كشتتي ياكشتتي....منعقبها طارت كشتي..ومن كثر البلع انتفخت كرشتي

هذا موضوع معلمة اجيال للي مايعرفه(للعضوات الجدد) عشان تكونون على بينه
http://forum.hawaaworld.com/showthread.php?t=754587
بعد حبة خشم وترجي من اول الشتاء تحقق الحلم وكشتنا مع الوالد :arb:الله يحفظه المهم ابوي جاء قبل الصلاة الفجر عشان نمشي بدري اللمهم ركبنا الله لايوريكم صرنا لحم مفروم تعرفطنا تعرفط :08:في السياره لان ابوي وخوي قدام وانا واختي وامي وثلاثه من اعيالي معنا واختي الثانيه وولدي الكبير جادعينهم ورا مع القش


اللمهم وحنا الي يبداء مشوارنا عاد طالعين وكلنا حماس كل شي ولا ارجعه المهم ومرينا راعي الفول والحافظه خامتها ابجنبي احتري ابوي ياخذها عشان يعبيها فول يوم جابه لي بصحون ونا ونا الي تطير بوهتي وبادا امطرس عليهم في السياره واكبه في الحافظه خبركم برد واخاف يبرد المهم حطيته على رجليني كنه اولدي وولدي المسكين مع القش والله من حرارت البطن الحافظه على رجلي وولدي مع القش كل ذا اخاف تنكب المهم ولا ابوي الله يحفظه شرا لنا خبز تميس يحبه قلبكم المهم وحنا الي ماخلينا اضروسنا:f226: ترتاح الا عقب ماامتلت اكروشنا


ولابد من شي يضيع الوقت ونمر البقاله ونشتري الزي منه زيتون قشطه عسل اصحون اكواب بس ماشرينا ببسي حبيب معلمة اجيال <<على طاري معلمة اجيال اقول مالقيتي لختك رجل <<اقول خل اكمل السالفه


عقب مامشينا اشوي ويلقى ابوي مدخل من عند الشبك نبي ان دور فقع الله يفقع اعيون العدو تمشينا وشوفنا الجو الي يهبل وبغيت امسط على خشتي في حدى النقع الي موجوده بس والله شكله مغري خليني امسط بس هماه اني استانس المهم ركبنا السياره نبحث عن مكان اخر لعل وعسى

نلقى لو فقعه وحده وفي اسياره كل وحده جادعه اعيونها برا انا ادور فقع وختي عراجين ونا الي اشوف شي تقل جبل اصغير<<الله يقطع ابو المبزره جبل اصغير >> اللمهم ونا الي ازعق على ابو بغى ينهبل قلت يبه اصبر فيه فقع ونزل وش اشوف بيت نمل مالت عليهن جاني ضيقت صدر منهن ركبت ونا ميته من القهر لان اهلي يضحكون:laughing: علي ركبنا وساعه ونصف مالقينا مخرج ومطبت بغيت اطرش من الرجه لاعادت على العدو اخر شي ملينا وجعنا ودخنا نبي اقهوه قررابوي انه يروح مع خط الدمام القديم برا وسفهلينا يوم شفنا الطريق المزفلت وصلنا البداية المكان الي حنا نبي نروح له بس كنا منتظرين ناس امواعدينهم فا جلسنا اهناك عشان يشفوننا اذا جو جلسنا وشبينا ضو وتقهوينا وفطرنا

وجلسنا نلعب بالبندق وكل ماجينا نرمي قالت امي هيه لاترموني قلت لمي نامي ازين لاتخليني اتهور ورميك كل مارمينا وحده فتحت لنا موال لاترموني يمه وش قالو لك عميان يومة جا دور ولدي وتقوم امي والله الموت حار وتنقز امي وتغير مكانه معكم علم البندق مع بزر واحتمال وارد انه يرمي امي:22: وجلسنا تقريبا ساعتين في المكان هذا بس ذبحنا العج وهو بارد قمنا انكمل المشوار قريب من المنطقه ملينا من القعده ننتظر لانهم ماراح يجون الابعد صلاة الجمعه طبعا صارت الساعه 2 ونصف


جو اخويانا بنت خالي وزوجها خالي(حلوها بنت خالي وزوجها خالي )ايه هذا طول الله بعماركم ماتت امه وهو صغير وربته جدتي الي هي ام امي وطلع على الدنيا وهو يقول لامي اختي ونا اقوله خالي فهمتن
اللمهم مالكم بطويله تقهوينا وفلينا الحجاج وجاء الي انا كاتبه الموضوع عشانه شبو الرجال على الغدا:7_2_103v: يوم جو يطبخون الرز ولا مافيه رز نسيت اقولكم انه طاح في البر من المطبات الي جتنا ابوي حمق وزعل لان الي جاين معنا عازمينهم ونسينا الرز والله فشله بس اختي اتحلف وتقسم انها حطته هي بيدها نحاول نقنعها انها يمكن نست تحطه وهي ابد كلمه وحده انا حطيته في الساره بيدي فوق ونا الي ربطت القش بيدي المهم بلشنا نبي رز ابي اموت لو مااكلت رز احب رز البر لاني في البيت مااكله لقينا حل بس انه صعب بس انه مافيه الاهو والله بغيت اصيح من الفشله تدرون وش صلحنا اول شي سوينا اجتماع مغلق وقررنا الاتي والله فشله مادري وشلون اقوله تدرون وشو ؟؟؟؟؟؟؟؟؟؟؟؟؟؟؟؟؟؟
يوم قررنا بعد الاجتماع جونا الرجال اثاريهم هم بعد مصلحين اجتماع مثلنا وطلعو بنفس الحل


ابقول والي يبي يصير يصير قررنا ان حنا نطر من الجيران مهب جيران بيتنا لا جيراننا في البر اول من طرينا منهم من سواء حظنا انهم شدور وارجعو لديره والي معه الرز سبقهم ورسلنا للي ابجنبهم وعيالنا تطاقو كل واحد يقول انا الي بقولهم ونا من بعيد اقول لعنبو بليسكم الدعوه اشحاذه يالكمخ قالهم ولدي طبعا ابوي الي قايله خذو الحمتنا ولا عطونا رزكم نكمل به غدانا وارسلو كيس 5 كيلو والله الكرم والله فرحونا فرحه مابعدها وامس جمعه كلنا دعينا لهم وان شاء الله في نظري هذا اطعم رز ذقته في حياتي
ربي يستجيبها وبس وتغدينا غدا وش زينه زينا اقهوه وشاهي وصلينا ومشينا لان الرياض بعيد ولازم نمسك الطريق قبل لا يتأخر الوقت
الكلام ومختصر المفيد مره الثانيه انا ولا انتم لا كشتو خلو الرز قدام وحطه بدال الفول الي بلشت فيه
اقول عساه اطول من موضوع معلمة اجيال وازين <<اقول ضفي والله مايمديك وش جابك لها>> لو انا بالمدرسه كان اخذت الدرجه الكامله في التعبير<<اقول ايه بالحيل >>
سلملم سلملم سلملم