كيف تتصرفين في مثل هالموقف؟؟

مرحبا:

يا بنوتات و حريمات عالم حواء ، كيفكن أن شاء بخير أشتقت لكن كثير ...

معليش على الغيبة بس تعرفون الحمل و متاعبه و يارب تعدي على خير ...

بنات أبغى أخذ رأيكن في حاجة ،، يمكن وحده منكن مرت في نفس الموقف ...

السالفة و مافيها:

اليوم دخل علي زوجي وهو شايل له كيس كبير فيه ملابس لبنتي هتون ، و كنت أظن أنه شاريها لها بس طلعت أخته مرسلتها معه ، لانه بنتها أكبر من هتون و الملابس هاذي صغيرة عليها ، يقول زوجي أنها ما لبستها و أنها من شريتها وهي صغيرة و الخياط ما يقدر يوسعها ، بس بصراحة لما قلبتها فيه بعض الملابس أحس انها ملبوسة ...

و حتى لو كانت جديدة بصراحة تضايقت و عصبت على زوجي ليش تأخذها ؟؟ لانه كم مرة سوت كذا و قلت له أنا ما أحب ألبس بنتي ملابس عقب أحد فقال: يعني وش تبغيني أقول لها ؟؟

و مرة قالت لي بنفسها و أنا قلت لها أنا ما أحب أخذ من أحد ملابس لبنتي ، و هذا من زمان كانت بنتي صغيرة...

ما أدري كيف أتصرف ؟؟ بصراحة أستحي منها خاصة أنها مرة حبوبة و ياما ساعدتنا أيام ما كنت أدوام كنت أحط عيالي عندها ، و انا متأكدة أنه مو قصدها حاجة ، بس وش أسوي ؟؟ أنا كذا طبعي و الاسباب:

أنه بنتها هاذي علاقتها مع بنتي مو مرة و دايم تتعاير عليها و تضحك عليها وشلون لو لبست ملابسها...

و حاجة ثانية أنا ذوقي مختلف جدا عن ذوقها ، فهي تحب الملابس اللي فيه حركات زايدة و الوانها شوصارخة ، أما أنا فأحب الملابس الهادية و الناعمة و البسيطة و ما أحب أبدا تكون فيها حركات كثيرة..خاصة أن بنتي مليانة شوي و شكلي جسمها يناسبه حاجات معينة ...

هاه قولوا لي وش الحل ؟؟ بصراحة من حملت و أنا عقلي مرة مقفل و نفسيتي تعبانة يعني مو قادرة أفكر أبدا...

أنا لما حسيت أنه زوجي متضايق من موقفي قلت له أصلا هتون ما تحب تلبس عقب أحد و يضيق صدرها ، وشلون أوصل لها هالكلام بطريقة ما تضايقها لانه أعرف لو قلت لها كذا بتقول: على كيفها ، ما عليك منها...



يالله منتظرتكم..