كيف تخلي مكياجك مخملي وناعم بتكنيك سهل جداً .

مرحبا بنات ..
اكيد كل وحده مننا لها طريقتها الخاصه بالميك اب وكيف تظهر ملامح وجهها بشكل جذاب ومرتب او جريء او ناعم ..
ولكن في البعض يعاني بوضع الميك اب واول ماتسمع طاري مناسبه اول شي تشيل همه ايش اسري مكياج وكيف بيطلع شكلي طيب بشرتي جافه طيب فيه قشور وووو الخ من مشاكل البشره ..
الوضع جداً سهل وبسيط مشاكل البشره ماتنتهي
واحيان فجاه تطلع لك حبه بوقت غير مناسب وتخرب مودك وتشيلك هم كيف بيطلع شكلك مع الحبه هذي
لكن في طرق لو نسويها مانشيل هم بعد كذا ونكون مستعدين لاي مناسبه تجي حتى لو فجاه جات ..
اولاً عشان نخلي مكياجنا نظيف مرا لازم نجهز خطوتين مهمه اولها فرش الميك اب وثانيها البشره
فرش الميك اب لازم تكون نظيفه ومعقمه
تقولي لي كيف اعقمها ماعندي كحول للتعقيم وخلافه ..
ابسط الامور ديتول اثناء ماتغسلي فرشك اشطفيها بالديتول وخليها لين تنشف تماما وغلفيها بالسولفان ، ليش ؟ لان طالما هي معرضه للهوا ومكشوفه راح تتملى اتربه بالتالي بشرتك تنعدم وتصير عندك حبوب ..
البشره كيف نهيئها ؟
قبل المناسبه دايما نستخدم مقشرات الصيدليه واضعف الايمان سكر وزيت لكن افضل يكون ملح وزيت زيتون ليش ملح ؟ لانه انعم من السكر بشرة الوجه ارق من الجسم فتحتاج صنفره ناعمه ..
واللي بشرتها دهنيه تحط قطرتين ليمون لا تكثر تعملي الصنفره برفق ولا تضغطي على الجلد لا يتضرر واللي بشرتها فيها حبوب كثيره يفضل انها تحط زبادي ونشا فقط بدون صنفره واذا نشف تدعكه دعك خفيف جدا وتتجنب الحبوب
وبعدها تغسلي وجهك بغسولك المعتاد وبعدها تمرري ثلج على بشرتك وتمسحي بعدها وجهك بمويه الورد
كذا انتهينا من تهيئه البشره وتحضيرها ..
نجي للخطوات الثانيه
الترطيب .. حتى لو بشرتك شديده الدهنيه تقدري تستخدمي مرطب خاص للبشره الدهنيه يجي غالبا نفس الجل او المويه خفيف جدا ..
نترك المرطب لين ينشف وبعدها نوزع البرايمر على كل البشره
ايش فايده البرايمر ؟
يكون زي الطبقه العازله يخفي لك المسام الصغيره ويخفف من المسام الكبيره يمنع الدهون بنسبه جيده ويعطي مظهر صحي للبشره
متى ممكن نستغني عن البرايمر ؟
بحال كانت بشرتك خاليه من العيوب ومافيها دهون كثير ..
ننتظر البرايمر ينشف وبعدها نبدء بالميك اب
بنات ضروري للي ماتعرف تتعلم من اليوتيوب
او الانستقرام ..
في مناظر كلنا بغنى عن شوفها تلاقي البنت ملامحها حلوه وتخرب نفسها برسمة حاجب او طريقه رسمة عين انتبهوا للنقطه هذي يابنات ..
ونفرق مابين ميك اب ناعم وميك اب الخرجات وميك اب البيت ..


الاقي كثير بنات يجون مناسبات مكياجهم يكاد لا يظهر وتشوفه ميك اب ناعم والله خساره وقفتك على المرايا 😂
يعني لا تحطي كثير اذا ماتحبي لكن ابرزي جمالك بطريقه صحيه وحلوه ..
وبنت تحب الميك اب لدرجة تقولي اوك من اي عصر جايه ؟ كل هالميك اب بالطريقه هذي؟
قبل نتفنن نشوف نتعلم ونطبق مرا مرتين
الان ماشاء الله اغلب البنات صاروا يعرفون كيف يعملوا ميك اب لانفسهم بطريقه ممكن احسن من الميك اب ارتست لكن بالمقابل فيه بنات لا ..
فراعوا قبل كل شي ملامح وجهكم انه فيه جمال انتو جالسين تدفنونه نتعلم كيف نظهر الميك اب بطرق جميله وسهله ..




بالنهايه انا مو ميك اب ارتست انا وحده احب الميك اب واتقنه الحمدلله هالخطوات اللي كتبتها دايم احضرها بيوم المناسبه فالكل يسال عن الاساس والبرايمر والسر اصلا بالتهيئه مو بماركة المكياج ..
فهيئوا بشرتكم واختارو المنتجات المناسبه لنوعية بشرتكم وراح تدعوا لي ❤️❤️❤️