لكل واحدة مو عاجبها جسمها وتبي تغيره وتصير رشيقة وجذابة

أنا واحدة حريصة على ممارسة الرياضة رغم اني والحمدلله رشيقة وجسمي ما فيه زوائد وعيوب بس مهتمة بشكلي وصحتي ومنتظمة في الرياضة من باب اللياقة والمحافظة على الصحة وتحسين النفسية والمزاج وعشان أحافظ على قوامي مشدود وبشرتي نضرة على طول.
للرياضة فوائد عديدة يا بنات بس مع الأسف كثير حريم في مجتمعنا غافلين عنها وبعضهم تمارسها شوي وبعدين توقف كسل أو تعب ولو تدري عن نتايجها ولو تصبر والله راح تشوف تغييرات تخليها تتمنى لو انها بدت فيها من سنين.

اللي يضايقني كثير اذا رحت عرس أو أي مناسبة لما اشوف حريم ذراعهم مترهلة وزنودهم كبيرة كأنهم مصارعين ههههه والا اذا شفت واحدة ذراعها كله سيلولايت أو لابسة قصير والساق كلها سيلولايت متراكم أو اذا واحدة لابسه فتحة عند الصدر والصدر مترهل أو فيه آثار تشققات وخطوط والا اذا شفتي واحدة رقبتها مترهلة أو فيها خطوط من القعدة الغير صحيحة وعدم ممارسة الرياضة وشد الجسم وأيضاً اتضايق كثير اذا شفت واحدة جسمها مو متناسق وفيه تعرجات وانحناءات زيادة عن اللزوم.. وأتمنى لو اني أمسك كل واحدة وأعلمها بأهمية الرياضة واعطيها برنامج تمشي عليه ودايماً اذا شفت حريم زي كذا ماحب اطالع في أجسامهم أبداً واصرف نظري عنهم.

الغريب انه رغم العيوب اللي في بعض الحريم بس ما تستحي انها تطلع عيوبها وتبرزها باللبس الغلط.. طيب ليش ما تعالجين نفسك أولاً وخلال هالفترة تلبسين محتشم الين يصير جسمك حلو بعدين تتفننين بالاستعراض واللبس اللي على كيفك.. من جد مو حلو كذا الواحدة تلبس ضيق وهي متينه أو عندها كرش أو أردافها كبيرة أو تلبس العاري والمفتح والقصير وهي تعاني من الترهل أو السيلولايت وغيرها من المشاكل الجمالية.

يا بنات الريجيم لحاله ما يصلح
اشوف بنات كثير يمشون على دايت بس وش فايدة الدايت والنحافة مع ترهلات؟ لازم غير خسارة الوزن لازم تمارسين الرياضة عشان تشدين جسمك والجلد المترهل بعد فقدان الوزن

صدقوني والله الرياضة فوائدها لا تعد ولا تحصى وصحيح بعض الحريم تجي النتيجة معاهم متأخر عشان كذا يتكيسلون ويوقفون مبكر بس والله في النهاية النتيجة مرضية وتشرح الصدر وتقوي ثقتك بنفسك لو تستمرين وتواصلين للنهاية وما توقفين حتى لو شفتي جسمك صار زين عشان تحافظين عليه

واحنا أكثر حريم نحتاج للرياضة لأننا بطبيعة مجتمعنا المحافظ ما نطلع كثير وأكثر وقتنا قاعدين في البيت غير كذا أكلنا وانتو عارفين اكثر سمنة في الخليج عندنا
غير كذا احنا ما نمشي مثل الدول الأخرى ودايماً بالسيارة


طبعاً أحسن رياضة أنصحكم فيها المشي من ناحية خسارة الوزن بأسرع فترة ممكنة وثانياً الأيروبكس لشد الجسم وما في أحسن من الايروبكس في شد الجسم وتنحيف الخصر وغير كذا الرياضة هذي تحسن المزاج بشكل ما تتصورينه وتخليك شباب على طول بس تستمرين عليها واسألي مجربة
انا لي سنين مستمرة عليها ولله الحمد

أنا من زمان كنت أروح الصالات الرياضية التابعة لمراكز نسائية بس خلاص بطلت مؤخراً وصرت امارس الرياضة في بيتي
لعدة أسباب وسلبيات في الصالات الرياضية النسائية عندنا واللي لاحظت انها تتكرر في عدة أماكن لين كرهت الرياضة برا البيت وقررت اسويها في بيتي
أولاً أنا أدفع مبلغ وقدره على جلسات محدودة تنعد عالأصابع.. الأسعار ناار وخيالية كأني رايحه أتمرن عند مدربة نجوم هوليوود!
ثانياً كم مرة أروح ابي اتمرن والقى المدربة غايبة أو مشغولة ويعتذرون لي والحركة البايخه هذي تكررت أكثر من مرة في أكثر من مركز وغير كذا ما يلتزمون بالوقت مرة يقولون تعالي 4 واذا رحت 4 يقولون تعالي 5 وهكذا كم مرة يلعبون علينا
ثالثاً كم مرة أروح متحمسه ابي اتمرن وانشط جسمي واتفاجأ بالمدربة تقول ما جاو البنات ما في الا انتي وما اقدر اسوي جلسة رياضة على متدربة واحدة
كأني جايه مجاناً!؟ ما كأني دافعة حق الجلسة مسبقاً؟!

وعدم الانتظام في الرياضة ما يجيب نتيجة.. يعني وش الفايدة اروح يوم و10 ايام ما اروح! ما استفدت شي!! وطبعاً السبب منهم مو مني

رابعاً بعض الصالات النسائية زحممممة مو طبيعية.. اروح العصر زحمة.. اروح المغرب زحمة.. اروح بعد العشا زحمة.. كل واحدة تطق بالثانية في التمرين واحياناً اشم روائح احس اني بستفرغ.. هذا غير ان من كثرة الزحمة يصير فيه كتمة بالصالة وما فيه تهوية كافية

خامساً وهذي أسوأ مشكلة كنت أواجهها في الصالات الرياضية النسائية عندنا، يشغلون التكييف واحنا نتمرن وانا ما امانع بس المشكلة انهم يعلون عليه ويوجهون الهوا على الصالة مو لفوق وهذا فيه خطر علينا واحنا نتمرن لأن الهوا البارد على الجسم الحار والمعرق ضار جداً جداً وكم مرة آخذ برد واعاني بعد التمرين بسبب هالمشكلة والقهر اني اذا قلت بطفي المكيف يزعلون.. ما في واحدة فيها احساس وخوف على نفسها غيري يعني!؟

سادساً فيه مراكز فيهم بخل مو طبيعي.. ما يحطون لوكرات ولا ماي للشرب ولا اجهزة.. ما كأني رايحه صالة تمرين أبداً.. ابي اعرف بس الفلوس اللي تجيهم بالهبل من الاشتراكات اللي سعرها مرتفع وين تروح؟؟ ليش ما تاخذ صاحبة المركز جزء من المبالغ اللي تجيها وكل شهر تحط شي جديد بالصالة وبكذا تكسب زبونات أكثر

سابعاً بعض المدربات نفسها شينه وتعطيك الجلسة وهي تصارخ ووجهها معفوس كأنك جايه ببلاش والا على حسابها

وغيره من السلبيات كثييير

المهم انا طفشت من كل هذا وقررت اني اسوي الرياضة في غرفتي ولا أتعب نفسي على صالات ما تسوى وخدمات حرام فيها فلوسك اللي هي من تعبك مو لاقيتها بالشارع!

وش سويت؟
شريت كم سي دي ايروبكس.. وما شاء الله جرير عندنا والبحرين مليانه سيديات رياضة ويوغا على كيف كيفك! واذا ما قدرتي تروحين البحرين اطلبي من النت وأسعارهم حلوة

وشريت أثقال وبساط التمرين والستيبس
وكل يوم اشغل الدي في دي أي وقت افضى فيه وامارس الرياضة بمزاجي
لا أنتظر مدربة تتفضل وتتكرم تجي بالوقت الفلاني ولا انتظر باقي البنات لين يجون عشان نصير قروب وبالتالي حضرتها توافق وتعطينا الجلسة ولا هم اشتراك وخساير فلوس على جلسات متقطعة الخ الخ
مرتاحة يا بنات بالتمرين في البيت مرة وأنصحكم تسوون مثلي

وغير كذا يكفي انك تمارسين الرياضة في بيتك وبخصوصية أكثر
يعني ما فيه أحد يطالع جسمك وانتي تتمرنين ويطالع عيوبك أو يطالعون وش لابسه وانتو عارفين اللقافه المنتشره في مجتمعنا وانعدام الخصوصية والحرية الفردية عندنا... أو ممكن تصير لك مواقف تفشل وهذي تصير كثير في الصالات الرياضية.. واحدة انشق بنطلونها الاسترتش وهي تتمرن معانا ويا ما شفت من مواقف محرجة ومضحكة!

فالأفضل تمارسين الرياضة في بيتك وبكذا توفرين فلوس وبنفس الوقت توفرين وقت وجهد لأنك ماراح تضطرين تلبسين عباتك وتطلعين للمركز النسائي اللي ممكن يكون بعيد عن بيتك ومضطرة تقطعين شوارع بالسيارة عشانه لأن مو كل المراكز النسائية فيها صالات رياضية عندنا


وأخيراً.. بنات اللي تعاني من السيلولايت تنتظم عالرياضة
صدقوني ما في أحسن من الرياضة وشد الجسم في إزالة السيلولايت
طبعاً السيلولايت مستحيل يروح نهائياً بس الرياضة تخففه بنسبة 80% وأنا مجربة والله يشهد علي
كان معاي سيلولايت رغم اني نحيفة
سبحان الله من عديت الـ27 طلع السيلولايت فجأة في جسمي بس مع الرياضة وانتظامي عليها وخصوصاً الحركات اللي تشد الجسم صارت بشرتي روعة ، صافية ومشدودة والسيلولايت اختفى نوعاً ما وصار ما يبين

وكثروا شرب ماي واللي ما تحب الماي مثلي تكثر من العصاير بس شرط تكون فريش وبدون سكر

وأنصحكم بعد تخلون أكلكم صحي وتخففون من أكل السكريات مثل الدونت وغيره من الحلويات لأنها هي الدمار الشامل للبشرة.. مو بس تسبب لكم سيلولايت.. هذي تعجل بالشيخوخة المبكرة للبشرة وخلايا الجسم بشكل عام

وأنصحكم أيضاً بالنوم الكافي لأن قلة النوم هي سبب مشاكل كثيرة منها عدم انتظام الوزن وزيادة الوزن في معظم الأحيان

وأهم نقطة لا تعصبون وتتوترون وتشيلون هم .. حاولوا تسترخون دايم وتكونون ريلاكس لأن الكرش وانتفاخ البطن غالباً يطلع بسبب التوتر صدقوا أو لا تصدقوا!
أنا جتني فترة مهما اسوي رياضة عندي بطن وانتفاخ غريب وسألت مدربة أجنبية شاطرة وقالت لي ان التوتر هو السبب وقالت لي لازم تسترخين وحاولي تسترخين كل يوم بأي طريقة لأن التوتر يزيد الوزن وينفخ البطن.. وفعلاً بعدها صرت أحاسب واطنش واحاول استرخي بالموسيقى الهادية وممارسة هواياتي المفضلة والابتعاد عن الناس الكئيبين والتفكير في همومي وسبحان الله لي كم سنة ولله الحمد بطني ما فيه انتفاخ وجسمي زين ووزني ثابت ما يتغير... وعموماً انا من النوع اللي أكلي قليل وهذا اللي يساعد.

غير كذا أنصحكم بالماي البارد لأنه يشد البشرة والجسم.. وممكن بآخر شطفة قبل الخروج من الشاور.

وأغلى نصيحة هي أكل فول الصويا.. بنات هذا عجيب وسر من أسرار الأنوثة والنضارة والبشرة الناعمة والمشدودة والشابة على طول.. واحدة خدامة كبيرة في السن عند ناس أعرفهم عليها سيقان مشدودة وناعمة تقولون سيقان بنت في العشرينات، سألتها أمي ليش قالت من أكل فول الصويا وهذا ياكلونه الآسيويات بكثرة في بلدهم عشان كذا تلقونهم يعجزون متأخر.
وفول الصويا رهيب مو بس للبشرة .. للشعر والصحة بشكل عام. ابحثوا في فوائد فول الصويا وبتتفاجأون من الفوائد المتعددة اللي فيه.
انا شريت كمية من GNC وكل يوم اسلق كمية وآكلها مع السلطة أو الغدا.. صحيح طعمه مو مرة حلو بس مفيد وما في واحدة بتعرف فوايده ما تحرص على اكله :)


يلا بنات شدوا حيلكم وسووا لكم برنامج يومي من ناحية الدايت والرياضة والاسترخاء وكلها شهرين أقل شي وتشوفون نتيجة تشكروني عليها.. بس كل اللي ابيه منكم الدعاء لي بظهر الغيب ان الله يفتحها علي وينولني اللي في بالي.

وبليز بنات الصبر ثم الصبر.. لا تيأسون.. مو تتمرنون يوم ويومين وبعدها توقفون.. لا استمروا وخلي عندكم قوة إرادة واللي يبي الحلو لازم يصبر على المر.

تبون أجسام زي الموديلات؟ تبون أجسام زي الممثلات اللي تشوفونهم في المسلسلات والأفلام الأمريكية؟
تبون تلبسون مقاس 10 أو 12 على طول وتلبسون أي لبس يعجبكم؟
تبون تحسون بخفة وصحة وراحة؟
تبون تبينون أصغر من أعماركم؟
تبون ثقة أكبر بالنفس وكل ما طالعتي المرايا تحسين بفخر وتقولين لنفسك أو بالأصح لجسمك: وينك عني من زمان!؟
تبون تتغير ملامح وجيهكم للأفضل (لأن النحافة والرشاقة تخلي ملامحك أصغر وتبرز ملامحك أساساً)
تبون أزواجكم ما يطالعون غيركم ويتغزلون فيكم 24 ساعة :42: اصبروا وكافحوا والنتيجة تعجبكم وتعجب الكل وتخليك مضرب للمثل


كل هذا راح تحصلون عليه بالرياضة والانتظام فيها والأكل الصحي وممارسة الاسترخاء كل يوم

مهما صار من ضغوط ومشاكل في البيت أو العمل وأياً كان لا تهملين الرياضة ولا تهملين صحتك بإعداد الأكل الصحي والاسترخاء لساعة واحدة في اليوم على الأقل
مهما كانت ظروفك سواءً كنتي أم أو موظفة مشغولة جداً خصصي لنفسك ساعتين على الأقل في اليوم للتمرين والراحة والاسترخاء وحتى لو عندك عيال ومسؤوليات انتي بعد من حقك تهتمين بنفسك وجمالك


سوري طولت عليكم بس ابي مصلحتكم

وبليز لا تشرهون علي لو ما عقبت على ردودكم أو ما رديت على رسايلكم الخاصة لأن الإدارة محددين لي المشاركات في المنتدى.. حدي 3 مشاركات في اليوم وبس :(


لا تنسوني من صالح الدعاء بالزوج اللي يستاهلني واني افرح امي قريب بزواجي واني اشوف اختي حبيبتي عروس قريب.. بلييز بنات لا تنسونا من الدعااء



ودمتم بود
:26: