ليش اهل زوجك ملاقين مجال يتدخلون في حياتك ويأذونك ؟؟؟ ادخلي اعلمك

السلام عليكم
ليش اهل زوجك ملاقين مجال يتدخلون في حياتك ويأذونك ؟؟؟ ادخلي اعلمك وكيف تردعينهم عنك
اولا لسببين موجودين في الزوج .

اما الزوج يكون بلا شخصيه مع الكل ... او يكون فقط ماعنده شخصيه عند اهله ..
وثانيا ... اذا كان زوجك مايحبك .. ويفضل عليك الجميع .
و الاسباب الثانية موجوده فيك انتي ..


اول شيء انا شخصيا ما اتكلم عن موضوع الا بخوض تجربه فيه وانتظرت اعالج الخطأ فيه ثم اكتبه وانصح فيه ..
انا اول ما دخلت على اهل زوجي
يبغون يعادوني .. كأنهم يختبرون صبري .. اشوف الغيره واضحه
ماني عارفه وش السبب .... وبالذات خوات زوجي


حكمت عليهم انهم عائلة تحب المشاكل وماعندهم وظيفه غير اذية حريم اخوانهم ...
والي محيرني ومجنني ليه يسوون كذا ؟
المشكله ماني عارفه ليش وجلست اقول الى زوجي اختك قايلة كذا واختك مسوية كذا ...
وتصير مشكله
واكرر هالحركه احاول اقنعه وابغاه يصدقني فعلا خواته يغثوني
ويقهروني ويقولون كلام بس مايصدق ..
واذا انا قلت شي يتصيدون علي .. قاصده مو قاصده
ويصدق خواته اكثر اذا اشتكو


المهم مرت سنوات على الحاله هذه
لدرجة ان ينقل لهم كلامي !!!!!!!!!!!!!!!!!!
وسبني وجرحني عشانهم
وبعدين يخلون صورة الواتساب
مهما تسللت محبة الاخ الى الاشخاص الاخرين يبقى الاخ والاخت هما الاقرب !!!!!!
فهمت انهم من البداية خايفين اخوهم يحبني وينساهم
لانهم متعلقين فيه ولانهم علاقتهم بأزواجهم شبه فاشله فيعوضون النقص فينا يعني .. زوجها مو خاتم بصبعها .. النتيجه حرام اخوها يكون مع زوجته امورهم طيبه وحياتهم ماشيه وسعيدين مع بعض ..


صرت الاقي حركات التطفيش
يقصون شعر بنتي من غير اذني .. يسوون اي شي مع عيالي ومالي حق اتكلم .. ولو حاسبتهم على شي .. يحلفون مايتقربون من عيالي ويسوون انفسهم مساكين ويتبكبكون عند زوجي ..


ومن هنا انفتح لهم المجال وصارو يتدخلون بكل صغيره وكبيره في حياتي وفي عيالي وكل شي ..


انا بصراحه ما حبيت الوضع هذا
وحاولت مرارا وتكرارا مع زوجي افهمه وش يسوون خواته وماطلعت بنتيجه غير الهم والغم !!!!!
ومشاكلنا توصل لهم .. وفهمو انهم نجحو وصار الي يبون !!!
وفررررررحووووو بالنتيجه .


المهم انا زوجي حاولت اتغير عليه وماعطيه وجه و ازعل ابيه يدافع عني ابيه يفهمني ... ولا استفدت سنين ضيعتها عالفاضي ..


المهم انا ادخل اليوتيوب واشوف مواضيع مختلفه
وبحثت عن مشكلتي
ابغى اوقف تدخلاتهم ابغى الي في بالي يصيررر ابغى زوجي ينتبه للي يصير
والحمد لله لقيت الحل وجربته وطلعت بنتيجه فعلا
وصرت اقول عن نفسي غبيه غبيه الي ما سويت كذا من البداية


فهمت الزبده ان خوات زوجي عندهم هم انه يحبني
واعتقد هذا مرض نفسي ونقص .. وحسد وغيره .
لدرجة تعدو حدودهم معاي ويغلطون وزوجي ساكت
ومع الاسف كانو قمه في الحقارة
يعني ما يخلون احد مايقولون له عن مشاكلنا يعني زوجة اخوهم الثانيه تعرف من الالف للياء وش يدور بيني وبين زوجي بسببهم يتكلمون علي عندها وعند الناس بعد .


عالعموم اول شي صار
كان المفترض لما خوات زوجي يشكون لزوجي ويلعبون دور الضحيه
و يجي زوجي معصب و يحاسبني ليش مزعلتهم


اكون هادئة ومتفاجئة وابين له ان المساله تافهه وان انا مو قاصده وادعي لهم بالهداية و احسسه اني احبهم من كل قلبي وابين حسن نيتي ..


((((لاني كنت انفعل واغلط واقول واذم فيهم وفي اخلاقهم واعاتبه لين تصير مشكله ويطلع وانا انام بهمي وهم مرتاحين وفرحانين .. )))


خلاص عادي امشيها بهدوء
واخليهم يشتكون براحتهم لين يدافع عني ويبطلون هالحركات غصب عليهم ويشوفون ويشوفون نياتهم كيف تنقلب عليهم


وهذا بالضبط الي صار معي ... البداية كانت صعبه بعدين حبيت النتايج ..


ثاني شي مشاكلي مع زوجي
قد احتاج اتنازل في اي مشكله بيني وبينه
واطنش ... واهدي الوضع
خصوصا ان اذا اهله من هذا النوع لازم يسألون يبون اخبار كذا ومشاكل ... يرتاحون يغذيهم هذا الشي سبحان الله
وعشان استفيد من هالخطوه .. عشان اذا احد يشتكي علي مايصدق اي شي يسمعه


لان الزوج اذا يشوف زوجته تسوي مشاكل معاه
يصدق الي ينقال عليها من اهله
بس اذا شافها هادية ومسالمه مايصدق طبيعي ..


طيب ازعلي منه .. صدي عنه بهدوء
لا تتهاوشين معاه .. صدقييييني صدقيني راح يجي يراضيك او يهدأ معك ..
وش تستفيدين تحاولين تقهرينه مثل ماقهرك وكل شي يوصل لأهله ..


لاتعطينه المجال يعتمد على خواته في شي .. مثل غسل ملابسه
او طبخ او اي شي ..
واذا اضطريتي ..
اطبخي اي شي وعطيه بإيده قولي له خذ هذا و اعطيه اهلك يذوقون طبخي ..


ولا تخلينهم يساعدونك من غير مقابل ..




انا الي لاحظته فرررررررررق في المعامله والكل صار يحترمني
وقدرت بنسبة ٨٥ بالمئة اغيرهم معاي


ال ١٥ بالمئة زوجي مشكلته تعود عودوه ينقل اي شي لهم
ولكن يحاولون يسحبون مني كلام ولا ارد .. واغير الموضوع ..
لكن هو صار ينقل الأخبار الحلوه عني
يعني يسالونه للحين زوجتك تسوي مشاكل
يقول لا بالعكس مثلا يعني


انا اعرفهم زين لاني اشوفهم مع حريم اخوانهم وازواجهم كيف يسألون اخوانهم بهذه الطريقه
يعني اعرف كيف طريقة الحوار الفضولي الي يدور بينهم وبين زوجي
ويجوني ويبغون يسحبون كلام ..


انا قبل على نياتي اتكلم .. يسوون نفسهم في صفي ويستغلون الشي هذا في وجود اخوهم