اذا شفت خشمي في المنظره واحتسبت الأجر، ومن ورا كل كلمه جارحه أحصلها .. أنا عارفه ومتيقنه ان لي من وراها أجر ان شاءالله وشوفيني الحين،، صار لي سنيــــــــــــــن ناسيه الموضوع ولا يمر على بالي نهائي!!! بالعكس، تعالي سمعي كلام الناس عني، مو مدحا في روحي، بس الحمدلله ماشاءالله الناس تمدح في جمالي وما تلتفت لخشمي رغم انه للحين نفس الطول، يعني شللي تغير؟؟ 1. القناعه والرضا 2. الجمال الداخلي 3. الثقه << أهم شي... يوم انا صرت أتقبل خشمي وصرت واثقه من نفسي ومن جمالي صرت اهتم بنفسي اكثر وأركز على نقاط الجمال في وجهي وأهتم في لبسي وشعري وغيره وغيره... بالتالي قامت الناس تشوفني جميله..... شوفي نفسج جميله وتعاملي مع الناس على هالأساس وبهالثقه والناس راح تشوفج جميله.. وانسي عمليات التجميل،، وفكري في الاخره وان شاءالله هاي كله لج من وراه أجر.. واسفه على الاطاله :)

أوكي، خل أقول لج عن نفسي لأني اواجه نفس الشي بس انا ما عدت أنظر لها انها مشكله بتاتا،، أصلا أنا...