الجواب لكل هالأسئلة لا، متلازمة تكيس المبايض ما تروح! تكيس المبايض أو متلازمة المبيض متعدد الحويصلات هي حالة هرمونية مزمنة زي خمول الغدة مثلًأ أو السكر! ممكن نعالج أو نخفف الأعراض الي ترافق تكيس المبايض زي عدم التبويض، تساقط الشعر، نمو الشعر في الوجه والجسم، حبوب البشرة، التعب والإرهاق .. لكن الحالة مستمرة ولسه مالها علاج.
طيب ليش مافي علاج للتكيس؟
السبب الرئيسي إنه أصلًا سبب تكيس المبايض أو متلازمة المبيض متعدد الحويصلات كما تسمى علميًا غير معروف، حتى وقتنا الحالي ما اكتشفوا السبب إلي يخلي الهرمونات تتلخبط بهذا الشكل وتسبب متلازمة تكيس المبايض، وطبعًا ما يقدروا يخترعوا علاج إذا ما عرفوا المسبب.
السبب الثاني إن الأعراض تختلف من مرأة للثانية، يعني تشوفي وحدة عندها متلازمة تكيس المبايض لكن تحمل وتجيب أطفال، بينما وحدة ثانية حتى بعد عدة محاولات ما حملت. تشوفي وحدة عندها تكيسات لكن نشيطة وما تحس بإرهاق طول الوقت عكس وحدة ثانية عندها نفس المتلازمة. فصعب يخترعو حبة أو دواء يناسب كل الي عندهم المتلازمة بما إن أعراضهم مختلفة.
بس زي ما قلنا تكيس المبايض ما يتعالج لكن أعراضه ممكن نعكسها ونخفف من حدتها.
طبعًا لما رحتي لدكتورتك قالتلك عندك تكيس وأعطتك حبوب تنظيم الدورة ومنع الحمل، أو وصفتلك جلوكوفاج، نصيحتي لك قبل ما تبدئي بأي من هذه الأدوية إنك تحاولي تسوي تغييرات بسيطة في نظامك الغذائي ونفسيتك وحركتك ونومك! وترفعي من جودة حياتك.
وتقدري تبدئي اليوم بهذه التغيرات البسيطة إلي مثبت إنها جابت نتائج مع كثير من النساء إلي عندهم متلازمة تكيس المبايض مهما كانت أعراضك:
- أضيفي الكثير من الألياف والبروتين لأطباقك.
- أضيفي الدهون الصحية لأطباقك زي الأفوكادو، المكسرات، الزيتون وزيت الزيتون.
- خلي عندك روتين للأكل تأكلي في نفس الأوقات وتأكلي وجبة فطور وما تجلسي جيعانة لفترات طويلة.
- قللي من الأكل المعالج والمعلب في أكلك.
- نامي على الأقل 7 ساعات في الليل.
- وسوي لنفسك روتين مشي أو رياضة بسيط تقدري تستمري عليه مهما انشغلتي.
- حللي فيتامين د وابدئي بخطة علاجية أو وقائية حسب النتائج.
لما يكون نظامك بسيط ومو صعب أسهل تستمري عليه وتشوفي نتيجة ترضيكي، كثير يبدؤوا أنظمة زي الكيتو وإنك تقطعي الحليب ومشتقاته تمامًا أو تقطعي الجلوتين تمامًا لكن ما يقدروا يستمروا عليه وهنا ترجع مشاكلهم من جديد!
عشان كدا دايمًا أتأكدوا إن العادات الصحية الي بتضيفوها لحياتكم تكون بسيطة جدًا وتقدروا تسووها كل يووم.
وللمرة الأخيرة > متلازمة تكيس المبايض ما تتعالج، لكن أعراض المتلازمة نقدر نعكسها ونخفف منها عن طريق تحسين جودة حياتنا.