كيفية التعامل مع الحبوب الدهنيه"الرؤوس البيضاء"

السلام عليكم ورحمة الله وبركاته

كيفكم بنات

بما انه في كثير بنات يكلموني عن معاناتهم مع الحبوب الدهنية وبما اني اعاني من نفس المشكلة قررت اني اكتبلكم كل شي عن الحبوب الدهنية
اش هيا الحبوب الدهنية ؟
كيف تتكون ؟
كيفية علاجها وتنظيفها ؟
كيفية التخلص من اثار الحبوب ؟


اش هيا الحبوب الدهنية ؟
حبوب البشرة الدهنية او الرؤوس البيضاء من انواع حب الشباب ويكون شكلها خارج البشرة وممتلئ بسائل في اغلب الاوقات تكون حولين الانف غالبا
تتكون هذي الحبوب ؟

غالبا تتكون عند الي بشرتهم دهنية واكثر شي في سن البلوغ ومرحلة المراهقه وممكن لمراحل عمرية ثانية
طبيعة البشرة الدهنية انه تكون مساماتها مفتوحه وكبيرة لانها على طول بتفرز دهون وهذا الشي يسهل دخول الجراثيم والاوساخ داخل البشرة وبالتالي تتكون الرؤوس البيضا وتاثر على نفسيتنا وتنرفزنا
اذا كانت البشرة دهنية تتكون الحبوب في الغالب على اي جزء بالوجه اما اذا كانت دهنية مختلطة تكون الحبوب مقتصرة على الانف او الجبهة او الدقن او كلهم
ودايما تزيد لما نتعرض للشمس والحر لوقت طويل
في بنات يقولوا انها تبدا تطلعلهم قبل الدورة الشهريه بكم يوم وفي بنات مايكون للحبوب اي علاقة بالدورة الشهرية



كيف نعالجها وننظفها ؟

- مسام واسعه ومفتوحه :
اول شي زي ماقلنا المسامات المفتوحه هيا مدخل الجراثيم فلازم بعد اي عملية تقشير او غسول للوجه نسكر المسام بالتونر
وعشان نصغر المسام انصحكم بموية ورد تبخون فيها الوجه عدة مرات في اليوم دايما بتدهشك موية الورد
وممكن تخلطين معاه زيت جلسرين يزيد لموية الورد الترطيب لانها تجفف البشرة مع الوقت
وحلو لو تحطين ملعقتين موية ورد مع قارورة موية شرب وتشربينها بالصباح تعطي نكهه حلوه ونفس حلو ورح تلاحظين بان بشرتك بدت تنضر وتنور
بالنسبة للصقات الانف الي تخفف الزيوت صح تخففها بس بعد اسبوع تحسين البشرة سارت اسوأ انا جربت ماسك الجيلاتين مع الحليب هذا الي من جد ادهشني ينظظظف والحبوب تقريبا اختفت ممكن تسوينها كل اسبوعين تلقون الطريقة في موضوع الخلطات بمدونتي
حاولي كل شهر تسوين حمام بخار للوجه يخرج كل الترسبات من بقايا مكياج وزيوت وجزيئات غبار وبتخف معاكي مشاكل البشرة الدهنية كثير


- الاوساخ والجراثيم :
البشرة الدهنية على طول تتاثر بالاوساخ والجراثيم فلازم دايما نحميها من انها تتعرض للاوساخ
اكثر شي يلامس الوجه هوا اليد فلازم نحرص برا البيت بالذات انو مانلمس الوجه او الحبه تحديدا الا بعد مانغسل اليد بشكل كويس لانها زي ماقلنا على طول تتاثر
كمان قبل ماتوزعي كريم او فوندايشن بيدك على وجهك لازم تكون اليد مغسلة بشكل كويس لانو هذي الاشياء تلصق في الوجه وتلصق معاها الوسخ
دايما خلي معاكي معقم ومسحه طبية
في اشياء نغفل عنها ولها تاثير كبيرعلى حياتنا منها تطبيق سنة الرسول صلى الله عليه وسلم في نفض الفراش قبل النوم ثلاث مرات
قال صلى الله عليه وسلم: (إذا أوى أحدكم إلى فراشه فلينفض فراشه بداخله إزاره فإنه لا يدري ماخلفه عليه....)
لآنه سبحان الله الانسان لما ينام بتسقط منه خلايا وكل مرة ينام تسقط خلايا جديدة فتخيلوا لو انه هذي الخلايا الميتة ترجع لجسم الانسان كيف رح تاثر على بشرته واش ممكن تسبب له من امراض اخطر
وزي ماقلنا اليد اقرب شي للوجه والاظافر الطويلة محمله بكل انواع الجراثيم فلااااازم مانترك اظافرنا طويلة بشرة صحية واظافر طويلة مايجتمعون



- كيفية التعامل مع الحبة :
السائل الي بداخل الحبة هذا نكبة الحياة دايما تلاحظين انك بس تتخلصين من حبة تطلعك عشرة غيرها في نفس المكان او غيره
السبب انك لما تفقعينها المادة السائلة هذي تجي على جزء من وجهك و تتكون حبه جديده او تجي المادة السائلة على يدك وكل مالمستي جزء في جسمك زي الرقبة الظهر او الفخذ يلامسه السائل وتبدا تتكون حبة جديدة وسرا الليل واحنا ماسرينا
فلازم لما تنفقع الحبة تخرجين كل السائل منها بالمنديل وقبل ماتلمسين اي شي غسلي يدك بالموية والصابون لان الموية وحدها ماتكسر جزيئات المادة الدهنية وبعد كذا عقمي مكان الحبة بمسحة طبية
الحبة الدهنية اما تنشف من نفسها وتروح بعد 3 ايام تقريبا ممكن تزيد او تنقص واما تنفقع من نفسها مع الحر غالبا
مانصحك تفقعينها بنفسك لانها كذا رح تترك اثر احمر لمدة طويلة بس لو عندك خرجة واضطريتي تفقعينها لازم تنظفينها كويس ولا بترجع مية حبه مكانها
الضغط على الحبة مرا خطير ينشر السائل داخل البشرة ويطلعلك مشاكل اسوأ




كيف نتخلص من اثار الحبوب ؟
سوي تقشير للبشرة مرتين في الاسبوع ولاتنسين تقفلين المسام بالتونر وهيا مع الوقت والاستمرار تبدا تختفي
مافي كريم او منتج معين استخدمته وازال الاثار تماما دايما الحبة الي تلعبين فيها وتفقعينها يطول اثرها اما الي تتركينها تروح من نفسها ماتترك اثر عميق

هذا بوست ثاني ان شاء الله يساعدك هنا
بنات في الحالات المتقدمة والحبوب الكثيرة روحي طبيب استشاري افضلك

اسفه بنات كثرت عليكم هرج بس قلت لازم اصب كل المعلومات والتجارب الي عندي وان شاء الله تكونوا استفدتوا

ان اصبت فمن الله وان اخطات فمن نفسي
دمتم بود