السلام عليكم
امتنانا للقسم لاني استفدت منكم كثير
واتمنى باقرب فرصة اقدر انزل صور من تنظيمي واستفادتي (تراني عليمية بهالحركات ) حبيت انقل لكم تجربتي وكيف استفدت منكم كثير وشحنتوا همتي
لكن فيه عيب واحد مهم اذكره صرت ادقق كثير بالشغل ولهذا شغل الشغالات صار ابدا مايعجبني خصوصا لما اكتشف نواقصهم
حابدا من غرفة الغسيل
لاني دخلت القسم بحثا عن طرق غسل الثياب لاني تعودت ان اترك المهمة للشغالات
لكن غسيلهم مايعجبني ما احس له ريحة وما اشوف الثياب نظيفة
خصوصا بشغالتي الاخيرة كانت اصلا وصخة والغسالة ماتشتهي تطالعيها من الوساخة غير انها خربت لي ثياب
وطلعت انها من العجز والكسل تحط كل شي على بعضه
غير انها دايم تتحجج انها بالطابق الثالث الي فيه غرفتها لانها تغسل ثياب
فبدات من هناك
وعملت لي غرفة غسيل مجهزة ومريحة بالطابق الارضي بالحوش وياليتني صورت لكم قبل وبعد
بعد عندي بقدر اصورها لكن قبل كانت ماساة
اول شي قلعت ذيك الشغالة
نظفت الغسالة بصابون وفركتها بفرشاة اسنان للحواف الدقيقة وخليتها تشتغل بكلوركس وماء ومسحتها بعد ذلك بديتول وطلعت تلق (طبعا انا سويت كل هذا لاني كنت قرفانة من بعد ماشفت الغسالة وحالتها المأسوية )
وبعدها استفدت من تجاربكم بالغسيل والان غسيلي ناصع البياض للابيض وزاهي للملون
والي يبيني اعلمه تراني بالخدمة
الشي الي استفدته من تجربتي بالغسيل
اني اولا وفرت مساحيق وصرت اعرف المساحيق الجيدة
رائحة الغسيل لما اغسل تفوح نظافة حتى زوجي يقول لي هالشي وملاحظه غير ريحة منعم الاقمشة ونعومة الملابس وطبعا نظيفة وخالية من البقع
بقعنا محد يشوفها غيري خصوصا لعيالي واي شي على الملابس الداخلية اتصرف فيه اول باول
اعرف بسرعة اذا القطعة تالفة وماتستحق اغسلها لاتخلص منها
صرت اعرف كمية الملابس عندنا لاني كنت اشتري بالهبل اول
طبعا اتطمن على غسالتي واتاكد من نظافتها ونظافة غرفةالغسيل اول باول لاني الي اغسل فيها مو مثل اول بعد ماشفت الهوايل وراء الشغالة
والشي الاهم اني صرت اميز لما اشتري ملابس اني ما اشتري اي شي
فيه ملابس صعبة بالغسيل بالذات الي مخلوطة ابيض مع ملون يطبع مثل الاحمر لما تغسلينها مع الابيض يبهت اللون الملون ولما تغسليها مع الملون الابيض مايصير يلق
وفيه ثياب تكون صعبة بالغسيل تحتاج تنظيف جاف فبالذات للاطفال ما اخذها لان ثيابهم تحتاج غسيل مستمر
صرت اعزل الثياب الي تحتاج غسيل باليد او غسيل ناعم مو مثل اول ستيانتي الغالية كلها تخرب بسبب الشغالات لانهم يغسلونهم مع كل الثياب
غير هذا طبعا صرت استخدم المجففة استخدام موجه فاولا اوفر طاقة واستفيد منها واحفظ الثياب لمدة اطول
بمعنى مو كل الثياب تكون بالمجففة بعضها يسهل عليك الشغل مثل الجينزات والبنطلونات والشراشف والفوط وهذي اوفر وقت خصوصا بالشتاء غير ان الجنز مايحتاج تكويه بعد التجفيف بالمجففة اذا طلعتيه حار وطويتيه (الجنز مزعج بالكي ياخذ وقت )
وايضا الملابس القطنية ماتنفع تحطينها بالمجففة لانها اما تنكمش او تمط او تخرب رقبتها
والي فيهم استك مثل الملابس الداخلية وسراويل زوجي الداخلية بالمجففة يخرب المغاط ( الشريط المطاطي )
طبعا سابقا ماكنت اعرف هالشي وثيابنا كثير نخرب حتى بيجامة لولدي مالبسها الا مرة صارت هلاهيل تفشل لان الشغالة كانت تحطهم بالمجففة بشكل عشوائي تريح روحها من النشر رغم ان الامر مايستاهل
بنشرها بمكان جيد التهوية ومعرض لشمس والهواء
نجي للكي
استفدت من المنتدى حركة الكومفورت يخفف بالماء للكي
وحركة ثانية استفيدوها مني
وهي الي يبقى من قواير المياه لاننا نستخدمها كثيرا ما ارميه اما اعبي به رشاش المياه للكي لاني ما استخدم مكواة بخارية لمشاكلهم انهم ينسدون من الاملاح فاستخدام نظام الرش
واستخدم الماء المتبقي بعد لري الزرع الداخلي
طبعا لما تكوي الثياب تكون ريحتها تجنن وناعمة الملمس مثل الي بالدعاية لاني اصلا مستخدمة كومفورت بالغسيل وكومفورت بالكي وافتحي ريحة الدولاب وتمتعي
برضه استفدت من حركة انك تحطين طبقة قصدير او معدنية على طاولة الكي لتسهيل الكي
بالنسبة لي شريتها من محل الي مثل القصدير اعتقد من الهزازي او من ساكو
لكن اكثر من شغالة تجيني مايفهمون ويشيلونه رغم انه يسهل عليهم الكي
بعدها اوريها بالنجربة والبرهان كيف ان وقت الكي يختصر للنصف بوساطتها
يمكن بعضكم يلومني وماحقول اني صح
لكني موظفة وغرفة الغسيل بالطابق الثالث وبالنسبة لي كان متعب ان اتابع الغسيل من هناك
غير اني كنت استصعب المهمة
اذا عجبكم الموضوع اكمل
ننتظر المزيد لا تتأخري علينا
جزاك الله خير