أهلين خواتي
حبيت أحط لكم طريقة كيكه بس شو لذيذه وطريه وأولا دي يحبونها ولو سويت كيكه
غيرها يزعلون وريلي بعد يوم يبا ني أسوي الكيكه يتآمر مع الأولاد ويذكرهم بالكيكه
علشان يحشروني وأسويها وما يملون منها وكل إلي يجربها بيا مني الطريقه
طولت عليكم صح
المهم المقادير حبايبي
3 بيضات 1 قالب زبده متوسط
ملعقه ونصف بيكين بودر
2 علبة لبن المراعي ها لبن المراعي مب روابي أو شي ثاني سمعتو
3 أكواب من الطحين
2 كوب سكر ناعم ها لازم يكون ناعم
أوه نسيت الفانيلا أنا أستخدم النوعين ويا بعض البودر وقليل من السائل علشان الريحه
المهم إن شاء الله بس ما نسيت شي
الطريقه عاد يبالها تركيز فركزو إشوي
أول شي تنخلين الطحين ويا البيكن بودر واتخلينه
إتذوبين الزبده بس مب تحرقينها لو بتذوبينها على النار حطي معها فنجان زيت علشان ما تنحرق وقصري على النار وأول ما تدوب شوي خلا ص بندي عنها
وهي بدوب بروحها لأن مب لازم تكون حاره
المهم تخلطين الزبده مع السكر الناعم بالخلاط بروحهم ها بروحهم إنزين
لين ماتستوي مثل الكريما
وبعدين تخفقين البيض بعد بروحه ها مب ويا السكر لا بروحه وتحطين الفانيلا طبعا ويا البيض
ثم إتضيفين البيض المخفوق على خلطة السكر والزبده وتخلطين زين وبعدين إتضيفين اللبن والطحين بالتدريج ها بالتدريح قلنا مب خلط بلط إنزين
وتخلطين زين لين ما إيدج تتعب
وبعدين حبيباتي نسيت أقول خلو الفرن يشتغل من قبل لا تبدون على درجة 180
إنزين
أنا أحط نص الكميه بقالب متوسط والنص الثاني أوزعه بالقوالب الصغار الدوائر عارفينها حق اليهال
لاحظي لا تحطين الكميه كلها بقالب واحد خصوصا لو كان صغير أو متوسط
لأنها حجمها طبعا بيزيد عن تخترب وبعدين تدعون علي
المهم إتخلينها بالفرن حوالي نص ساعه وها لا تفتحين الفرن عاد بتفش طبعا
وبعدين شغلي الحراره إلي فوق من الفرن
وبعدين طلعيها بس ها لا تاكلونها حاره هاي الكيكه أحلى يوم تبرد إذا كنتو يواعى
حطوها بالثلاجه شوي وطلعوها وأهم شي تزينوها من فوق بالسكر الناعم بيخلي طعمها إيجنن
وبالهنا والشفا والي بتجربها إتقولي رايها
إنزين
أم عبادي وحسن @am_aabady_ohsn
محررة ذهبية
يلزم عليك تسجيل الدخول أولًا لكتابة تعليق.
أم العلاء
•
مشكووووورة بس ياريت تقولين لنا
الزبدة كم جرام
و لبن المراعي كيف حجمه بعد خبرينا شو قياسه
مع الشكر
الزبدة كم جرام
و لبن المراعي كيف حجمه بعد خبرينا شو قياسه
مع الشكر
أهلين حبيباتي الزبده 200 جرام تقريبا
واللبن اللصغير طبعا أبو ريال أو درهم
وإن شاء الله تظبط وياكم
واللبن اللصغير طبعا أبو ريال أو درهم
وإن شاء الله تظبط وياكم
الصفحة الأخيرة