ليش فعلاَ ماتكون قلوبنا على بعض..دعوه لجميع المغتربات

بنات انا راح ادخل بالموضوع من دون مقدمات

وراح اكتب باسلوب عامي<< علشان ماتدققون بكلامي

كلنا مغتربات وتاركين اهلنا وحبايبنا من اجل هدف معين ويارب يتمم للجميع بخير ونحقق اهدافنا ونرجع لاهلنا واحبتنا سالمين غانمين يارب العالمين

والغربه صعبه ولكن يخفف من مرارتها وجود اخوات نتقاسم معاهن افراحنا واحزاننا الله لايجيب احزان يارب


ونفرح كثيراً حينما نتعرف ويكون بيننا الفه ومحبه

وجميعنا يدرك اننا قد تكون بيننا فوارق اجتماعيه وفوارق تربويه وفوارق كثيره ولكن الغربه هي الشي المشترك بيننا


ومن اجل تفعيل هذه المحبه ودي افتح لكم قلبي وابيكم تفتحون قلوبكم مثلي ونتعلم من بعض ومن اخطاءنا بحق بعض حتى يدوم الحب والاخاء...


بقولكم سالفه كدرتني وانتم احكموا..

انا مغتربه جديده عندي طفل ماكمل سنتين وتعرفت على بنات كل وحده عندها طفلين بسن المدارس والتمهيدي الى سنه يعني ماشاء الله مختلف الاعمار
المهم بيننا دوريه والاحظ انه في اليوم اللي يكون الدور علي الاخوات مايتساعدون معاي<<< لاتعتقدون اني ابيهم يطبخون او ينظفون بيتي لا والله

بس ابيهم يمسكون عيالهم لان انا نفسيتي تتعب بصراحه من اهمال الام ونسيانها نفسها مع السوالف...

اقربها الاسبوع الماضي يوم الجمعه حضروا عندي ...بيتي لسى جديد واثاثي نفس الشيء والوانه فاتحه<<< لاتجيني وحده مطفيه النور وتقول تراها فتره محدده وماشيه والا من زين الاثاث

وانا بصراحه محافظه عليه كنوع من النظافه والاثاث لو كان معدوم محد بيرتاح ببيته ولا احنا هنا علشان كل يوم نغير الاثاث

المطلوب فقط شوية مراعاة واهتمام والتعامل باخويه واحساس

يعني وحده الله يهديها جايبه معاها كيس شيتوس اللي يجي لونه برتقالي<<<< فش فاش او بفك النمر مدري وش تسمونه

وتوزعه على الصغار وتعالوا شوفوا ايديهم وعلى الكنب السكري وحتى الجدران ماسلمت منهم<<< مسويه كريمه وذوق بس مو على حساب بيتي وتعبي

والثانيه ولدها ياكل تمر وانواع السعابيل ويدينه خلاص كلها تمر انا وقتها ماقدرت اصبر مسكت منديل وجلست امسحه بعدين اخذته وغسلت له<<<< ترى ماني شغالتها بس حز بخاطري عدم اهتمامها


والثالثه ترضع ولدها على الكنب وياليته حليب عادي جايبه له بالفراوله وخليها على ربك

وربي كل جلستهم وانا ع اعصابي وغير ان عيالهم يضربون ولدي وانا ساكته وهم وربي ولا همهم ضحك وسوالف

ليه كذا يابنات؟؟ ليه انعدم الاحساس؟ ترى ماعندنا شغالات ؟ ترى الاهتمام بتصرقات عيالنا يحسب لنا ومدى ذوقنا؟؟ ليه مااعتبر بيت صاحبتي بيتي ؟ ليه مانربي عيالنا يحترمون ممتلكات الغير والممتلكات العامه<<<< مدري وش دخلها بس من قهري

لو شفتوا بيتي بعد ماطلعوا كان ماتلوموني........... وربي جلست ابكي

مناديل بعد عيالهم بكل مكان

الحفايظ الله يكرمكم قلبت ريحة البيت وانا لما اروح لهم واغير حفاظة ولدي احطها بثلاث اكياس والبس عبايتي واطلعها وارجع اسولف حتى مايفقدوني او تعودوا على حركتي..

بنات خلو جماعتنا حلوه وننبسط وعيالنا تنبسط معانا........ لاني احيانا افكر اقول وش جابرني عليهم خاصة انهم يتسلطون ببيتي زياده على ان اثاثي الوانه فواتح وحساس..


قلت لكم اللي يضايقني والحين ابي كل وحده تقول اللي يضايقها علشان نتعلم مافينا احد كامل ويمكن انا ارتكب حماقات عن حسن نيه وتكون تضايق غيري


وربي ترى انا ماادعي الكمال بس انا احب النظافه والنظام واكيد فيني عيوب عساها يارب خفيفه ع الناس

انتظر مشاركاتكم


سامحوني على الاسلوب ترى بس لاني مابي اخسرهم ومابي اشيل هم جمعتنا يكفي هم الغربه