كيف اعرف ان ابني متأخر بالكلام او لا

وينكم ياامهات نبي خبرتكم

عزيزتي الله يحفظ لج ولدج

أنا اختصاصية نطق ، ولله الحمد

دام ولدج يفهم عليج وعلى اسئلتج وعلى الطلبات اللي تطلبينها منه ، الحمدلله هذي علامة إيجابيه

في عمر الاربع سنوات، عادة الأطفال ينتجون جمل من أربع إلى خمس كلمات ، لكن في بعض الأحيان يحدث تطور بطيء عند الطفل من ناحية الانتاج ، (إصدار كلمات) بالمقارنة مع الأطفال اللي بسنه بس دائما حطي في بالج التأخير لا تعتبر مشكلة

إلا إذا وصل عمر سبع سنوات بدون أي تطور وهذي حالة نادرة حبيبتي

بالمختصر ، عززي عنه اللغة الاستيعابية وتواصلي معاه أكثر عن أول

وبتشوفين إنه لسانه بيبدا يطلق الكلمات كلها مرة وحدة

سامحيني اختي لاني رديت عليج بشكل مختصر


أنا مستعجلة شوية ♥️ اعذريني

مشكووره بنت طموحه واذا فضيتي ممكن تفيديني بكيف اعزز عنده اللغه الاستيعابيه وشكرا ليك عسوله

تعزيز اللغة الاستقبالية أو الاستيعابية للطفل يكون بعدة طرق :

أولاً: حاولي التقليل من أسئلة نعم أو لا ، واستبدليها بكيف وليش وشو وهالنوع طبعاً من الأسئلة ✔️


ثانياً: دخلي بينكم طرف ثالث مثلاً أخو الطفل أو صديقه أو أي أحد قريب منه ، وسوي معاهم مسابقة وشجعي ولدج إنه يتكلم بالتقليد ، لما يشوف هالشخص يتكلم ويتفاعل ممكن يتحمس ويتكلم بطريقة لا إرادية 👩‍👧‍


ثالثاً: استخدمي الكثير والكثير من الكلمات منها العادية وحتى المعقدة لأنها تفتح ذهن الطفل حتى لو ما نطقها بس على الأقل خزنها في ذاكرته


رابعاً: استخدمي جهاز لتسجيل كلام طفلج مدة دقيقة واحسبي عدد الكلمات اللي يقولها وقارنيها بعد شهر أر شهرين وتابعي تطوره بنفسج


ملاحظة مهمة: طبعاً اللغة الاستقبالية والتعبيرية مرتبطتين جداً في بعض ، وعلاقتهم طردية، وتطوير الأولى سيساعد في تطوير الثانيه بالتأكيد

أرجو إني أكون ساعدتج قدر المستطاع ولو عندج أي سؤال خذي راحتج عزيزتي

الله يبلغج في ولدج ويجعله بار فيج