كلي وانحفي وادعي لي

صباح الخير
قبل شوي رديت على وحده بموضوعها وبعدين فضلت اكتب اللي عندي بموضوع مستقل عشان الاغلب يستفيد
ح اكلمكم عن الجوع الشديد اللي نحسه وقت مانتبع الرجيم واللي ح اكتبه هو نظامي اتبعته قبل 3 اسابيع والنتيجه جداً رائعه ما اعرف كم نقصت بالكيلو لأني ما اعترف بالميزان لكن المهم ان ملابسي وسعت واللي كان ماينصك صار يدخل بالراحه😂


اللي يشتكو من الجوع بالرجيم والتخبيص خذوها كلمه مني لاززززم تحفزو هرمون الشبع عندكم عشان تنحفو بدون جوع
وهرمون الشبع مايتحفز اذا ما اكلتي
ح افصل لكم اكثر من خلال قرأتي المستمره بأي موضوع يخص التغذيه
احنا طول عمرنا نؤمن بأن الشبع يعني امتلاء المعده و اننا اذا قللنا اكل ح نصغر معدتنا وهذا للأسف اعتقاد خاطئ المعده حجمها واحد ربي خلقها بحجم واحد تتمدد وترجع لحجمها نفسه
والشبع هو هرمون تماما مثل الجوع هو هرمون ايضاً كيف تحفزيه وكيف تمنعي هرمون الجوع ؟؟
اول عدو لهرمون الشبع هو هرمون الانسولين لان اذا اكلنا سكريات بشكل مبالغ راح يفرز الجسم كميه من الانسوليين لخفظ السكر بالدم واذا افرز الانسولين حينعدم تماماً هرمون الشبع واللي حيصير انك حتحسي بشبع وتخمه مؤقته ومجرد مايقل الانسولين بعد نص ساعه او ساعه بالكثير حتحسي بجوع شديييد وحترجعي تاكلي بشراااااهه باعتقادك انك جيعانه
طيب كيف نمنع هالشي ونخلي جسمنا دايم شبعان
الحل هو ((( الأكل )))
اول شي لاتفوتي ولا وجبه بيومك واضيفي عليها سناك بين كل وجبتين
بشرط (( تقليل الكميه ))
كلي كل شي يخطر ببالك وتشتهيه نفسك
معجنات لحوم رز مكرونه صواني مشويات كل شي كل شي بس قللي يعني اذا مو عارفه قد ايش تاكلي انا اقولك كلي نصف كميتك اللي تاكليها الان ومع الايام بدون ماتقرري حتلاقيها قلت اكثر وحتوصلي لربع الكميه مع احساس فضيع بالشبع
واهم شي الاسناك شي جدا ظروري
امثله على سناكات انا اكلها
1- قهوه مع قطعه بسبوسه قد كف اليد
2- من حبتين لثلاث معمول مع قهوه
3- فصفص حب بذر << بكل اللهجات😂 مع شاهي بسكر خفيف وابعدو عن المحليات الصناعيه ضررها اكبر من نفعها
4- نصف ساندوتش صامولي بجبن ابيض او كرفت او اي شي احبه
وهكذا
لاحظتو ان النوع مو مهم قد الكميه حتا الفطير المشلتت على كثر الدهن فيه مسموح🙃 المهم يا اخواتي الكميييييييه والاستمراريه بالاكل بالايام الاولى لاتجوعي ابدا واذا حسيتي بجوع اعرفي ان نظامك خطا لازم تاكلي عشان يشتغل عندك شيئين هرمون الشبع والحرق
بعد مرور اسبوعين حتلاحظي انك دايم شبعانه ولاتشتهي لأن هرمون الشبع عندك شغال تمام وجسمك يحرق لأن الاكل يدخل له باستمرار وبدون حرمان لكن رغم كذا اجبري نفسك وكلي كميات صغيره او متوسطه عشان يستمر الحرق
كلي وانحفي وادعي لي
وسلامتكم 💕💕💕