كملي ياختى الله يفرجها عليك وعلي جميع المسلمين

تزوجت أختي الكبيرة والصغيرة بنفس السنة وانا تحدد زواجي بعدهم بسنة أو أكثر..وسمعت ألوان التشمت من أخوالي وخاصةً خالاتي الثنتين (الغير شقيقات لسا ماتزوجوا)..لكن مشيّت الحال وأحتسبت عند الله المهم ذيك السنة اللي جلستها بعدهم صار شغل البيت كله علي..الخادمة سافرت وجلسنا 6 شهور بدون خادمة..والله وربي الشاهد أني كنت ماأخلي أمي تشتغل واذا جت بتساعد اني أقعدها وأشتغل عنها وحتى في فترة عودة المعلمات ووقتها كنا مأجزين اني كنت أصحى من الساعة تسع الصبح وأنظف البيت وأرتبه وأجهز الغداءعشان ماتتعب أمي وتجي تتغدى وترتاح...ومع هذا كله كانوا أخواتي الله يهديهم الصغار يخربون البيت كل مارتبته.. فلما خاصمتهم قامت أمي علي ..وصارت تقول انك تتمنانين علينا بشغلك وتدروين للمضاربة عشان ماتشتغلين فحيلي عني وانا بأشتغل...بعد هذا كله تقولين اني ادور للمضاربة والله انه بأمكاني أريح نفسي ولا أسوي شيء بس والله ماتهوون علي أمي مهما سوت فيني..بلعتها ورحت لغرفتي بكيت لين جفت دموعي:44:...وخرجت أكمل وأساعدها ولا كأني سمعت منها هذا الكلام الجارح...والمشكلة ان أمي دائماً تنكرنا ودائماً تقوول انّا مانفعناها بشيء..والله أن المواقف كثيرة كلها توجع وتحفر في القلب لكن نحاول ننساها عشان نقدر نعيش..
طبعاً راح أختم لكم بهالموقف وبعدها راح أدخل في مشكلتي طبعاً وحدة من خالاتي الغير شقيقات تزوجت قبل زواجي بشهر وطبعاً في زواجها ماخلت احد من قريبات زوجها اللي تزوجوا قبلها ينزف معها..وقالت هذي ليلتي ماأحد يشاركني فيها ..طبعاً قبل زواجي بيومين كلمتني وقالت راح أنزف معاك وراح أشغل الأغنية الفلانية ومن هالكلام فأنا سكت وقلت في نفسي وقتها مع فقرات الزواج ماراح يصير لها وقت تنزف.. طبعاً راحت قالت لأخت زوجي خلاص اني وافقت وبتنزف معاي فبنت خالتي وصلتها لأمها (أم زوجي)وأم زوجي وصلتها لواحد من أخوالي (الأشقاء)هو عصبي شوي بس حقاني (أسفة حكيتكم الموقف كله بس أبيكم تعرفون حجم الظلم اللي عشت فيه)راح عند أخته(اللي تبي تنزف معي) وخاصمها وقال هذي ليلتها وخلاص انتي انبسطتي بليلتك ومن حقها تنبسط بليلتها طبعاً راحت هي شكت لأصغرخالاتي (الشقيقات اللي وقفت بوجه زوجي لما خطبني)ورجعت الأخيرةعلي وانتي ليش تفتنين وتوصلين الموضوع لخالك وانا أحلف لها اني ماتكلمت ولا أدري من وصل لخالي ومع ذلك كذبتني وجلست تدافع عن أختها وجلست تقوول ايش فيها لوانزفت معاك ولاتكونين أنانية..طبعاً ساعتها عصبت وشديت معاها بالكلام وقلت لها مالك دخل بزواجي وجتي الحين تنكدي علي ..هي سوت نفسها انها زعلت وانها ماتوقعت هالشيء مني فأنا في نفس المكالمة أعتذرت وقلت لها سامحيني ان كنت تجاوزت حدي وخلاص قفلت وانا نفسيتي سيئة لأبعد الحدود..طبعاً اليوم الثاني على طول كلمت أمي وخالتي(أم زوجي)وشكت لهم مني واني وقحة واني فتانة واني ابي المشاكل...(ماأقول إلا حسبي الله ونعم الوكيل)..طبعاً أمي الغالية المتفهمة رجعت لي سمعتني كلام يسم البدن وانا كالعادة ماعندي متنفس الا اني ابكي... مرت ذيك الفترة وتم العرس ورزقني الله بأبنة جميلة أسأل الله ان يصلحها وذرياتكم..

يتبــــــــــــــــــــــع

بانتظارك :(

أمكن تلاحظوون اني ماصرت أشتكي من أبوي.. سبحان الله لوتشوفون أبوي تقول نار وأنطفت..صار هاديء وراحت شدته وعصبيته ..لكن هالحالةصارت عند أمي صارت شادة معانا وتنوب عن أبوي بالمواقف اللي تسويها فينا حتى اذا ابويه رحم وحدة منا ولا أعطاها فلووس أوشيء تجلس امي تحاول تأثر عليه عشان مايعاملنا هالمعاملة..يعني بإختصار تحاول توزه علينا وتشوه صورتنا بنظره؟؟؟؟!!!
المهم بعد زواجي عشت في مدينة بعيدة عن أهلي وأخواتي..لكن مع ذلك كنت أحس بالغربة ونفسي أكون قريبة من أهلي.. طلب زوجي نقل وأنتقلنا لمدينة أهلي ماأخفيكم أني فرحت أني رجعت لأهلي على الرغم من اللي شفته منهم..بس على قولة المثل الظفر مايطلع من اللحم..ولي من يوم نقلت 10أشهر بالتمام..لكن ماأخفيكم أني ماشفت الضيم والنكد الا من يوم قربت من أهلي وأهله والله لازم ماتمر فترة الا وانا ابكي من أمي أو أمه..حتى لوشكيت لأمي من تصرفات خالتي معاي تبرر لها وان المشكلة فيني وانتي وانتي...فصرت ماأبين لها ايش يصير معي...

حتى لما أروح عند أهلي وأبات عندهم ماأرجع بيتي الا وأنا أبكي من الكلام اللي أسمعه لدرجة مرة جلست أقول لأمي خلاص غطي أصغر أخواتي السنة الجاية بتصير بالمتوسط بقت فيني وقالت مالك دخل وباقي نشوف كيف تربين بنتك؟؟
ولما قلت لها انا غطيتوني من ثاني إبتدائي عصبت علي وجلست تقوول زمانهم غيرعن زمانكم ومالك دخل ومن هالكلام..حتى أخونا الصغير دخلت في باله أنا نكرهه ونحقد عليه ونحسده...بالله كيف نتعامل معها وكيف نتعامل مع ظلمها لنا...لدرجة انه آخر مرة زرتهم ضاعت علي 500ريال بيبتهم فأنا شكيت بخادمتهم.. خاصة وأن أخواتي شكووا لي منها..فيوم عرفت اني شكيت في خادمتها قامت علي وقامت تسبني قدام الخادمات انتي ياظالمة اتقي الله تظلمينها وكلام طويل أخرتها انفجرت وعصبت وجلست اقولها تدافعين عن الغريبة وتشكين فيني انا اللي من لحمك ودمك..أنا والله ساعتها ماأقول لكم والله عصبت وصرت أردد حسبي الله ونعم الوكيل (ماأقول إلاالله يغفر لي) طبعاً لما سمعتني ادعي زعلت مني وراحت نشرت السالفة ذي عند أخواتها حتى أم زوجي وصلها الخبر..واني دعيت عليها ومن ذا الكلام..طبعاً ابوي عرف القصة كلها من أخواتي ولما عرف قام على أمي وخاصمها وقال لها ليش تنكدين على البنت وتقومين عليها..ليه ماحليتي الموضوع بهدوء وفتشتوا الشغالة بدون ماتسووا بلبلة..امي ماعجبها هالكلام كان بودها يجي ابوي ويعطيني كلمتين ويسكتني..خلاص بعد يومين راضيتها وانتهي الأمر..والحين مر على القصة ذي شهر..في ذي الأيام سمعت أختي أمي تكلم خالتي الصغيرة(الشقيقة) وتقول لها انها باقي في قلبها السالفة هذي وانها مقهورة ليش ابوي يدافع عني..فقامت قالت لابوية يحول لاختي الكبيرة فلووس عشانها محتاجة فلما عرفت انه حوول لها فلوس قالت ايوة تدري انه بناتك جاحدات ويزعلوون اذا ماحولت لهم..طبعاً ابوي صدقها وقامت تستدل بسالفة الفلوس لما ضاعت علي (لانها صارت تقول لي لما ضاعت فلووسي وحدة غيرك مفروض تستحي ماتتكلم وتقول لاهلها ان فلووس ضاعت عليها في بيتهم يعني بيسرقوها انا كم صار مثل هالمواقف وماتكلمت قلت انتي عندك راتب بتعوضين الشهر الجاي مو مثلي ماصدقت جتني هالفلوس.. قالت لمين يروح الراتب مو لكم.. قلت ماتقصرون بس مرت علي شهور مادريتم عني)
طبعاً راحت تقول لأبويه اني أحسدها على راتبها ومع انها تعطينا من راتبها الا اننا جحدناها..:(
وفوق هذا جت خالتي تسبنا في منتدى تشارك فيه هي وأمي وكتبت هالعبارة في موضوع عن تربية الأبناء (انه أعرف بنات يردون على أمهاتهم وأبائهم ويرفعون صوتهم ويدعون عليهم بالرغم من حنان وعطاء أهلهم..)طبعاً شيشت أمي علينا وصدقت امي انها مظلومة معنا..بالرغم انه هالسالفة مر عليها شهر لكن رجعت تعيد وتزيد في هالموضوع..
فما كان مني الا اني اتصلت بخالتي وتكلمت عليها ووقفتها عند حدها خاصة انه هذي ثاني مرة تتفتن علينا وتشيش أمي علي..وقلت لها كل اللي في قلبي..حتى هي ردت علي وماقصرت ..لكن.الزبدة من الموضوع هذا:

هل تشوفون اني غلطانة بحق أهلي؟؟
وهالفترة ابوي وامي زعلانين مني خاصة لما عرفوا اني كلمت خالتي وما يكلموني ؟؟والله اني صرت اتمنى يتبرؤن مني وارتاح من المشاكل وعوار الرأس خاصة وانا أعرف اني مظلوومة واني ماغلطت بحقهم لكن خلاااااااص تعبت من المشاكل والحنة...

الله يسعدكم ويبعد عنكم المشاكل والنكد أيش تشورون علي؟؟واللي تقول أراضيهم؟؟كيف أراضيهم لاكلمتهم بيسدون الخط بوجهي...الله يعافيكم ساعدوني؟؟

والله ياقلبي مدري وش اقول

الامور كثيره متداخله مع بعض وفيها اطراف كثير حساسه امك وابوك وام زوجك اللي هي خالتك

والله احيانا الاقارب يكون قربهم مشاكل ووجع راس والبعد عنهم غنيمه

انتي هالفتره حاولي تهدين الامور ولا كأن صار شيء وتتركينها للوقت لحد ما تهدء الامور

لكن الغريب ان امك متعلمه وفاهمه والله ان بعض الامهات اميات لا تقرا ولا تكتبت وتربيتهم وتفهمهم وحكمهم للامور افضل من المتعلمه

انتي بعد فتره روحي لها وابتسامتك ما تفارق وجهك واعتذري منها واستسمحي وبوسي راسها .. وقولي مهما كان انتي امي ولا اقدر على زعلك واللي تامرين فيه انا حاضره ، صدقيني بكلمتك هذي اخلصي فيها لله واجعل نيتك برك امك لرضا رب العالمين وانه يوفقك في حياتك ويبعد عنك المشاكل وعوار الراس

عمرنا قصير ما يدري الواحد من اللي يفارقها قبل ، انسي المشاكل والهموم اللي راحت وغيري من شخصيتك كإنسانه واثقه وقولي انا قد المشاكل واتحمل باتكالي على رب العالمين ، لكل شخص اساء لك احسني تعاملك وظنك فيه

وراح اقولك على سر والله ثم والله ثم والله ماعمري جربته الا سبحان الله تفك اي ضيقه اواجهها

الاستغفار ،، استغفري في كل وقت وكل لحظه ،، وخصوصا اخر الليل استغفري 1000 واكثر بنيت صلاح الحال وتبديل اوضاعك

والله راح تشوفين شي عمرك ما تصورتيه ،، من لزم الاستغفار جعل الله له من كل هم فرج ومن كل ضيق مخرج ورزقه من حيث لا يحتسب ..

الله يوفقك ويستر عليك ويسخر لك عباده الصالحين ..