كثرة الاحلام بنفس الاشخاص لمدة ١٠ سنوات واكثر

السلام عليكم
في موضوع محيرني مرة وهوا إني لمدة ١٠ سنوات واكثر أحلم يومياً بخالتي وبناتها
مافي حلم معين بس لازم يكونو موجودين في الحلم سواء احلام حلوة او كوابيس وتقريباً مااحلم بأشخاص غيرهم حتى لو اخدت غفوة ساعة برضو احلم والاحلام ماابالغ يابنات انها يوميا
مع العلم اننا متقاطعين طول الفترة دي
احنا تربينا سوا وعشت عندهم اغلب طفولتي ومراهقتي وشبابي بس قاطعتهم بعد ماكبرنا وتغيرت الشخصيات لأني شفت فيهم الغيبة والنميمة والتخبيب بين الازواج للأسف وتتبع عورات و اسرار الاخرين و هم للآن يسألو ليش انا قاطعتهم مع العلم انهم مايشوفو اخطائهم ولو تنصحيهم تقوم حرب عالمية فاختصرت على نفسي واشتريت دماغي
مشكلتي الثانية هي امي مرتبطة فيهم ارتباط شديد وتنقل اخباري وانا حذرتها اني اشوف كوابيس ومافي فايدة تنكر انها تنقل الاخبار وبعدين اكتشف انها نقلتها تقول مو انا اللي قلت اختك الي قالت
تمت خطبتي وعقد قراني وانتشر الخبر وحصل شي غريب تكسر السيراميك حق الغرفة اللي تمت فيها الخطبة وبعدها بفترة بسيطة تم الطلاق قلت لامي لا تقولي لاي احد اخباري بعد كدا تقول انتي موسوسة
بعد ٣ سنوات انخطبت وماقلت لاختي وبس لأمي ان في عريس اخو صديقتي هي تعرف صديقتي وتحبها وفرحت امي ان العريس اخوها وقلت يلا دي المرة محد يعرف غيرك لاتطلعي الخبر وحصل عدم توافق في التحاليل وتكنسلت الخطبة ولما حصل عدم التوافق كانت امي ذيك الفترة في بيت خالتي لمدة شهر فحسيت انها قالتلهم وقلت مابسيء الظن وقلت لامي مافي توافق قالت خيرة اكيد هو انسان سيء
وبعدين قررت نعيد التحاليل وجربت مااقول لأمي والحمدلله تم التوافق وقلت لاخويا ابغاك تسويلي الملكة رجال فقط بدون علم العايلة وسبحان الله تمت الملكة وتم الزواج وبعدها رجعت العلاقات مع امي وقالت لخالتي اني تزوجت قلت ليه قلتيلها دا موضوع يخصني تقول اخوك قال لها مو انا مع العلم ان اخويا في مدينة ثانية ومقاطع كل الناس كيف بيكلمها يعني
و من عليا ربي وحملت وللاسف راحت قالتلها وتقول ان خدامتها هي اللي قالت لخدامة خالتي
قلت ياامي مرة تقولي اختي مرة اخويا مرة الخدامة وانتي كل اسبوع عندهم واختي واخويا مايكلموها بسبب لقافتها وتحب تعرف كل شي وتنشر الاخبار وسبحان الله اخبار بيتها تسترها وماتقول حتى لأمي
و زعلت وبكيت خفت ووسوست انها عرفت بالحمل وبعد فترة بسيطة طلعت عندي انزيمات الكبد مرتفعة وخوفوني انو يسبب فقدان للجنين بعيد الشر الله يحميه وانو حيولدوني بدري اذا استمرت في الارتفاع وانا لسا في الشهور الوسطى وكل يوم ابكي وادعي ان الانزيمات تنزل
والله اني ماابغى اسيء الظن بس مااعرف ليش عايلتنا بشكل عام اذا عرفو شي يخرب و اذا سكت يتم ومحد ينقلهم الاخبار الا امي وماتعترف ولما مااقولها شي محد في الدنيا يعرف وانا والله مااقولها اي شي من صغري بسبب انها ماتحفظ السر بس في اشياء ظاهرة للام زي الحمل و زي الزواج
دحين حتى الولادة احس ماابغى انفس عندها احس قفلت نفسيتي خلاص