لا اشعر برغبة في العيش في الحياة الدنيا

هذه المشكلة لقيتها في منتدى طريق التوبة ... تحكي عن أخت تعاني من قسوة أهلها .. الله يهديهم ويسخرهم لها .. اسأل الله أن يعوضها بزوج تقي ورع يسعدها ويعوضها عن العذاب اللي شافته من أهلها ..والله المستعان

تقول الأخت في رسالتها :

الســـلآم عليكم ورحمة الله وبركآته ..

الحقيقه قبل لآبدآ بالكلآم آوجه شكر خآص لكم

آخوآني في الله على هذ الجهد الجبآر والرآئع

وآسئل الله تعالى آن يثيبكم كل الخير ..

ويرزقكم الجنه على كل مآتقدمونه لاخواننا ..

بصرآحه ابتكلم ببسآطه وبحريه لاني مادري رسالتي

بتوصل لكم او لا .. ؟! يمكن تقدمون لي حل .. بس

يمكن صعب اقدم عليه .. انا بنت محجبه حجاب شرعي

كامل ارتدي النقاب والعباءه الطويله ..بنت بسيطه

جدا ماترغب باي شي في هالحياه غير الستر

وراحه البال .. تربيت في بيت كله ظلم وسيطره

من صغري وانا احمل فوق طاقتي اضرب اهان

اعاقب وانا مظلومه يمكن تستغربون لقلت لكم ان عمري

كان مايتجاوز 12 سنه ويتم ضربي بالعلاق الملابس

او اضرب بمجموعه من سعف النخيل المربوط لخطا

بسيط يمكن اقترفته لصغر سني او بسبب اخطاء

غيري وتلفق لي عشت طفوله محرومه من ام تفهمني

وتعرف وش بي ؟ وش الي في خاطري ؟ حرمت

من ابسط حقوقي كطفله .. كانت امي بس تضربني

او تكلم اخوي ليقوم بضربي او ليعنفني بالكلام

مثال بسيط كنت البس نظارات وكانوا يعايروني

ام اربع .. كانوا يتعمدون اهانتي قدا الضيوف قدام

الاهل قدام الكل كرهت الناس كلها ..وانا صغيره

صرت انطوائيه حيل افكر انا وش سويت علشان

اقابل بمثل هالمعامله .. وعمري ماتجاوز 15

قلت ابتقرب منهم الكلمه الطيبه حسنه اجلس عند ابوي

احاول الاقي عنده حب الاب او كلمه يابنيتي

وش فيه خاطرك يضمني القى كلمه تسعد خاطري

جلست عنده ابي اسولف معه وكل الي الله قدره

عليه انه يقول لي وش مجلسك عندي ناقصني

خبال .. رجعت اجر اذيال القهر والحسره وافكر

بذنب سويته مالقيت .. طلعوني من المدرسه وماكملت

واخواتي كلهم كملوا قلت اهلي اعلم .. يمكن

فيه خير لي .. ومادري اي خير في الجهل بس ابرر

موقفهم وتعاملهم معي .. حرمت كل شي حتى الحلم

حرموني منه لاني مادرس خواتي كل شي يتمنونه يجيهم

وانا فقط لخدمتهم .. للضرب للتنكيل.. كرهت حياتي

كلها اعيش بين اهلي غريبه ماكني منهم ..

لو ابحكي الي يسونه بي ماصدقه عقلكم

لكن مابي اطول عليكم .. المهم تفننووا في عذابي

بكل اشكالهم وانا طالبه الصبر من عنده وانه يفرجها

قلت يمكن انحرمت عند اهلي .. الله بيعوضني

بزوج صالح .. وكل هذا ابتلاء من رب العالين

يشوف صبري .. وصل عمري 24 حاليا وزارتنا

صديقة امي وكالعاده اعامل كالخادمه وتعمد امي

احراجي قدام الكل ومهما كان قدمت لها الضيافه

ورحبت بها وامي تحتقرني وتغرس خناجر بصدري

وانا اقول امي وتمون لو هما سوت انصرفت بعد

ماحرجتني قدام الحرمه وبعدها باسبوع تقدمت الحرمه

لخطبتي تفاجات من هالامر واخواتي ضربتهم الغيره

مع انهم حققوا كل شي وانا ولاشي .. ويمكن من خلال

زواجي احقق شي يستاهل اذكره .. وصل الامر لابوي

ووصله رفض اخواتي المددلات والنتيجه قال لامي

قولي لها تختار وحده ثانيه من البنات لان الي اختارتها

خبله ولاتنفع زوجه .. اظلمت الدنيا بعيني فكرة انتحر

وراودتني هالفكره كثير كيف اقدر اعيش طول عمري

بينهم .. لكن ارجع لعقلي واقول الله يختبرني

سكت ووكلت امري لله .. بعد فتره وصل لابوي الخبر

ان الحرمه مصره علي ولاتبيني الا انا لولدها وولدها

مثل ماذكرت امي مدير بشركه وعمره 28 سنه

ومتدين وكل الصفات الطيبه به وماودها يكون لي

ودها لاخواتي .. اي قلب يستطيع سماع مثل

هالكلام ويسكت قدام الكل تخرج هالكلمات موجهه

لي ماكان الي داخلي قلب .. برضوه وكلت امري لله

بعدها استفحل تعذيبهم لي الى التشكيك بعرضي

قالوا ماصر عليها الا لانها كانت بعلاقه معه

وانا يشهد الله ماعرفت حد وبريئه من كلامهم براءه الذئب

من دم يوسف .. كيف ابتعرف عليه وانا الشارع

ماشوفه ! ضربوني عذبوني وانواع العذاب والتضيق

صبه اخواني الاولاد وابوي علي .. ليه ؟ مادري

بدون ذنب .. قررت انتحر ماقدر اتحمل اكثر عزمة

النيه بعدد ضربهم لي والتبريح في جسدي

اني اقضي على عمري .. امي بعد الي جاني بدال

ماتضمني لصدرها ترفسني وتقول خلصي الشغل

قمت بكل شغل البيت وانا متهالكه مافيه اي قوة

تساعدني بعد ماخلصت خذيت حبوب كامل واكلته

وبعدها غبت عن الوعي ولسوء حظي ماتوفيت

خذوني للمستشفى واول مافتحت عيني اشوف

ابوي جمبي والقلق بادي عليه قلت في خاطري

لاول مره ابوي خايف علي يحبني وانا اقول

انه يكرهني شعور حلو ان ابوك يحبك .. وسرعان

ماحطم حلمي ورد علي بصوت كله قساوه يالخبله

لاسئلوك وش هالضرب لاتطرين شي قولي طحتي

ولاتجيبين طارينا .. ليه مامت ياناس بعدها .. كيف

اقدر استمر ماعندي صبر اعيش هالحياه الى متى ؟

رجعت للبيت وختي تزوجت الرجل الوحيد الي تقدم

لي وصارت معلومات الناس عني اني خبله ..

وهالحين انا قدامكم الموت يحاصرني من كل الجهات

صعب تعيش حياه ذل مالك هدف وغايته في الحياه

انك تعيش لخدمة غيرك هم اسم اهل ...

وش الحل برائيكم ؟ لاني افكر بالموت بشكل جدي

للهروب من كل مشاكلي ... واحزاني