الله يسهل عليك ولادتك ...
من تجربه شخصيه لا تعطين المولود مويه أو محلول الجلوكوز لأن هذا راح يسبب له مغص و يخليه طول الوقت صياح في صياح
و من برنامج طبي و مقاله طبيه يقولون جسم الطفل ما يحتاج مويه ال6 الأشهر الأولى سمعت انها تضر....مع العلم ان في بكري كنت أعطيها ماء و جلوكوز و ميلوبا (شاهي الأطفال) باليانسون وكانت صياحه و قبل ما اعطيها ما كانت تصيح و هذا الشي نبهني في الثاني ما اعطيت ولدي الا نقطة مويه في عز الظهر لأن كل ولاداتي في عز الصيف فأرحمهم أحسهم عطشانين و كنت اعطيه ميلوبا كميه بسيطه مره وحده في اليوم و موب دايما .و حسيت كذا انه احسن لأن كثره المويه مثل ما قلت مب زينه

بالنسبه لك ..أول 20 يوم لهوم عباره عن رشاد (1 م ك ) في الصبح على الريق طبعا تسفينه بمويه . الفايده منه التنظيف للرحم . على فكره فيه ناس تستعمله ال20 يوم الأخيره جربتها في بكري و ما طهرت بسرعه و استخدمتها في ال20 الأولى و صار أفضل في نفاسي الثاني

الحلبة يفضل استخدامها بعد اسبوع لأنها توقف الدم . و يفضل ان استخدامها مايزيد عن اسبوع أو حسب حاجتك لأنها تكثر المويات (بعد ما تطهرين تحسين دائما برطوبه و أثناء العلاقة الزوجية أيضا) بالاضافه لزيادة الوزن لأنها تحبس المويه في الجسم

التشطيف ...استخدمي أرطه (الدباغ) على شكل عيدان أو مطحونه و لكن أفضل عيدان (جربت المطحونه لكن المويه تكون عكره )
طبعا اذا مطحونه خذي مقدار قبضة يد في كاسين مويه مغليات و تترك حتى تترسب الأرطه و بعدين تشطفي بالمويه الدافيه
و اذا كانت عيدان خذي في ملء يديك عيدان و ضعيها في قدر شبه كبير و املئيه بالماءالمغلي و تترك تطبخ مدة 10 أو 15 دقيقه و تترك حتى تصبح دافئه ثم تتشطفين بكل الكمية طبعا هذا اذا تميتي عشرين يوم و اذا خلصتي تشطف تروشي و بعد 10 أيام كرريها و بعد 10 أيام أخرى كرريها .
الفايده من الأرطه التنشيف
حاولي ما تكثرين تروش خصوصا العشرين الأولى ...لأنه راح يقطع معك الدم و ما تطهرين بسرعه .

لتصغير البطن ....يشرب (1 م ص كمون + 1 م ص زنجبيل + نصف م ص يانسون + 1 أو 2 ورقه نعناع +سكر حسب الرغبه )طبعا تغلينها في ابريق و تتركينها تركد شوي و بعدين تشربينها دافيه
و في اول 20 يوم يضاف للمكونات السابقة نصف ملعقة صغيره دارسين (قرفه )ثم لا تضاف بعد ذلك لأنها تنزل الدم

يلف البطن بقماش قطن طويل و شبه عريض و لا يستخدم المشد أول اسبوع ....عشان يرجع الرحم لوضعه الطبيعي طبعا تشدين بطنك على فوق ما ترصينه على تحت أتمنى تكونين فهمتي علي

يؤكل اللحم + شرب مرقة اللحم مع وضع فلفل أسود فيها .

لو حصل تجيبين لك مراصيع من أهلك جاهزة بس انت تحطين عليها حليب و شوي ماجي و فلفل أسود و تحطين عليها كشنه أو بدون حسب اللي تشتهينه يكون زين لأن البر زين في النفاس و لا يسمن و أنت في غربه هذا سهل عليك تسوينه

حاولي ما يكون بطنك فاضي لأن الأكل على كلام الأولين يرص الرحم و ينزله لمكانه (عشان ما يطلع هوا من ........)
لا تشربين بارد أو آيس كريم ...يعني حاولي يكون أكلك دافي..و لا تكثرين شرب مويه على كلام الأولين يزيد الرطوبه

خذي ملينات لأن الكثير يعانون من الامساك و انتم بكرامه
حليب الطفل لو شريتيه لا تشترين المدعم بالحديد ...لأن جسم الطفل فيه مخزون حديد يكفيه الى 6 شهور قدام و لو اعطيتيه راح يسبب له امساك . يعني اشتري الحليب اللي بالحديد بعد 6 شهور .

أنا ما عندي نظام صعب كلها أشياء بسيطه لأني ما أحب الحوسه ...
نسيت أقول لك كريم ما أدري مرهم ميبو حطيه على المنطقه ...و فيه اللي يحطه على الفوطه ...هو للجروح و الحروق يساعد على تجميل و تقليل أثر الجرح .
أتمنى أن أكون أفدتك ..
موفقه..

نصيحتي لك رضعيه رضاعه طبيعيه فقط لاغير وهذا يكفيه اصلا الله جعل غذاؤه في هالحليب مايحتاج شي ثاني بس اهم شي بعد الرضاعه تخلينه يتجشأ عشان مايجيه مغص .. واذا اذا اضطرتي وجاه مغص شديد عطيه يانسون
واصحي تعطينه حلبه مايصلح للصغار ابد

وانتي عليك بالتمر والرشاد مع السمن والحلبه وحبة البركه واشربي قشر قهوه مع قرفه وكمون ... واهتمي بأكلك بيض حليب مع فلفل اسود لحم مصابيب بر مرقوق مطازيز يعني هالاكلات ولاتجوعين نفسك .. والحلبه في العشرين يوم الاولى فقط

اب

ماقصروا قالوا كل اللي بقوله
بس اضافه لاااااااااااااتكثرين الاعشاب وتشكلينها عليه توه بطنه صغيرون مايتحمل يعني كمون ويانسون مره ف ليوم م ص على كاس ماء دافي نقعيه نص ساعه
منقوع التمره حلو ومفيد بس بيسبب له مغص ويتعبك عطية اذا كمل 2 شهر
اذا حسيتي انه يبكي من بطنه سويله كراويه تلاقيها بالعطار مرررررررره حلوة وتريحه بنفس طريقة الكمون واليانسون
اذا حسيتي انه تعبان من صدره والا دخله برد حمي شوي زيت زيتون وخليه شوي يدفى ودهني بطنه ورجوله بس تأكدي ماعليه حراره
حلبه لااااااتعطينه مو كويسه خليه لين يكبر شوي
هذي نصايح امي ووجدتي والدكتور سويتها لولدي وبسويها لنونو الجاي ***** الله

ادعي لي بتيسير الولاده

الله يسهل ولادت الجميع ويوفق كل من ردت على