اليوم تانى موضوع ليه والحمد لله جربته والنتيجة كانت هايله والحمد لله
هاقدملكوا تلات حاجات الاول كيكة شيكولاته سريعه جدا مابتاخدش وقت والله خلال نصف ساعه كنت جهزتها واستوت
ثانيا صوص الشيكولاته الى الكل عايز يعرف طريقة مضمونه وسهله تنفع للتورتات وللإكليرو للتزويق عموما
ثالثا طريقة عمل القشطة أو الكريمة لحشو التورته و الباف باسترى وحشو القطايف والبسبوسة
ياله بينا ويارب يارب تنول اعجابكم وتحبوها
أولا : طريقة الكيكة :
المقادير : 3 ملاعق كبيرة سمن
1 كوب لبن
3 كوب دقيق
2 كوب سكر بودرة
3 ملاعق مليانة شاى بيكنج بودر
5 بيضات
1 ملعقة كاكاو
فانيليا
الطريقة :
- نسيح السمن ثم نضيف الكاكاو ثم اللبن ثم السكر ونقلب حتى يدوب السكر تماما وبعدين نطفى النار ونتركه ليبرد
- نبدأ بإضافة البيض والفانيليا مع الدقيق بالتبادل ( ولو الدقيق يكون منخول يكون أفضل )
- ندهن صينية بزبدة ونرش شوية دقيق ونصب المقدار ونخبزه فى فرن متوسط الحرارة حوالى نصف ساعة
- ونطلعها لتبرد
- نشقها نصفين استعدادا للحشوة بتاعتنا
- تسقى كل شق بعصير مش كتير وبعدين تحطى طبقة من الكريمة ( طريقتها هنقولها دلوقتى ) وبعدين اى نوع مربى انتى تحبيه
- وبعدين ترجعى الشقين على بعض
- ممكن على الوش تحطى كريم شانتيه انا حطيت قشطة من الى عملتها على وش الكيكة وبعدين عملت خطوط من صوص الشيكولاته كان فى الثلاجة عندى ورحت مموجاه بالسكينة فأصبح شكله رائع بعد مابردت فى الثلاجة .
- بس الى بتمشى على دايت تبعد عن الصنف ده اصله هيخربلها الدايت
نيجى لطريقة القشطة أو الكريمة :
فنجان لبن عليه ملعقة دقيق وتقلبى وبعدين تحطى 2 ملعقة سكر وتقلى على النار لغاية ماتتماسك
- لما تتماسك ترفعى من على النار وتحطى 2 ملعقة قشطة وتقلبى بسرعة عشان ماتتكتلش وبعدين سيبيها تمسك شويه وتبقى جاهزه لاى حشوه وبس خلاص
- فاضل صوص الشيكولاته
صابع زبدة عليه 3 ملعقة طعام سكر عليه 5 معالق طعام حليب بودره عليه 5 معالق طعام كاكاو وكأس ميه
وتقلبى ده كله على النار لغاية ماتمسك
ملحوظه
- لو مستعجله على الصوص وهاتحشى بيه فى ساعتها خليه يجمد شويه على النار وبعدين شيليه واستخدميه فى الحشو على طول
- ولو هاتسيبيه فى التلاجة طلعيه سائل شويه لانه هايجمد بعد كده
- لو شلتيه وهو لسه سايل زى الباشاميل مش هايثبت فى أى حشو زى المعجنات وهايتحرق ومش هايبقى له طعم خليه جامد وحطى كتييير فى الحشوة وجمدى قلبك
والله كان خطييير وسهل جدا وبرده بنات الدايت اوعوا تقربوا
اعذرونى انا مش ست بيت شاطرة اوى بس لما بعمل حاجة حلوة بحب افيد اخواتى فى منتدى حواء عشان كلنا نستفيد من بعض
وانا مستعدة لاى اضافات ومعلش مفيش صور لسه جديده هاعرف الطريقة وهنزلكوا صور بإذن الله
وادعولى ربنا يرجعلى زوجى من العمرة بالسلامة ويتقبلها منه وعقبال كل عضوات المنتدى