كل وحده تحكي قصة وفاة ......

السلام عليكم ورحمة الله وبركاته ،، هدفي من هذا الموضوع مو تجديد الاحزان لا بالعكس نبي نخفف على بعض ونفضفض هموم مكتومه ..كل وحده فيكم تحكي لنا قصة وفاة اي شخص كان قريب منها اب او اخ او اخت او ابن او ام وكيف صبرت بعدها ..؟.. سبحان الله بقولكم قصة جدتي اصغر عيالها هو اقرب واحد لها وأكثر واحد بار فيها ودايم يلعب معها ما يخليها لحالها حتى مره من المرات يشيلها ويقول هذي بنيتي ويضحك طبعا هذا قبل وفاته بفتره قصيره جته حاله زي الفرح كان طاير من الوناسه بدون سبب وفرفوش مدري وش صاير له هل هو كان حاس انه بيروح مكان جميل بس ما كان يدري ؟.. الله اعلم .. حتى ليلة وفاته يعني بكره بيموت كان يتعشى مع اهله وكانت خالتي جالسه بغرفتها ع مكتبها م تعشت معهم قام من عشاه طل عليها وابتسم ورجع يتعشى هي استغربت من حركته سبحان الله كان يودعهم بدون ما يحس ..وجاء يوم وفاته قام بدري لان عليه اختبار قدرات وكان مستعجل وتغدى رز وحليب غنم وراح يركض ولف على جدتي وقالها ادعيلي يمه تقول جدتي والله ما ابالغ انه يوم لف علي وجهه نور مره وقلت الله يوفقك يا وليدي وراح ع سيارة جيب موديلها جديد والكل منهبل عليها وهو طاير مسرع وصار له الحادث العصر طبعا جدتي تقول فجأة جاني شعور قلت يا الله انك تربط على قلبي تقول ما كنت ادري وش بس كنت أردد هذا الدعاء جاء المغرب وعلموها انه صار له حادث بس ما مات كان بالعناية المركزة ..! طبعا هو مات ع طول وقت الحادث حتى يوم وصل الإسعاف لقوه ميت بس عشان م تنصدم جدتي وجدي الي دروا بس خوالي وخالتي وامي وكل الناس درت الا جدتي وجدي طبعا جاء اليوم الثاني بعد ما دفنوه وعلموه ما شاء الله عليها صابره يا ناس صبر قوي جاها خالي الكبير وقال لها فلان يطلبك الحل وقالت الحمد لله الحمد لله وعلموا جدي وقال الله المستعان ..و الحمد لله على كل حال كان هو اكثر واحد قريب لجدتي وكان هو الي يوديها المزرعه وكان هو الي يودي الاكل للإبل والغنم وبهتم بهالاشياء ..عاد جدتي تقول كل يوم احلم فيه كل يوم احلم اني احط له رز ولحم ويجي يأكل اللحم ويروح ما يأكل الرز تقول واذا مر يوم ما حلمت فيه يضيق صدري .. الله يرحمه ويرحم موتى المسلمين واطفال العالم ويصبر كل مو فقد له غالي