الكبسه ليها طرق كتير وكل طريقه بطعم مختلف
بس انا حبيت اغير شكلها واخليه مترتب اكتر ويارب يعجبكم
الاول شوفوا الصوره
المقادير
مقادير (أ ) ( مرقة اللحمه )
1_لحمه ضاني او اي نوع متقطعه
2_توابل الكبسه ( هيل +لمون اسود+فلفل اسود حب+ورق لورا+مسمار+3 عود قرفه+مستكه )
3_بصله متقطعه جوانح
4_طماطم متقطعه مربعات
5_3 معالق زيت
6_ملح
مقادير (ب) الكشنه مثل مافي الصوره
1_ بصله متقطعه
2_فلفل رومي متقطع
3_جزر مبشور
4_زبيب منقوع لمدة خمس دقايق ويصفي
5_لوز مقشور او مكسرات حسب الذوق
6_معلقة زيت
مقادير (ج) الزلطه
1_حبة طماطم
2_3 او 4 قرون فلفل حااامي
مقادير (د)
رز بسمتي مغسول ومنقوع في مايه وملح لمدة نصف ساعه
انا استخدمت 2 كوب رز
مكعب ماجي
معلقتين كركم
الطريقه
اولا نغسل الرز وننقعه في مايه دافيه وملح
نجيب حله ونضع فيها 3 معالق زيت وجميع مقادير توابل الكبسه ونقلبها شويه وبعدين نضيف البصل المتقطع ونقلب
وبعدين نضع اللحمه ونشوحها كويس مع التوابل وبعدين نضيف الطماطم
وبعد خمس دقايق نضيف المايه ونظبط الملح ونغطيها لحد ما اللحمه تستوي
في هذه الاثناء نعمل الكشنه
نجيب طاسه ونحط معلقة زيت ونحمر اول شئ المكسرات ونطلعلها علي جنب
نحمر البصل مع الفلفل الرومي ونطلعه علي جنب
واخر شئ نحمر الجزر مع الزبيب ولما يدبل شوي نطلعه
نعمل الزلطه ( ودي الصوص الي بيتاكل جنب الكبسه وطبعا حاميه موووووووووت )
في الخلاط نضرب الطماطم والفلفل كويس جداا
بعد مااللحمه تستوي نصفي المرقه بالمصفاه
وناخد قطع اللحمه ونحمرها في الرفن تحت الشوايه
وفي نفس الحله ( اقتصاد في المواعين ) نضع معلقتين زيت ومكعب ماجي والرز بعد مانصفيه من المايه
ونقلب تقليبتين وبعدين نضيف عليه المرقه
لكل كوب رز كوب ونص مرقه ( ده عياري المظبوط تماما وينجح مع اي نوع رز ) ونضبط الملح كويس
ونضيف الكركم ونقلب كويس
ونغطي الحله وبعد مايغلي نهدي النار
وقبل السوا بشويه نرفع الغطا وبضع الكشنه ماعدا المكسرات ( يعني نحط الفلفل والبصل والجزر والزبيب )
ونغطيها بسرعه لحد مايشرب مايته ويستوي
نجيب صينيه علي شكل قلب او اي شكل عندك
ونبطنها بالبلاستيك فيلم
انا احب اعمل الخطوه دي عشان اضمن ان الرز يطلع شكله مترتب
وبحرص ناخد الكشنه ألي فوق علي الرز في طبق علي جنب
ونخلي الرز لوحده بقدر الامكان
وبعدين نقلبه علي صينية التقديم
ونوزع الكشنه واللحمه والمكسرات وممكن نقطع اللمون ونقدمه معاها
وبالف عافيه
ولا تنسوني من الدعاء