كرهت جنيني يلي جاا بعد سنوات بسبب كلام الناس :(

السلام عليكم ..

كيف حالكن يا خواتي ؟

خواتي انا حامل و لله الحمد بعد زواج 4 سنوات .. و انا ما كنت من النوع يلي حاطه الجرح و الزعل و قاعده .. يعني فيه بنات اذا تاخر حملها توقف حياتها و ما تحاول تنبسط ابدا .. انا الحمد لله كنت مقتنعه بالمكتوب و طبعا كنت احاول طوول هالفتره اني احمل بس بنفس الوقت كنت احاول اتناسى و انبسط بحياتي .. طلعات و خرجات و جمعات و كنت مدمنة جيم و رياضه ... و كثيير كتبت مواضيع في قسم تاخر الحمل انه يلي قاعدين نعمله من حزن و زعل مو كويس لصالحنا .. فيه يلي ايدني و بقوه و فيه يلي عارضني .. و كل وحده و قوة صبرها و تحملها .. و الله دوووم الى يومكم هذا ادعي لخواتي بالذريه الصالحه المعافاة ما انساهم في دعائي .... ما اخفي عليكم انه تيجيني حالات من الحزن و الرغبه الشديده بالحمل ... بس احاول ما اسمع نفسي و اطنشها و اقول الله كريم .... :)

المهم طبعا اغلب يلي حولي حملوا و انا لا .. و حتى ناس اكبر مني بكثير يحملوا و ماما قالت لي العجايز يحملون و انتي لا .. يعني كلام كثير كنت اسمعه من الناس بس كنت احاول اطنش و اقوول ياااااا رب ...

الحمد لله حملت .. و تعالوا شوفوا كلام الناس بعد ما حملت .. توقعت اني راح اخلص بس شكله ما فيه فايده .. . مرت اخوي و اخوي عندهم بنتين وحده عمرها 9 سنوات و الثانيه 8 سنوات .. و حلوين ما شاء الله عليهم .. جوو عندي يسلمووا علي و يباركولي بحملي قالوا لي الله يعينك على الخلفه .. مرررره متعبه و مدري ايش .. قبل امس كلمت مرت اخوي قالت لي التربيه مره مره مره متعبه ما عندك اي فكره و راح تتعبين كثييير و اخوي يقولي مو لو ما حملتي احسن .. انا ما اعرف ايش شافوا من التربيه هم ؟؟؟ بناتهم لسه اطفال .. يعني اقعدي كويس .. البسي كويس لا تطلعي صوت و انتي تاكلي رتبي اغراضك و العابك .. ماما نبي نروح ملاهي .. و هم اصلا بناتهم كانوا طوول الوقت عنا في الفتره الاولى من حياتهم هي كانت مشغوله و اخوي ما يسال عنهم .. و كان عندها شغاله يا فلانه غيري لهم يا فلانه روشيهم . و ماما كانت كثيير تقولها انتي قومي لبسيهم لا تخلين الشغاله .. و كان اخوي يدعي على نفسه بالعقم و يقول ما ابي اطفال ..... لسه ما شافوا التربيه على اصوله لما يوصلوا لسن المراهقه و تعبها ... انا فجأة لقيت نفسي كارهه يلي في بطني و اقول ما دام انه الاطفال يحولوا حياة الشخص لجحيم حسب ما فهمت من كلامهم ... ايش سويت في نفسي و ليش فكرت احمل ؟؟؟ و بعدين استغفر ربي و اقول بلاش ربي يعاقبني و اطنش كلامهم .. و حتى زوجي ما سلم من كلام اخوي .. قعد يقوله خلاااص حياتك راح تتغير و تتقيد .. قاله على العكس راح اصير اطلع اكثر من الاول اطمن على زوجتي انه فيه ونيس معاها في البيت و اطلع ... قالوا اخوي معاك حق هههههههههههه يا الله الرجال كيف !!!

و انا اغلب وقتي قاعده بين اربع حيطان .. زوجي يطول في الشغل .. فما عندي ونيس و لا شي ... صحيح كنت اطلع و اجتمع بس في البيت ما عندي حددد وحده تامه ...

و في الاخير حسينا انا و زوجي بفتور شديد في حياتنا .... نفس السوالف .. نفس كل شي .. لما حملت انبسطنا و صرنا نفكر في البيبي و لقينا سوالف جديده :) ... و زوجي كبير عمره 36 .. اخوه يلي اصغر منه صار عنده اثنين ماشاء الله تبارك الله .... و انا عمري 26 .. يعني ما حنا صغار :(

مرت اخوي الثانيه قالت لي على العكس حياتي قبل الخلفه كانت ملل .. بعد الخلفه حسيت معاي ونيس في البيت العبه و اضحكه و اتسلى معاه ...

فما ادري يا خواتي و قسم بالله اني كرهته بسبب كلام يلي حولي و التخويف من التربيه و من الاطفال ..

هل لهذي الدرجه الاطفال متعبين .. طيب ليش الواحد يخلف ؟؟

على قدد ما كنت مبسوطه بحملي على قدد ما انا خايفه الحين و اقول ايش سويت في نفسي
:(

انا عارفه انهم مسؤوليه .. مو سهلين بس و الله بنفس الوقت حلوين و امورين

تدرون خواتي قبل ما انخطب .. ليش ما انخطبتي مع انه عمري كان لسه 20 ؟؟؟ و لما انخطبت .. لو انك قعدتي عند اهلك و تستانسين احلى توك صغيره .. الزواج متعب و مسؤوليه .. و الصراحه ما شفت الزواج متعب للدرجه يلي سمعتها