كيف أقول لزوجي انا مب طايقه ريحتك؟

السلام عليكم عزيزاتي وأخواتي معشر الحوامل

بنات انا في الشهر الثاني ومشكلتي من أول ما حملت والوحام ذابحني
كرهت ريحة بيتي "ترى بيتي جديد ونظيف لاتشكون انه فيه ريحه"
وكرهت أكل بيتي وريحة زوجي بالأخص.. حتى ريحتي انا ساعات
اتسبح مرتين في اليوم من كثر مافيني لوعه .. طبعاً أجبرت نفسي
اقعد في البيت وكنت يوم أيي زيارة بيت اهلي تبدا تخف اللوعه والهبوط

قلت يالله ما بحط الموضوع على بالي لأني إذا عززت الفكرة في راسي
ما بطيق اقعد في بيتي، لكن ماقدرت احيان اقعد ابكي بدون سبب واذا
تقرب مني زوجي احس اني "برجع"، طبعاً انا شرحت له اني اتوحم وقلت
له اني ما اطيق ريحة البيت .. واتوقع انه حس وفهم شوي..

اللحين هو سمح لي اقعد بيت اهلي بس يا بنات لين متى؟ صحيح اني مب
طايقه ارجع بيتي بس اخاف هالابتعاد عن زوجي يسبب فجوة بينا خصوصاً
إن علاقتنا جداً طيبه..

وعندي تساؤل هل فعلاً الوحام ممكن يخليني اكره بيتي بالذات؟
مع العلم دكتورتي عطتي حبوب للوعه .. بس ما يابت نتيجه
بالرغم انه هني بيت اهلي حتى ساعات ما استعملهم وعادي اللوعه
نادر ما تجيني..