كفته سهلة ولذيذه....غدانا اليوم

:cook: اليوم قررت أسوي غدا سهل وسريع ولذيذ فقلت أحط الطريقة قدامكم من الصبح عشان اللي ودها تسوي غدا مثل غدانا....:27:
الطريقة والمقادير:
لحم مفروم ( أنا للكفتة أحب أخلط نص الكمية عجل ونص غنم يطلع الطعم فوق الخيال بس كل وحدة ورغبة بيتها) يخلط مع بصل وبقدونس مفرومين ناعم جدا إذا عندك فرامة براون أحسن وبهاراتك اللي عندك (مثلا السبع بهارات شوي قرفة فلفل أسود وجوزة الطيب أوحسب إنتي ماتحبين) بعدين حطي عليها شوية بقصمات قد بيالة شاهي عشان تسحب رطوبة اللحمة وملح وشوية بابريكا وسويها على شكل أصابع.
ألحين فيه طريقتين ( أنا بسوي الثانية ) إما تقلينهم بالزيت أو تحطينهم في مشخال فوق قدر فيه موية وتخلينهم يستوون بالبخار... أقل دهون وشكل الأصابع يطلع أحلى.
بعدين رصيهم في الصينية وجهزي خلطة عبارة عن كاس طحينة (هردة) ونص كاس زبادي وفصين ثوم وعصير ليمونة وشوية ملح بالخلاط وصبي على الجماعة اللي منسدحين في الصينية...:hahaha: موب لازم تخلينها تسبح وحطيها بالفرن ربع ساعة.. وبعد ماتطلع حطي عليها إذا حبيتي صنوبر محمص وقدميها مع بطاطس مقلي وخبز عربي وسلطة خس وشوربة عدس أو شوربتي حقت الحبوب ( تلاقون الطريقة في قسم الشوربة ) ويا جعله هني إن شالله وهذا غدانا اليوم.....