​لتحسين وتصحيح الشعر الي تعتقدين انه تالف واي وحده شعرها تعبان وماتبي تقصه تدخل

السلام عليكم ياهلا فيكم
بنات بدخل بالموضوع دايركت
بنات انا كنت العب بشعري لعب
صبغات وبروتين وكيراتين ووغيرع وغيره
واستخدم عطورات خاصه بالشعر
يابنات احس الشعره اتقول ارحميني
يعني بسبب هالخرابيط صرت غصب علي التزم بالسشوار والستريت.. لان شعري خلاص رايحه عليه
يعني مشاكل الشعر كلها صارت عندي من تساقط وتقصف وخشونه يعني ماقدر اطلع حتى من غرفتي من غير مااسشور شعري عشان اتقبل شكله


المهم خالتي قالت لي شعرج الحين مافيه فايده لازم تعتنين فيه ..


اقتعنت بكلامها يومين وحطيت فيه زيوت
ورجعت على عاداتي القديمه
حسيت بملل
المهم قررت اقصه
قصيته واهملته وصار وهو قصير هم تالف ومتقصف
ورجعت قصيته وظليت على هالحال
حسيت بندم .. مادري ليش مع ان الشعر تالف
حسيت بندم لان قاعده اقصه عن التلف ورجع يتلف لي وكأني ماسويت شي جديد


وتركته يولي لاني مليت منه وصار الي يشوفه يقول قصيه عن التلف والي يقول لي قصيه اتنرفز
لان قلت لهم اقصه ويتلف مافي فايده
المهم هذا الكلام قبل سنه من زواجي
والحين اتزوجت يعني غصب غصب غصب علي لازم
اعتني في شعري وهم استخدم الاستشوار والستريت
صرت متوهقه اكثر


يعني لو ماكنت متزوجه اشوي اهون
بس اتزوجت واتوهقت بشعري
رحت اتبحث عن مواضيع العنايه


وسمعت عن خلطات وغيره بس انا ماحب هالسوالف هذي وماقدر اجازف لاني استخدمت خلطه وماناسبتي ابد وسببت لي مشاكل وقشره
فتجنبت هذي المواضيع
بعدين لقيت في اليوتيوب
عن وحده لبنانيه سألوها في الكومنتس عن عنايتها بشعرها .
وجاوبتهم على هيئة خطوات
وانا طبقتهااا وفعلاااااااااااا فرحت بالنتيجه من بعد شهر شي جدا رائع
اول خطوه ؛ قبل الاستحمام امشط شعري من الاطراف الى الجذور من تحت ل فوق
وادلك شعري بزيت خفيف بالاصابع بشكل دائري او امشطه .. الهدف من هذي الشغله ان انا احرك الدوره الدمويه وانشط واقوي البصيلات عشان تمسك الشعره بشكل اقوى واتفادى تساقط الشعر وقت الاستحمام
ثاني خطوه .. اغسل شعري بشامبو اطفال وماعجبني شامبو نونو او جونسون .. واستخدم شامبو هاي جيين بنكهة الفانيليا بس شوفو انتو شنو يعجبكم والسبب ان شامبو الاطفال خالي من المواد الكيميائيه والمعطره الي لها دور كبيييييير كبير في تقصف الشعر وتساقط الشعر وغيره تضعف الشعر بعد وتسبب في ظهور الشيب .
وانا بالذات عندي لخطبه في الهرمونات فلاقيت جلدي وشعري ضعفان ويتعرض بسهوله للتقصف وغيره ولاقيت انه مايتحمل الشامبوهات العاديه الي نستخدمها .. حتى الفروه
بس والله العظيم ارتحت جدا على شامبو الاطفال واتخذت دليل قوي بالمقارنه بين الشامبوهات
ثالث خطوه ابتعدي عن الماي الحار لغسل الشعر يعني اما دافي اما فاتر
رابع خطوه " الاستشوار والستريتر عدووو الشعر
اول 3 ايام صار عندي الموضوع صعب لما ابتعدت عنهم .. لكن قلت بعتبر نفسي عايشه في الزمن القديم وماعندنا هالاشياء هههه
وحاولت اسنع شعري بأي وسيله واخلي عندي اراده ابتعد عنهم. .. بس والله العظيم ماحتجت لهم
لقيت شعري فيه نعومه على لمعه حتى زوجي قال شعرج اليوم صاير حلو .. بلا استشوار بلا هم
لان الشعر بدأ يلقى العنايه الصحيحه فالزيوت الي تفرزها فروة الراس والعنايه اتخليه يرجع احلى من اول
الخطوه الخامسه لا للغسيل اليومي اعطي الفروه مجال لافراز الزيوت عشان اتمد الشعر بالزيوت المهم الي تحافظ عليه وعلى صحته ونعومته
معلومه .. انا كنت اغسله يوميا ماكنت ادري
واذا مر يوم واحد وماغسلته تطلع فيه ريحه
بعدين اكتشفت المسأله .. ان فروة الراس ذكيه
كل ماغسلتي شعرج معناها غسلتي الزيوت الي هي افرزتها وبالتالي هي اتحاول تنقذ الشعر من التلف وغيره تفرز الزيوت بشكل اسرع وانشط


لكن انتي اذا غسلتي الشعر مره كل ثلاث ايام فروة راسج تفرز الزيوت بالبطئ على المده الي انتي عطيتيها يعني عقب ثلاث ايام تصير في شعرج ريحه
فرضا لو غسلتي شعرج يوم بالاسبوع يظل شعرج طول الاسبوع نظيف ومافيه ريحه ماعدا اخر يومين
وجذي .. يعني انتي اتبرمجين فروة راسج


المهم الخطوه السادسه .. واهي التغذيه والترطيب
طبعا اذا كانت تغذيتج من داخل مو تمام او سيئه
ثقي مليون بالميه شعرج ماراح ينتفع من الزيوت الي تخلينها عليه


يعني لازم التغذيه اتكون من داخل ومن برى
في شغلات اتقوي الشعر .. مو بس الشعر حتى جلدج واظافرج لان هم كلهم نفس التركيبه بس الكثافه والشكل يختلفون
يعني سبحان الله اذا غذيتي نفسج
شعرج وجلدج واظافرج يتغذون
من الاشياء الي تقوي الشعر وتفيده
الخس والخيار والجرجير والبقدونس والخضره الورقيه الداكنه.. والبقوليات.. لانها تحتوي على البايوتين
كل يوم اكلي شي من هذول
وحطي زيت خروع او زيت باراشوت او زيت لوز وركزي على الاطراف ودلكي الفروه
وشوفي
اخر شي .. وهو التمشيط
تمشيط الشعر ابتداءا من الاطراف الى الجذور من تحت لي فوق وبعدين مشطي الفروه بلطف ومشطي الشعر من نفس الاتجاه وعكس الاتجاه ودلكي اشوي الفروه باصابعج

وراح اتشوفون الفررررق والله العظيم
هذي العنايه الصحيحه وشكرا لكم